Փաստ ինֆո

Այս ամենը շատ կարճ ժամանակից ավարտվելու է։ Պարզապես իմ հորդորն էր գլխավոր դատախազին չդնել իր մասնագիտական և բարոյական վերջակետը խորհրդարանում։ Այս մասին լրագրողների հետ զրույցի ժամանակ ասաց «Բարգավաճ Հայաստան» խմբակցության պատգամավոր Նաիրա Զոհրաբյանը։

Նաիրա Զոհրաբյանի խոսքով գլխավոր դատախազը չներկայացրեց որևէ փաստ, որ Գագիկ Ծառուկյանը X անձի գումար է տվել և ասել, որ գնա ձայն գնի. «Թղթի վրա գրելը դա փաստ չի, փաստաթուղթ չէ։ Սա ծիծաղելի է։ Ցավում եմ, երբ երկիրը գնում է ռեպրեսիաների ճանապարհով, այդ ամեն ինչը կարճ ավարտ է ունենում և ցավում եմ, որ հեղափոխությունը տխուր վախճան է ունենալու։ Անկեղծորեն ես դա չէի ցանկանա։ Մենք բոլորս իսկապես մեծ ոգևորությամբ միացանք այդ ամենին, ողջունեցինք բարեփոխումները և հիմա էլ պատրաստ ենք իրականացնել այդ բարեփոխումները։ Ցավոք սրտի այսօր տեսնում ենք ռեպրեսիա, ձախողում բոլոր ոլորտներում»,-ասաց Նաիրա Զոհրաբյանը։

Հարցին՝ փոշմանել է, որ Նիկոլ Փաշինյանի օգտին է քվեարկել, Նաիրա Զոհրաբյանը նկատեց՝ այն, ինչ եղել է, եղել է և քաղաքականության մեջ փոշմանել տերմինն անընդունելի չէ. «Մի քանի քաղաքական ուժեր համատեղ հայտարարություն են տարածել ստեղծված անընդունելի իրավիճակի հետ կապված։ Հիմա պետք է գնա քաղաքական առողջ ուժերի կոնսոլիդացիա, և մենք մեր երկրում վերջապես պետք է ունենանք օրենքի իշխանություն»,-ասաց Նաիրա Զոհրաբյանը։

Անդրադառնալով ԱԱԾ-ի հայտարարությանը, Նաիրա Զոհրաբյանն ասաց, որ արդեն գլխավոր դատախազին է փոխանցել քրեական գործ հարուցելու մասին դիմումը. «Սա նշանակում է, որ իրենք ինչպես մշտապես այս 13 տարիների ընթացքում բնակվում են իմ հեռախոսի մեջ։ Մտածում էի, որ Նիկոլ Փաշինյանի իշխանության գալուց հետո այս շենքն իր ոտքով, գլխով, ականջներով պետք է դուրս գա հեռախոսիս մեջից, բայց որքան հասկացա գաղտնալսվում է ոչ միայն իմ, այլև իմ մերձավորների հեռախոսները։ Իհարկե նման խոսակցություն չի եղել։ Ես չգիտեմ էդ ինչ կոնտեքստում է ասվել։ Ես կարող է ասել եմ, որ էս ժողովուրդը փաստորեն ընտրակաշառք էր ակնկալում մեզանից, ժողովուրդ ջան չենք տվել, դրա համար քիչ ձայն եք տվել։ Նայելով այդ տեքստը՝ ենթադրում եմ, որ այդ կոնտեքստն է եղել, բայց դա այնքան ծիծաղելի է»,-ասաց պատգամավորը։

Աղբյուր` Փաստինֆո