Փաստ ինֆո

Ռոբերտ Քոչարյանին մեղսագրվող արարքում կարևոր նշանակություն ունի բանակի ներգրավումը քաղաքական հարցերին, որն իրականացվել հատուկ քողարկման եղանակով։ Քողարկվել են տրամադրված տրանսպորտային միջոցների տարբերանշանները, ներգրավված անձանց տրամադրվել են առանձին հագուստներ, դրանց տարբերանշաններ են փոփոխվել, առանձին վարույթներ կան տարբեր փուլերում, որոնք վերաբերում են Ռոբերտ Քոչարյանի պաշտոնավարման ժամանակ նրա անմիջական կամ ոչ անմիջական ենթակայության տակ գործող պաշտոնական անձանց կողմից քննության ընթացքը շեղելու, ապացույցներ կեղծելու վերաբերյալ։ Այս մասին ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ դատական նիստին ասաց մեղադրող դատախազ Գևորգ Բաղդասարյանը։

Անդրադառնալով Ռոբերտ Քոչարյանի՝ ազատության մեջ գտնվելու ընթացքում գործի քննությանը չխոչընդոտելու վերաբերյալ պնդումներին՝ Բաղդասարյանն ասաց, որ կալանավորման հիմքը ոչ միայն քննությանը խոչընդոտելու փորձն է, այլև՝ ռիսկը։
Ըստ նրա՝ դատավարության փուլերում ռիսկերը փոփոխության են ենթարկվում, ընդ որում, դատախազի խոսքերով, ստանդարտ չէ, որ գործը դատաքննության ուղարկելուց հետո ռիսկը պետք է նվազի։

«Պարոն Ալումյանի մատուցումը, որը շեշտադրված է նրա վրա, որ այս պարագայում պետությունն իր պարտականությունը դնում է ամբաստանյալի վրա՝ պարտավոր լինելով ապահովել, որ թեկուզ ազատության մեջ գտնվող անձն ազդեցություն չունենա վկաների վրա, այդ պատճառաբանությունը, ինչպես հասկանում եմ, ենթադրում է, որ փաստորեն դատական քննության փուլում կալանավորում չպետք է լինի»,- ասաց Բաղդասարյանը՝ նշելով.

«Ասել, որ, եթե այդ փուլում անազատության մեջ ես պահում, ուրեմն պարտականությունդ դնում ես իր վրա, որ ռեսուրսներ չծախսես, դա ինչ է ենթադրում, որ պետությունն այսօր գործով անցնող հարյուրավոր վկաներից յուրաքանչյուրի կողքը պետք է ոստիկան կանգնեցնի կամ յուրաքանչյուրի նկատմամբ միջոցառումներ իրականացնի, որ այդ ազդեցությունը չեզոքացնի, չգնալու համար մեկ անձի կալանավորմա՞ն»։
Դատախազը նաև անդրադարձավ «5-րդ ալիք» ՀԸ սեփականատեր Արմեն Թավադյանի վերաբերյալ քրեական գործին՝ նշելով, որ «Դատալեքս» համակարգից տեղեկացել է, որ կազմակերպված խումբ է ստեղծվել գործի քննությանը խոչընդոտելու համար։ Նշելով, որ նմեղության կանխավարկածի սկզբունքը չի խախտում՝ դատախազը նշեց, թե հիմնավոր կասկածի մակարդակում այդ հարցը քննարկման առարկա չի կարող չդառնալ։

Նախագահող դատավոր Արսեն Նիկողոսյանը հետաքրքրվեց՝ արդյո՞ք գործի նյութերում փաստ կա, որ Ռոբերտ Քոչարյանն անմիջականորեն մասնակցել է, օժանդակել է, թե դա կարող է լինել այդ անձանց ինքնագործունեությունը, ինչին ի պատասխան մեղադրող դատախազ Բաղդասարյանն ասաց, որ այդ գործով տվյալներ կան, որ Ռոբերտ Քոչարյանի ընտանիքի անդամները գործով որպես մեղադրյալ ներգրավված անձանց հետ ժամանակահատվածում գտնվել են շփումների մեջ։

