Փաստ ինֆո

Կարծում եմ, որ Ադրբեջանի ռազմաշունչ հայտարարությունների հիմնական նպատակն այն է, որ Արցախի, Հայաստանի ժողովուրդը և ընդհանրապես Արցախն ու Հայաստանը Ղարաբաղի հարցի կարգավորման ամբողջ պրոցեսն ընկալեն վախերի պրիզմայով։ Այս մասին այսօր ԱԺ-ում ասաց ՀՀ վարչապետ Նիկոլ Փաշինյանը՝ պատասխանելով «Իմ քայլը» խմբակցության պատգամավոր Տաթևիկ Հայրապետյանը։

Պատգամավորն ասաց, որ վերջերս հրապարակվեց Համաշխարհային խաղաղության ինդեքսը, որով Հայաստանը ներառվել է խաղաղասիրության մակարդակի աճ գրանցած 5 պետությունների ցանկում՝ զբաղեցնելով 2-րդ հորիզոնականը, իսկ առաջին հորիզոնականում Ադրբեջանն է։

Վարչապետը նշեց, որ հայ ժողովուրդը վախերի պրիզմայով Արցախի հարցն ընկալելու սովորություն, մշակույթ չունի. «Բացառված է, որ Հայաստանի Հանրապետությանը բանակցային բովանդակություն պարտադրվի որևէ սպառնալիքի ներքո։ Քանի որ այս հանգամանքների բերումով այդ ռազմաշունչ տրամադրությունն արդյունավետ չէ, հայտնվում է տեղապտույտի մեջ։ Ադրբեջանի իշխանությունը խնդիր ունի սեփական ժողովրդին բացատրելու, որ այսքան տարի ռազմաշունչ տրամաբանությամբ գնում ենք առաջ, և դա է ձեր հայեցակարգը, բա ինչու մենք արդյունքի չենք հասնում։ Էս օդում կախված հարցին պատասխանելու համար, Ադրբեջանը ևս մի աստիճանով բարձրացնում է իր ռազմաշունչ հռետորաբանությունը, որպեսզի սեփական ժողովրդի համար ավելի մեծ տպավորություն գործի, բայց սրանով տեղապտույտն ավելի է խորանում»,-ասաց Նիկոլ Փաշինյանը՝ նշելով, որ իր կոչն Ադրբեջանի նախագահին շարունակում է նույնը մնալ, այն է կառուցողական մոտեցում ցուցաբերել և հրապարակային համաձայնվել իր առաջարկած բանաձևի հետ։

Նիկոլ Փաշինյանը նկատեց՝ տպավորություն ունի, որ դիսկուրսի առումով Ադրբեջանի ղեկավարությունը շատ մեծ դիսկոմֆորտ կարող էր ապրել այն բանից, որ ինքը վարչապետի կարգավիճակով չէր խորշում խոսել Ադրբեջանի ժողովրդի հետ. «Այդ ռազմական հռետորաբանության աստիճանի բարձրացման պատճառներից մեկը նաև ներքին վախերն են, որ ըստ էության ժամանակակից տեխնոլոգիաների և կոմունիկացիոն գծերի առկայության պայմաններում շատ հետաքրքիր հնարավորություն է խոսել ուղիղ Ադրբեջանի ժողովրդի հետ՝ հասկանալով, որ Ղարաբաղի հարցը կարող է էլիտայի համար ոչ միայն լինել բուն ազգային անվտանգության հարց, կարող է լինել ունեցվածքի պահպանության հարց, բայց ժողովուրդների համար սա շատ ավելի լայն կոնտեքստ ունի։ Ես երբեք չեմ բացառել, որ եթե տեսնենք, որ երկխոսությունն Ադրբեջանի գործող վերնախավի հետ չի ստացվում, կարելի է խոսել Ադրբեջանի ժողովրդի հետ պարզ, բաց, անկեղծ»,-ասաց Նիկոլ Փաշինյանը։

Աղբյուր` Փաստինֆո