Փաստ ինֆո

Մեր երկիրը խորը ճգնաժամի մեջ է։ Այս մասին այսօր «Պոլիտէկոնոմիա» հետազոտական ինստիտուտի նախաձեռնած «Կորոնավիրուսային ճգնաժամը, դրա հումանիտար և սոցիալ–տնտեսական հետևանքները․ գնահատականներ և լուծումներ» խորագրով քննարկմանն ասաց «Պոլիտէկոնոմիա» հետազոտական ինստիտուտի տնօրեն տնտեսագիտության թեկնածու Անդրանիկ Թևանյանը։

Նրա խոսքով՝ մենք այժմ գտնվում ենք հումանիտար, սոցիալ-տնտեսական, մասնակցային, քաղաքական, արտաքին քաղաքական և լեգիտիմության ճգնաժամի մեջ։

Թևանյանն ընդգծեց, որ 2018թ իշխանափոխությունից հետո Հայաստանի ժողվուրդը հետևողականորեն և ամբողջությամբ դուրս է մղվում որոշումներ կայացնելու գործընթացից։

«Ֆորմալ առումով հայտարարվում է, որ գործ ունենք ժողովրդավարության հետ, ժողովրդի իշխանության հետ, որ ժողովրդի կարծիքն է կարևորը, բայց մեծ հաշվով տեսնում ենք, որ ժողովուրդը դուրս է մղվում քաղաքական որոշումներ ընդունելու գործընթացից »,- ասաց Թևանյանը։
Անդրադառնալով հումանիտար ճգնաժամին՝ Թևանյանն ասաց, որ այն պայմանավորված է կորոնավիրուսով և հայաստանը նախկին ԽՍՀՄ երկրներում արդեն իսկ առաջ է վարակվածների թվով 1 մլն շնչին ընկած քանակով։

«Հայաստանի կառավարությունը ձախողել է հակահամաճարակային պայքարը և փաստացի Հայաստանը կանգնեցրել է հումանիտար աղետի առաջ»,- ասաց նա։

Քաղաքագետն անդրադարձավ նաև արտաքին քաղաքականության ճգնաժամին, որը դրսևորվում է բոլոր խոշոր խաղացողների հետ կամ հարաբերությունների լարվածության աճով, կամ այդ հարաբերությունների սառեցմամբ, մասնավորապես՝ քաղաքագետն անդրադարձավ կորոնավիրուսի ճգնաժամի պայմաններում Վրաստանի հետ հարաբերություններին, երբ այստեղից հայտարարություններ հնչեցին։ Ըստ քաղաքագետի՝ արտաքին քաղաքական ճգնաժամի առումով Հայաստանը մեկուսացման մեջ է։

Ըստ նրա՝ կորոնավիրուսը քաղաքական իշխանությունն օգտագործում է աթոռը պահելու համար, արտակարգ դրությունը գործիք է քաղաքական իշխանության ձեռքում՝ իշխանությունը պահելու համար

Ավելին՝ ըստ նրա՝ այսօր արդեն ունենք իշխանության լեգիտիմության ճգնաժամ։ «Այս իշխանությունը՝ Նիկոլ Փաշինյանի գլխավորած իշխանությունը լեգիտիմ չէ։ Միգուցե լեգալ առումով ընդունելի էր 2018 թվականին՝ հաշվի առնելով հետհեղափոխական էյֆորիան եւ այլ գործոններ, բայց կոմպետենտության ու պրոֆեսիոնալիզմի առումով տապալվելով պետության կառավարման գրեթե բոլոր ոլորտներում՝ կարող ենք ասել, որ այս իշխանությունը լեգիտիմ չէ ու գտնվում ենք լեգիտիմության խորը ճվնաժամի մեջ»,- հայտարարել է քաղաքագետը։

Աղբյուր` Փաստինֆո