Փաստ ինֆո

ԲՀԿ առաջնորդ Գագիկ Ծառուկյանի նկատմամբ իրականացվող գործընթացները քաղաքական կոռուպցիայի պարզ դրսեւորում է,- «Փաստինֆո»-ի հետ զրույցում ասել է ՔԿ նախագահի նախկին տեղակալ Վահագն Հարությունյանը։

«Արդարադատություն ասվածը վերջնականապես թաղվեց քաղաքական կոռուպցիայի տակ։ Այն ամենին, ինչին ականատես ենք լինում ոչ այլ ինչ է, եթե ոչ քաղաքական կոռուպցիա»,- ասաց նա՝ նշելով, որ հանրության որոշ անդամների ընկալումը, թե կոռուպցիան ենթադրում է նյութական շահի հետապնդում թյուր է։

Արձանագրելով, որ քաղաքական գործընթացներին միջամտելու կամ քաղաքական գնահատականներ տալու մտադրություն ամենեւին չունի՝ բանախոսը նշեց, որ հարցը դիտարկում է բացառապես իրավական հարթությունում, իսկ փաստերը հետեւյալն են՝ ունենք երկրորդ ուժի առաջնորդի կողմից հնչեցրած հայտարարություն ու դրանից հետո տվյալ ուժի նկատմամբ իրավապահների կողմից իրականացվող իրավական գործընթացներ։

«Կոռուպցիան միայն նյութական շահի հետապնդումը չէ։ Իրավական ոլորտում ապօրինությունները, դրանց հովանավորչությունը, որոնց միջոցով քաղաքական խնդիրներ են լուծվում՝ քաղաքական կոռուպցիայի դրսեւորումներ են»,- ասաց Վ.Հարությունյանը՝ նշելով, որ տվյալ պարագայում իրավապահ մարմինների կողմից նախաձեռնված գործընթացների միջոցով առերեւույթ փորձ է արվում չեզոքացնել ընդդիմադիր գործչին։

Նա նկատեց, որ այս ամբողջ գործընթացը փորձ է արվում ներկայացնել իրավական հարթությունում, սակայն իրականության հետ դա որեւէ կապ չունի, ինչի մասին վկայում են հենց իրավապահների տարածած հաղորդագրությունները։ Մասնավորապես՝ դրանցից ակնհայտ է դառնում, որ Ծառուկյանի ու նրա կուսակցության նկատմամբ հարուցված գործերը նոր են, իսկ այդ փաստերը նախաքննության տրամադրության տակ եղել են վաղուց։

«Հերթական անգամ գործ ունենք եռակի, քառակի ստանդարտների հետ, որոնց գնահատական տալն անշնորհակալ գործ է։ Սրանք ճչացող ապօրինություններ են»,- նշել Վ.Հարությունյանը՝ ուշադրություն հրավիրելով նաեւ այն հանգամանքի վրա, որ այս ընթացքում ժողովրդի նկատմամբ կիրառվում է նաեւ ֆիզկական ուժ, հարկադրանք՝ ձայնը լռեցնելու համար, որի հիմքում դրվում են պարետի կողմից սահմանված կանոնները։
Վ.Հարությունյանը կարեւորեց հակահամաճարակային կանոնների պահպանումն ու արձանագրեց, որ դրանք խախտվում են հենց իրավապահների կողմից՝ դրանք պահպանելու անվան տակ։

