Փաստ ինֆո

Ինչու՞ դեռևս չունենք Շրջակա միջավայրի նախարար, ինչպես նաև բնապահպանական և ընդերքի տեսչության նախարար։ Այս մասին ԱԺ-ում վարչապետին հարցրեց «Լուսավոր Հայաստան» խմբակցության պատգամավոր Հրանտ Այվազյանը։

Պատգամավորը նկատեց՝ ոլորտի պատասխանատուներ չունենք, սակայն ունենք բնապահպանական բազմաթիվ խնդիրներ։ Սևանում շարունակվում է ձկնագողությունը, ինչը լուրջ վտանգ է հասցնում ձկնարդյունաբերությանը. «Նախկին նախարարը չեղածից վա՞տն էր, որ հանեցիք ու մինչև հիմա մնում է»։

ՀՀ վարչապետ Նիկոլ Փաշինյանն ասաց, որ պատգամավորի նշած բոլոր հարցերի համար պատասխանատու է ՀՀ կառավարությունը. «Սևանի կանաչման հետ կապված մեր բախտը չբերեց, մեր ժամանակ կանաչեց, բայց հույս ունեմ՝ մեր բախտը կբերի և մեր ժամանակ էլ այլևս չի կանաչի։ Նկատի ունեմ համակարգային խնդիրներ են։ Այս ամբիոնից իր գործունեության համար շնորհակալություն եմ հայտնել Շրջակա միջավայրի նախկին նախարար Էրիկ Գրիգորյանին և կարող եմ ասել, որ նախարարությունը գործում է բնականոն , կա նախարարի պարտականությունները կատարող։ Առաջիկայում կնշանակվի նախարար»,-ասաց Նիկոլ Փաշինյանը։

Պատգամավորն էլ հետաքրքրվեց՝ հնարավո՞ր է հետագայում այն միացնեն այլ նախարարության հետ, վարչապետն անկեղծացավ. «Երբ կառավարության կառուցվածքի փոփոխություններն էինք քննարկում, կար առաջարկ, որ մեր կառավարությունում պետք է լինի 7 նախարարություն։ Այդ առաջարկն ուներ հիմնավորում և այն ժամանակ ուղղակի չքննարկեցինք այդ առաջարկը՝ մտածելով, որ հեղափոխական, հեղափոխական, բայց նույնսիկ մեզ համար չափից ավելի հեղափոխական առաջարկ էր, բայց չի բացառվում, որ վերադառնանք այդ քննարկմանը, մասնավորապես եթե պարզվի, որ դրա արդյունավետությունը հիմնավորված է։ Բայց այս պահին նման պլաններ չկան»,-հավելեց վարչապետը։

Աղբյուր` Փաստինֆո