Փաստ ինֆո

Հին Հայաստանի ամենավատ ավանդույթների կրողն եք և Դուք պարզապես իրավունք չունեք աշխատել որպես գլխավոր դատախազ, գալու է դրա ժամանակը և մենք դրա համար ամեն ինչ անելու ենք։ Այս մասին ԱԺ-ում ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը՝ դիմելով ՀՀ գլխավոր դատախազ Արթուր Դավթյանին։

«Դուք հասկանու՞մ եք, որ այսօր, երբ մեր երկիրը կանգնած է լրջագույն խնդիրների առաջ, երբ ընդամենը մի քանի ամիս անց հնարավոր է, որ տնտեսական խնդիրների պատճառով մեր ազգաբնակչությունը հայտնվի սովի առաջ, Դուք Ձեր քաղաքական ամբիացիաները բավարարելու և դրանց հագուրդ տալու համար սանձազերծում եք քաղաքական հետապնդում։ Որևէ մեկը կույր չէ․բոլորը շատ լավ են հասկանում, թե ինչ է տեղի ունենում։ Ընդամենը քաղաքական կուսակցության ղեկավարի առողջ քննադատությունից հետո Դուք հարձակվել եք, իշխանությունների ամենաուղղակի հրահանգով, Գագիկ Ծառուկյանի վրա։ Ուզում եք մեզ լռեցնե՞լ, չի ստացվելու, ուզում եք մեզ ասֆալտին փռե՞լ ու պատերին ծեփե՞լ, չի ստացվելու»,- ասաց Տոնոյանը՝ նշելով, որ ոստիկանության ծառայողներն արդեն դա պատգամավորների և հարյուրավոր քաղաքացիների նկատմամբ դա իրականացվել է և որևէ մեկը ծպտուն չի հանել, որովհետև ծպտուն հանելու հրահանգ չի ստացել։

Տոնոյանն ընդգծեց, որ որևէ մեկն արդյո՞ք մեկ րոպե մտածել է, որ Գագիկ Ծառուկյանին ազատությունից զրկելով, հնարավորություն է ընձեռնում զրկել հանապազօրյա աշխատանքից այն մարդկանց,ովքեր աշխատում են Գագիկ Ծառուկյանի հիմնադրած ընկերություններում։
Տոնոյանը նշեց, որ վստահաբար չեն մտածել կամ մտածելու դեպքում էլ պատասխանը չի հուզել, որովհետև նրան այս պահին ունեն միայն մեկ մարդու քաղաքական ամբիցիաները բավարարելու խնդիր։

«Հպարտ քաղաքացիները պետք են ձեզ մենակ այն ժամանակ, երբ դուք հեղափոխություն եք իրականացնում, մնացած բոլոր դեպքերում դուք խորապես թքած ունեք, թե մարդիկ ինչպես կապրեն հատկապես այս պարագայում»,- ասաց Տոնոյանը։

Տոնոյանն ընդգծեց, որ գործ սարքելուց էլ մարդ պետք է մի քիչ շնորհքով դա անի, անգամ այդ գործում են անտաղանդ և ապաշնորհ գտնվել։

«Պարոն Դավթյան, եթե Դուք շարունակեք պաշտոնավարել այն բանից հետո, երբ մենք Ձեզ անվստահություն կհատնենք, երբ եք պատրաստվում խորհրդարան գալ ապօրինի ծխախոտի մաքսանենգության գործով, ադամանդի արտահանման գործով, երկաթի թափոնների ապօրինի արտահանման վերաբերյալ հարուցված քրեական գործերով պատգամավորներին անձեռնմխելիությունից զրկելու հարցով»,- ասաց Տոնոյանը՝ դիմելով Դավթյանին։

Մանրամասները՝ տեսանյութում։

Աղբյուր` Փաստինֆո