Խնդիրն այն է, որ առանձին դեպքերում բողոքի ակցիաներ են տեղի ունենում տարբեր հարցերի շուրջ, որպիսիք դրսեւորումներ արձանագրվեցին նաեւ ի աջակցություն Գ.Ծառուկյանի։ «Ամենեւին քաղաքական հարցերի մեջ մտնելու ցանկություն չունեմ, ուղղակի արձանագրեմ, որ հատկապես վերջին շրջանում նկատվում են ոստիկանության կոշտ գործողությունները անգամ մեկ անձի կողմից իրականացվող ակցիաների նկատմամբ, թույլ չի տրվում, որ որեւէ քաղաքացի բողոքի ինչ-որ հարցի շուրջ եւ նրան հեռացնելու համար օգտագործվում են ոստիկանական մեծ ուժեր, ինչը վարակի տարածման համար շատ ավելի մեծ վտանգ է ներկայացնում»,- ասաց Վ.Հարությունյանն ու ավելացրեց. «մի քաղաքացուն բերման ենթարկելու համար ներգարվվում է մոտ մեկ տասնյակ ոստիկան՝ առանց ձեռնոցների, նրանք խախտում են սոցիալական հեռավորությունը պահպանելու մասին պարետի կանոնը, ոլորում քաղաքացու ձեռքերը ու նստեցնում մեքենան, ապա գնում են մեկ այլ քաղաքացու նույն եղանակով բերման ենթարկում ու նորից նստեցնում նույն ավտոմեքենան, որով տեղափոխում են ոստիկանական բաժիններ ու կարելի է հաշվարկել, թե մեկ միավոր ռիսկը ինչ մեծ քանակի վերածեցին։ «Իշխանությունն իր գործողությունները արդարացնում է համավարակը կանխարգելելու անհրաժեշտությամբ, մինչդեռ նպաստում դրա տարածմանը՝ թույլ տալով կոպիտ խախտում»,- նկատեց նա՝ ընդգծելով. «Եթե անգամ վարակի ռիսկ կա, ապա ոստիկանական գործողությունների՝ արդյունքում դրա ռիսկը տասնապատկվում է»։

Բանախոսը նաեւ ուշադրություն հրավիրեց այն հանգամանքի վրա, որ համացանցում տարածված կադրերում կան նաեւ դեպքեր, երբ ոստիկանների պահանջից հետո հեռացող քաղաքացուն հետապնդում են, խախտում սոցիալական հեռավորությունը ու բռնի ուժի գործադրմամբ բերման ենթարկում։

«Եթե խոսում ենք համավարակի կանխարգելման մասին, ապա քաղաքացին արդեն գնում էր, ինչի կարիք կար նրան հետապնելու, որի արդյունքում եւ նրանք ենք վարակվում, եւ վարակի աղբյուր դառնում»,- նշեց նա ու փաստեց, որ այսօրինակ դեպքերը վկայում են, որ ոստիկանական կոշտ ուժի գործադրմամբ լռեցվում է ազատ խոսքը։

«Հաջորդ ամենակարեւոր խնդիրն այն է, որ նոր իշխանությունները հայտարարում են, թե ստեղծում են իրավական պետություն, որ նվազագույնի են հասցնում մինչդատական վարույթի ընթացքում կալանավորումները, բայց պրակտիկայում տեսնում ենք, որ անգամ համաճարակի պայմաններում իրենց ընդդիմախոսներին կալանավորման հարց են բարձրացնում, իսկ այն դատավորները, որոնք համարձակվում են տվյալ պարագայում համավարակով պամյանավորված մերժել կալանավորումները՝ անարգանքի սյունին են գամվում։

«Իրավական ամենաթողության մի օինակ էր նաեւ Միքայել Մինասյանի խափանման միջոցի քննարկումը , որը տեւեց 2։5 ամիս, որպիսի դեպք ոչ միայն իմ պրակտիկայում չի արձանագրվել, այլ ընդհանրապես չեմ հիշում։ Ինչ խնդիր է դրվում նախաքննության ընթացքում կալանավորումը որպես խափանման միջոց ընտրելիս՝ կանխել մեղադրյալի կողմից քննությանը խոչընդոտելը, հնարավոր ապօրինի ներգործությունը, բայց 2,5 ամսվա ընթացքում նախաքննությունը պետք է ավարտվեր, էլ ուր մնաց այդ ընթացքում արդիական լինի կալանավորման անհրաժեշտությունը»,- ասաց

Վ.Հարությունյանը՝ նշելով, որ հենց այդ փաստն արդեն հետապնդման տարրեր է պարունակում»։
«Գնում ենք իրավական անդունդ։ Հետապնդումներն իրար են հաջորդում, այն, ինչ տիրում է Հայաստանում, իրավական այլանդակություն է»,- ընդգծեց մեր զրուցակիցը։

Աղբյուր` Փաստինֆո