Փաստ ինֆո

ԱԺ փոխխոսնակ Ալեն Սիմոնյանն այսօր լրագրողների հետ զրույցի ժամանակ անդրադարձավ «Բարգավաճ Հայաստան» խմբակցության հայտարարությանն այն մասին, որ պատրաստվում են արտակարգ դրության պայմաններում հավաքների կազմակերպման որոշման իրավաչափությունը վիճարկել ՍԴ-ում։

Ալեն Սիմոնյանն ասաց, որ դրան լավ է վերաբերում, քանի որ վերջիվերջո պետք է կորդինատների ճշտում տեղի ունենա. «Այդ ՍԴ-ի հետ կապված բոլոր խնդիրների պարագայում նրանք խոսել են այն մասին, որ իրենք մեծ հաշվով համաձայն են, որ ՍԴ-ի հետ կապված խնդիրը գոյություն ունի, բազմիցս ասել են, որ դեմ են քվեարկել Հրայր Թովմասյանի թեկնածությանը, բայց հիմա որոշել են դիմել իրենց դեմ քվեարկած Հրայր Թովմասյանին, որպեսզի նա լուծում տա։ Կարծում եմ այստեղ կորդինատների ճշտման փուլն ավարտին կհասցվի, ուղղակի վստահ չեմ, որ ՍԴ-ի հետ կապված հարցը մինչ այդ արդեն լուծում տված չենք լինի»,-ասաց Ալեն Սիմոնյանը։

Ինչ վերաբերում է կորոնավիրուսի հետ կապված քննիչ հանձնաժողով ստեղծելու ԲՀԿ-ի նախաձեռնությանը, Ալեն Սիմոնյանը չկարողացավ ասել՝ կմիանան այդ նախաձեռնությանը, թե ոչ. «Կքննարկենք գործընկերների հետ, բայց ես արտահայտում եմ իմ կարծիքը և ասում, որ կան հարցեր, որոնք միգուցե ճշտելու կարիք ունեն, թե ինչու են պատգամավորներն առանց դիմակ, ինչու են հայտարարում, որ դիմակը պետք չէ, ինչու են որոշ մարդիկ ասում, որ կորոնավիրուս գոյություն չունի։ Կարծում եմ՝ դրա հետ կապված պատասխաններ կունենանք»,-ասաց Ալեն Սիմոնյանը։

Աղբյուր` Փաստինֆո