Փաստ ինֆո

Վերաքննիչ քրեական դատարանը՝ դատավոր Արսեն Նիկողոսյանի նախագահությամբ,ՀՀ երկրորդ նախագահ Ռոբերտ Քոչարյանի խափանման միջոցի հարցի քննարկումը շարունակվում է առանց նրա. Նախագահող դատավորը թույլ տվեց նրան հեռանալ դատական նիստերի դահլիճից ։ Նշենք, որ նման խնդրանքով դիմել էր պաշտպան Հայկ Ալումյանը՝ խնդրելով թույլ տալ Ռոբերտ Քոչարյանին հեռանալ նիստերի դահլիճից՝ առողջական վիճակից ելնելով։ Դատարանը չառարկեց, սակայն տուժողի իրավահաջորդի ներկայացուցիչ Տիգրան Եգորյանը նշեց, որ իր խոսքում անդրադառնալու է այնպիսի հանգամքների, որոնք վերաբերում են երաշխավորողների և Ռոբերտ Քոչարյանի հարաբերություններին և էական կլինի, որ Ռոբերտ Քոչարյանը տեղեկացված լինի և անհրաժեշտության դեպքում նաև պարզաբանում ներկայացնի։ Պաշտպանների հետ քննարկումից հետո Ռոբերտ Քոչարյանը նախընտրեց հեռանալ նիստերի դահլիճից, իսկ հարկ եղած դեպքում դիրքորոշում կներկայացնեն փաստաբանները։ 

Նշենք, որ մինչ այդ՝ Ռոբերտ Քոչարյանի ներկայությամբ, պաշտպան Հայկ Ալումյանը միջնորդել էր՝ դատարան հրավիրել նաև Ռոբերտ Քոչարյանի համար անձնական երաշխավորություն ներկայացնող նախկին վարչապետերի՝ հատկապես հաշվի առնելով, որ առաջին ատյանի դատարանն արգելել է նրանց խոսել, ինչը կարելի է տեսնել նաև դատական նիստի ձայնագրությունից։ Մեղադրող դատախազ Գևորգ Բաղդասարյանն էլ նշեց, որ երաշխավորների՝ դատարանում լրացուցիչ ձայնի հնարավորությունից տալով ինչ հանգամանք պետք է պարզել։ Նրա խոսքով՝ երաշխավորողները չեն կարող իմանալ, թե արդյոք նրանց խոսքը Ռոբերտ Քոչարյանի համար նշանակություն ունի, թե ոչ և, որ նրանք կարող են ընդամենը ենթադրել։ Բաղդասարյանն ընդգծեց, որ դատարանի կողմից պարզաբանման ենթակա հանգամանքների հստակեցման առումով երաշխավորողի խոսքի անհրաժեշտություն չի տեսնում։

Տուժողի իրավահաջորդի ներկայացուցիչներ Արա Ղարագյոզյանը և Տիգրան Եգորյանը ևս առարկեցին։ Տուժշողի իրավահաջորդ Սարգիս Քլոյանն էլ ասաց.

«10 զոհի հարազատները նստած են, մի հատ ցավակցե՞ին, կուլտուրա չկա՞ր»։ Տուժողի իրավահաջորդի հայտարարությանն արձագանքեց նախագահող դատավոր Արսեն Նիկողոսյանը՝ նշելով, որ հասկանում է, որ իրենց ցավը մեծ է, բայց վստահեցրեց, որ հիմա դա չի քննարկվում և խնդրեց տուժողի իրավահաջորդին դիրքորոշում հայտնել բարձրացված հարցի շուրջ։
Տուժող կողմն ամբողջությամբ առարկեց միջնորդությանը։ Վերաքննիչ քրեական դատարանը՝ դատավոր Արսեն Նիկողոսյանի նախագահությամբ, որոշեց չհրավիրել երաշխավորողներին, քանի որ ամբողջ անհրաժեշտ տեղեկությունը ներկայացվեց Արամ Վարդևանյանի կողմից և նշեց, որ ավելի կարևոր էր Ռոբերտ Քոչարյանի տեսակետը։

Հիշեցնենք, որ պաշտպանական կողմը ներկայացրել էր Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։ Ռոբերտ Քոչարյանի համար անձնական երաշխավորություն են ներկայացրել Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։ Մայիսի 13-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, մերժեց միջնորդությունները,որի դեմ պաշտպանական կողմը վերաքննիչ բողոք է ներկայացրել։ Մայիսի 22-ին բողոքը մակագրվել էր Վերաքննիչ քրեական դատարանի դատավոր Արմեն Դանիելյանին, ով դատավորների շրջանում ունի ամենացածր՝ -20 վարկանիշը։ Նշենք, որ Արմեն Դանիելյանը այն դատավորն է, որը բեկանել էր Երևանի ընդհանուր իրավասության առաջին ատյանի դատավոր Դավիթ Գրիգորյանի՝ Ռոբերտ Քոչարյանին 2019թ. մայիսի 18-ին ազատ արձակելու և մայիսի 20-ին Ռոբերտ Քոչարյանի և մյուսների գործով գործի վարույթը կասեցնելու և ՍԴ ուղարկելու մասին որոշումները։ Բացի այդ՝ նա նաև բեկանել է Ռոբերտ Քոչարյանի պաշտպանական թիմին «Մարտի 1»-ի մայր գործով գործի նյութերը տրամադրելու մասին Երևանի ընդհանուր իրավասության դատարանի որոշումը։ Արմեն Դանիելյանին բողոքի մակագրումից հետո Ռոբերտ Քոչարյանի պաշտպանները ետ են վերցրել վերաքննիչ բողոքները՝ գտնելով, որ Արմեն Դանիելյանը չի կարող Ռոբերտ Քոչարյանի գործով դատարան լինել։ Հունիսի 1-ին պաշտպան Հովհաննես Խուդոյանը նոր բողոքներ է ներկայացրել վերաքննիչ դատարան։ Հունիսի 8-ին բողոքները մակագրվել են Վերաքննիչ քրեական դատարանի դատավոր Արսեն Նիկողոսյանին։

Հեղինակ՝ Իզաբել Սահակյան

Աղբյուր` Փաստինֆո