Փաստ ինֆո

Ես պատասխանատվությունից երբեք չեմ խուսափել, դա իմ բրենդն է,- Վերաքննիչ քրեական դատարանում ընթացող դատական նիստին ասաց ՀՀ երկրորդ նախագահ Ռոբերտ Քոչարյանը՝ պատասխանելով նախագահող դատավոր Արսեն Նիկողոսյանի հարցին։ Նկատենք, որ դատավորին հետաքրքրում էր ՀՀ երկրորդ նախագահի վարքագիծը՝ վարույթի ընթացքում, հաշվի կառնի երաշխավորողների կարծիքը՝ իր գործողություններում։

Ռոբերտ Քոչարյանը նշեց, որ նախագահ լինելու հանգամանքը պատասխանատվության իր ծանրագույն բեռն է իր ամբողջ կյանքի համար և ամեն հիմք հայտնելուց մտածում է, թե ինչպես կընկալվի և ինչ արձագանք կարող է ունենալ, որովհետև հասկանում ես, որ գտնվում է հասարակության խոշորացույցի տակ, ինչը լրացուցիչ ինքնասահմանափակումներ է ստեղծում յուրաքանչյուր մարդու համար, ով բարձր պաշտոն է զբաղեցրել։ Նրա խոսքով՝ իր համար դա մեծագույն պատասխանատվություն է՝ լինելով ՀՀ երկրորդ նախագահ և ԱՀ առաջին նախագահ, թե ինչ վարքագիծ կդրսևորի և ինչպիսի հանրային արձագանք կստանա։

Ռոբերտ Քոչարյանն ընդգծեց, որ և իր կողմնակիցների կողմից, և մարդկանց կողմից, ովքեր իրեն չեն ընդունում, կա ձևավորված մի կարծիք, որ ինքը խոսքի տեր մարդ է և երբեք պատասխանատվությունից չի խուսափի։

«Սա բրենդ է, որը ձևավորվել է իմ կենսագրության և իմ անվան շուրջ։ Սա ինձ համար չափազանց մեծ արժեք ունեցող բրենդ է և որևէ քայլ, որը կարող է այս ընկալման վերաբերյալ ինչ-որ տեղ կասկածներ առաջացնի, ուղղակի բացառվում է»,- ասաց նա՝ նշելով, որ իր համար տհաճ է, որ ինքը պետք է դատարանում կանգնի և այդ հանգամանքի կարևորությունը փորձի բացատրել՝ օգտագործելով ինչ-որ բառապաշար։

Նախագահող դատավոր Արսեն Նիկողոսյանն էլ արձագանքեց՝ նշելով. « Ինչու՞ է տհաճ, պարոն Քոչարյան. Դուք կանգնած եք պետության ամենակարևոր ինստիտուտներից մեկի՝ դատարանի առաջ։ Մի պետության, որի գլուխը հանդիսացել եք երկար տարիներ, երկու պետականության առաջին դեմքն եք եղել և ներկայացրել եք ՀՀ-ն, Դուք կանգնած եք Ձեր իսկ տասնամյակների ղեկավարած պետության ամենակարևոր ինստիտուտներից մեկի՝ դատարանի առաջ, սա կարևոր չէ՞»։ Ռոբերտ Քոչարյանն էլ պատասխանեց, որ չի ասել, թե կարևոր չէ, ասել է, որ տհաճ է, որովհետև իրեն թվում էր, որ դա այն բանն էր, որի բացատրության կարիքը չպետք է լինի՝ կենսագրությունից ելնելով։

«Գիտե՞ք, ժամանակակից հոգեբանությունը մարդու տեսակը դատող բնավորությունն ավելի շատ բացատրում է բիոքիմիայով, այլ ոչ թե՝ դաստիարականությամբ։ Իսկ բիոքիմիան չի փոխվում, մարդ այնպիսին է, ինչպիսին կա »,- ասաց նա։
Ռոբերտ Քոչարյանը նշեց, որ 1988թ-ից որևէ մեկին առիթ չի տվել մտածելու, որ իր խոսքի տերը չի կարող լինել։

«Հարգելի դատարան, Դուք հիշո՞ւմ եք որևէ մի դեպք, որ ես հակասել եմ ինձ, այսօր՝ արել եմ մի հայտարարություն, հաջորդ օրն՝ ուրիշ։ Չկա այդպիսի բան »,- ասաց Ռոբերտ Քոչարյանը։

Նշենք, որ մինչ այդ պաշտպան Արամ Վարդևանյանը ներկայացրել է , թե ինչ հարաբերություններ ունի Ռոբերտ Քոչարյանն անձնական երաշխավորություն ներկայացրած անձանց հետ։

Ավելի վաղ հայտնել ենք, որ Վերաքննիչ քրեական դատարանում՝ դատավոր Արսեն Նիկողոսյանի նախագահությամբ ընթանում է Ռոբերտ Քոչարյանի խափանման միջոցի վերաբերյալ բողոքների քննությունը։

Հիշեցնենք, որ պաշտպանական կողմը ներկայացրել էր Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։ Ռոբերտ Քոչարյանի համար անձնական երաշխավորություն են ներկայացրել Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։ Մայիսի 13-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, մերժեց միջնորդությունները,որի դեմ պաշտպանական կողը վերաքննիչ բողոք է ներկայացրել։ Մայիսի 22-ին բողոքը մակագրվել էր Վերաքննիչ քրեական դատարանի դատավոր Արմեն Դանիելյանին, ով դատավորների շրջանում ունի ամենացածր՝ -20 վարկանիշը։

Նշենք, որ Արմեն Դանիելյանը այն դատավորն է, որը բեկանել էր Երևանի ընդհանուր իրավասության առաջին ատյանի դատավոր Դավիթ Գրիգորյանի՝ Ռոբերտ Քոչարյանին 2019թ. մայիսի 18-ին ազատ արձակելու և մայիսի 20-ին Ռոբերտ Քոչարյանի և մյուսների գործով գործի վարույթը կասեցնելու և ՍԴ ուղարկելու մասին որոշումները։ Բացի այդ՝ նա նաև բեկանել է Ռոբերտ Քոչարյանի պաշտպանական թիմին «Մարտի 1»-ի մայր գործով գործի նյութերը տրամադրելու մասին Երևանի ընդհանուր իրավասության դատարանի որոշումը։

Արմեն Դանիելյանին բողոքի մակագրումից հետո Ռոբերտ Քոչարյանի պաշտպանները ետ են վերցրել վերաքննիչ բողոքները՝ գտնելով, որ Արմեն Դանիելյանը չի կարող Ռոբերտ Քոչարյանի գործով դատարան լինել։ Հունիսի 1-ին պաշտպան Հովհաննես Խուդոյանը նոր բողոքներ է ներկայացրել վերաքննիչ դատարան։ Հունիսի 8-ին բողոքները մակագրվել են Վերաքննիչ քրեական դատարանի դատավոր Արսեն Նիկողոսյանին։

Հեղինակ՝ Իզաբել Սահակյան

Աղբյուր` Փաստինֆո