Բաղդասարյանը վստահ է, որ այդ փաստերին գնահատական կտրվի։

«Եթե այս պահին լիներ տեղեկություն, որ Ռոբերտ Քոչարյանն անմիջականորեն մասնակցել է, բնականաբար կունենար նաև այդ կարգավիճակը։ Բայց նրա անազատության մեջ գտնվելու պայմաններում այսպիսի հանգամանքը մեծացնում է ռիսկը՝ ազատության մեջ գտնվելու դեպքում դրան մասնակցելուն »,- ասաց Բաղդասարյանը։

Դատավոր Արսեն Նիկողոսյանն էլ հետաքրքրվեց. «Չե՞նք վտանգի անձնական պատասխանատվության հետ կապված խնդիրները, երբ մենք չենք ունենում որևէ կապող հանգամանք, բացի նրանից, որ, օրինակ երեխաները մասնակցել են՝ չխախտելով որևէ մեկի անմեղության կանխավարկածը, ենթադրենք, որ արդեն քրեական գործը դատարանում է։ Եթե մենք չունենանք փաստ անձամբ Ռոբերտ Քոչարյանի մասնակցությունը, շահագրգռվածությունը վկայող՝ կապի տեսանկյունից։ Երեխան կարող է մտածել, որ հոր համար լավ բան է անում, բայց արդյո՞ք հայրը համաձայն էր դրա հետ, արդյո՞ք գոնե գիտեր դրա մասին։ Այդ փաստերից որևէ մեկը կա՞ այսօր»։

Դատավորի հարցին ի պատասխան Բաղդասարյանն ասաց, որ խոսքը գնում է ռիսկի մասին և անձը կարող է այդ պահին առնչություն չունենալ, որովհետև գտնվում է անազատության մեջ, բայց պայմանականորեն իր ընտանիքի անդամն այդպիսի գործողությունների գտնմում, ապա անձի ազատության մեջ գտնվելու դեպքում ռիսկն ավելի մեծ է։ Պաշտպան Հայկ Ալումյանն առարկեց դատարանի գործողությունների դեմ՝ նշելով, որ վերաքննությունն ընթանում է թույլատրելի սահմաններից դուրս։ Մասնավորապես՝ նշված հանգամանքը չի հետազոտվել Առաջին ատյանի դատարանում և դատական ակտում նշված է միայն այն, որ նման բան է ասել դատախազը։

Հիշեցնենք, որ պաշտպանական կողմը ներկայացրել էր Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։ Ռոբերտ Քոչարյանի համար անձնական երաշխավորություն են ներկայացրել Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։ Մայիսի 13-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, մերժեց միջնորդությունները,որի դեմ պաշտպանական կողը վերաքննիչ բողոք է ներկայացրել։ Մայիսի 22-ին բողոքը մակագրվել էր Վերաքննիչ քրեական դատարանի դատավոր Արմեն Դանիելյանին, ով դատավորների շրջանում ունի ամենացածր՝ -20 վարկանիշը։ Նշենք, որ Արմեն Դանիելյանը այն դատավորն է, որը բեկանել էր Երևանի ընդհանուր իրավասության առաջին ատյանի դատավոր Դավիթ Գրիգորյանի՝ Ռոբերտ Քոչարյանին 2019թ. մայիսի 18-ին ազատ արձակելու և մայիսի 20-ին Ռոբերտ Քոչարյանի և մյուսների գործով գործի վարույթը կասեցնելու և ՍԴ ուղարկելու մասին որոշումները։ Բացի այդ՝ նա նաև բեկանել է Ռոբերտ Քոչարյանի պաշտպանական թիմին «Մարտի 1»-ի մայր գործով գործի նյութերը տրամադրելու մասին Երևանի ընդհանուր իրավասության դատարանի որոշումը։ Արմեն Դանիելյանին բողոքի մակագրումից հետո Ռոբերտ Քոչարյանի պաշտպանները ետ են վերցրել վերաքննիչ բողոքները՝ գտնելով, որ Արմեն Դանիելյանը չի կարող Ռոբերտ Քոչարյանի գործով դատարան լինել։ Հունիսի 1-ին պաշտպան Հովհաննես Խուդոյանը նոր բողոքներ է ներկայացրել վերաքննիչ դատարան։ Հունիսի 8-ին բողոքները մակագրվել են Վերաքննիչ քրեական դատարանի դատավոր Արսեն Նիկողոսյանին։

Հեղինակ՝ Իզաբել Սահակյան

Աղբյուր` Փաստինֆո