Փաստ ինֆո

Նմանատիպ համաճարակի պայմաններում բնակչության հետ աշխատանքի յուրահատուկ և արդյունավետ մոտեցումներ պետք է որդեգրվեն, որպեսզի մարդիկ հասկանային պաշտպանիչ միջոցների կիրառման անհրաժեշտությունը: «Փաստինֆոյ»-ի հետ զրույցում հակահամաճարակային գործընթացների մասին ասաց բժիշկ-համաճարակաբան Ռուբեն Հովհաննիսյանը: «Այս օրերին դիմակ չկրելու համար վարչական լծակների կիրառմամբ մարդկանց պատժելը բերում է նրան, որ մարդկանց մոտ հակազդեցություն է առաջանում և իրենք առաջին իսկ առիթի դեպքում հանում են դիմակները, հատկապես այն ժամանակ, երբ վարակման ռիսկը ամենաբարձրն է»։ Համաճարակաբանը օրինակ բերեց բակերն ու հարևանների հետ շփումը: «Վախի մթնոլորտը բերում է որոշակի հակազդեցության: Մարդիկ չեն սիրում, երբ իրենց հետ վախի և սպառնալիքի ձայնով են խոսում։ Դա բերում է բնական հակազդեցության: Այստեղ մարդկանց վարքագծի փոփոխությանը միտված ճիշտ ռազմավարություն որդեգրելը շատ սկբունքային հարց է, որի նկատմամբ անգրագետ մոտեցում է որդեգրել կառավարությունը»,- նշեց նա

Այն դիտարկմանը, թե արդյո՞ք այս պահին պետք է կորոնավիրուսի կանխարգելման, հետևանքների վերացման աշխատանքների կազմակերպման հանգամանքներն ուսումնասիրող քննիչ հանձնաժողով ստեղծել, համաճարակաբանը համաձայնեց:

«Կարծում եմ ՝ այո պետք է: Թերացումներ եղել են, որոնք կապված են միջոցառումների ժամանակին և տեղին կատարելու, իրավիճակի վերլուծության և ըստ դրա ավելի ճիշտ ռազմավարության մշակման, ծախսերի ճիշտ և տեղին վերաբաշխման և առողջապահական համակարգի արդյունավետ կառավարման հետ: Քննիչ հանձնաժողով ստեղծելը կօգնի կողքի հայացքով դիտարկել շատ հարցեր: Նաև պարզ է, որ ցանկացած գերատեսչություն կձգտի թաքցնել իր կատարած սխալները կամ թերացումները»։
Վերջին օրերին ինքնաբուխ հավաքները, որոնք վիրուսի տարածման մեծ ռիսկայնություն ունեն, ըստ Ռուբեն Հովհաննիսյանի երկրի մասշտաբով վիրուսի տարածման գործում մեծ դեր չեն ունենա. «Մեկ-երկու օրվա հավաքները ամբողջ հանրապետության մասշտաբով չեմ կարծում, որ շատ մեծ դեր կունենան: Բնականաբար, մարդկային կուտակումները դեր կունենան: Բայց այն, որ կնպաստի առաջիկա պիկի ավելացմանը դժվարանում եմ ասել»։

Ամենասկզբից կատարված ճիշտ գործողություններն ամենամեծ դերն ունեն: Երկրում վարակի տարածման առաջին օրվանից թույլ տված սխալների մասին խոսելիս՝ Ռուբեն Հովհաննիսյանը նշեց. «Ժամանակին սահմանների փակումը և հատուկենտ դեպքերի հետևից գնալը թույլ կտար վարակի դեմն առնել: Բայց, երբ ժամանակին չես փակում սահմանները և ոչ լուրջ ու ոչ գրագետ մոտեցումներ ես ունենում,դա բերում է նրան, որ վարակը բնակչության լայն շերտերի մեջ է նեթափանցում: Եվ գալիս է մի էտապ, երբ շատ կտրուկ աճ է գրանցվում: Ինչն էլ և մենք նկատեցինք երկրում»:

Աղբյուր` Փաստինֆո