Փաստ ինֆո

«Բարգավաճ Հայաստան» կուսակցության ղեկավար Գագիկ Ծառուկյանի նկատմամբ կալանավորումը որպես խափանման միջոց ընտրելու մասին միջնորդության քննությունը մակագրվել է Երևանի ընդհանուր իրավասության դատարանի դատավոր Ռոբերտ Պապոյանին, սակայն դեռևս հայտնի չէ, թե երբ է նշանակվել դատական նիստը։ Այս մասին «Փաստինֆո»-ն տեղեկացավ փաստաբան Էմին Խաչատրյանից։

Նշենք, որ Ռոբերտ Պապոյանը Շենգավիթի նստավայրի դատավորներից է, նրա վարկանիշը հունիսի 17-ի դրությամբ՝ 13 միավոր է։

Փաստաբանը տեղեկացրեց, որ Գագիկ Ծառուկյանին մեղադրանք է առաջադրվել ՀՀ քրեական օրենսգրքի 38-154.2-րդ հոդվածի 2-րդ մասի հատկանիշներով՝ ընտրակաշառք տալու համար։ Խաչատրյանի խոսքով՝ Ծառուկյանն առաջադրված մեղադրանքը չի ընդունում։

«Մեղադրանքն աբսուրդի ժանրից է, որևէ առնչություն չունի մեղադրանքի և քրեական գործերի հետ»,- ասաց փաստաբանը։

Խաչատրյանը նշեց, որ քննիչի միջնորդությունն անհիմն և չփաստարկված է, սակայն, նախաքննական գաղտնիքից ելնելով, այլ մանրամասներ չհայտնեց։ Հարցին, թե արդյո՞ք հասցրել են ծանոթանալ նյութերին, փաստաբանը պատասխանեց, որ ամբողջությամբ դեռևս չեն հասցրել ծանոթանալ, մոտ 150 էջանոց նյութերը ստացել են երեկ։

Հիշեցնենք, որ Ծառուկյանի նկատմամբ հնարավոր հետապնդումների մասին հայտարարվեց այն բանից հետո, երբ նա հունիսի 5-ին քննադատեց իշխանությունների հակամաճարակային գործողությունները նշելով, որ այն տապալել են: Գ.Ծառուկյանը նշել էր, որ ձախողումներ են գրանցվել բոլոր ոլորտներում բարձրացնելով իշխանությունների 100 տոկոսի փոփոխության հարց:Հայտարարությունից հետո մամուլում շրջանառության մեջ դրվեց 1979թ Գագիկ Ծառուկյանին առնչվող խմբակային բռնաբարության գործի մասին նյութերը։ Հունիսի 14-ին Բարգավաճ Հայաստան կուսակցության ղեկավար Գագիկ Ծառուկյանի տանը վաղ առավոտյան խուզարկություն էր իրականացվել: Հունիսի 14-ին Գագիկ Ծառուկյանը հրավիրվել էր հարցաքննության՝ ՊԵԿ նախկին նախագահ Գագիկ Խաչատրյանի գործով։

Հունիսի 15-ին ՀՀ գլխավոր դատախազ Արթուր Դավթյանը միջնորդություն էր ներկայացրել ԱԺ-ին՝ Գագիկ Ծառուկյանին պատգամավորական անձեռնմխելիությունից զրկելու և նրան ազատությունից զրկելու մասին։ Հունիսի 16-ին ԱԺ-ն 87 կողմ ձայնով կողմ է քվեարկել՝ զրկելով Գագիկ Ծառուկյանին անձեռնմխելիությունից և թույլատրելով նրան ազատազրկել։ Նույն օրը Գագիկ Ծառուկյանն ԱԱԾ-ում հարցաքննվում էր արդեն մեղադրյալի իրավունքներով։ Նրան մեղադրանք է առաջադրվել ընտրակաշառքի գործով։

Նշված հոդվածը որպես պատիժ նախատեսում է  տուգանք` նվազագույն աշխատավարձի երկուհազարհինգհարյուրապատիկից երեքհազարապատիկի չափով, կամ կալանք՝ երկուսից երեք ամիս ժամկետով, կամ ազատազրկում` երեքից հինգ տարի ժամկետով:

Դատախազությունն ավելի վաղ հայտարարել էր, թե Գագիկ Ծառուկյանին մեղսագրվում է շուրջ 172 մլն դրամի ընտրակաշառքի բաժանում միայն Գեղարքունիքի մարզում։ «Կազմակերպված խմբի կազմում ընդգրկված անձանց միջոցով ՀՀ ազգային ժողովի 2017թ․ ապրիլի 2-ի ընտրություններին նախորդող ժամանակահատվածում Գագիկ Ծառուկյանի և կազմակերպված խմբի կազմում ընդգրկված անձանց կողմից տրամադրված միջոցների հաշվին քաղաքական կուսակցությունների դաշինքին և դրա կողմից առաջադրված թեկնածուի օգտին քվեարկելու համար ՀՀ Գեղարքունիքի մարզի տարածքի ընտրողներին 17194 քվեի համար տրվել է ընդհանուր 171.940.000 ՀՀ դրամ կաշառք»,- նշված է դատախազության հաղորդագրության մեջ։ Ընդ որում՝ ըստ գլխավոր դատախազի, այս տվյալները ձեռք են բերվել 4 ամիս առաջ, բայց մեղադրանք առաջադրվում է հիմա։

Նկատենք, որ հունիսի 14-ին, երբ Գ.Ծառուկյանի տանը ԱԱԾ-ն կատարում էր խուզարկություն, տարածվեց մի քանի տարբեր հաղորդագրություն՝ 2-3 տարբեր քրեական գործերով Գ.Ծառուկյանի հնարավոր առնչության վերաբերյալ, թեեւ այդ պահին նա դեռ ուներ պատգամավորական անձեռնմխելիություն, իսկ հունիսի 16-ին պարզվեց, որ միայն մեկ քրեական գործով է նրան մ։եղադրանք առաջադրվել։

Հեղինակ՝ Իզաբել Սահակյան

Աղբյուր` Փաստինֆո