Փաստ ինֆո

Քիչ առաջ ՀՀ վարչապետ Նիկոլ Փաշինյանը ճեպազրույցի ժամանակ հայտարարեց, որ վաղվանից պարտադիր է լինելու անձը հաստատող փաստաթղթի՝ անձնագրի կամ ID քարտի առկայությունը, որի բացակայության դեպքում քաղաքացին տուգանվելու է։ «Փաստինֆո»-ի հետ զրույցում սահմանադրագետ Գոհար Մելոյանը, անդրադառնալով նման որոշման իրավական լինելուն, ասաց, որ նախևառաջ պետք է դիտարկենք այն տեսանկյունից, թե ինչ իրավական ակտով է այս հարցը կարգավորված լինելու։

Նրա խոսքով այս կարգավորումը հավանաբար սահմանափակումների կոնտեքստում են ցանկանում ներմուծել, ինչն իրավական տեսանկյունից հնարավոր է՝ հաշվի առնելով երկրում հայտարարված արտակարգ դրությունը. «Այսինքն իրավապահ մարմիններին հնարավորություն են տալու քաղաքացիներից պահանջել անձնագիր կամ անձը հաստատող որևէ փաստաթուղթ, սակայն այստեղ կրկին իրավականության և համաչափության դաշտ ենք տեղափոխվում։

Ինչպիսի՞ իրավական կարգով է կարգավորված այդ հարցը։ Քանի որ նույն պարետի որոշումներն իրավական տեսանկյունից խնդրահարույց են։ Ընդհանրապես պարետի որոշումները գլոբալ հարց է։ Պարետը որպես այդպիսի մարմին իրավական ակտերում, օրենսդրության մեջ սահմանված չէ և նրա կողմից ընդունված իրավական ակտերի իրավականությունը բավականին քննարկելի են։ Այսինքն արդյոք իրավասու է ընդունել այդպիսի իրավական ակտեր, թե ոչ, խոսքը գնում է նաև ընդհանրապես մինչ այժմ ընդունած որոշումների մասին։ Դա քննարկման այլ առարկա է, իսկ այս հարցում պետք է անդրադառնանք հիմնավորվածությանը, թե ինչ նպատակով է ներմուծվում տվյալ կանոնակարգումը և կրկին անգամ քաղաքացիների համար լրացուցիչ վարչարարություն ստեղծում»,-ասաց սահմանադրագետը։

Նշենք, որ վարչապետն հայտարարեց՝ այսօր պարետի սահմանած նոր կանոնի համաձայն՝ քաղաքացիների համար պարտադիր կլինի անձը հաստատող փաստաթղթի առկայությունը։ Դիմակ չկրող քաղաքացին կտուգանվի 10 հազար դրամի չափով, իսկ անձը հաստատող փաստաթղթի բացակայության դեպքում տուգանքի չափը կկազմի 10 հազար դրամ։

Աղբյուր` Փաստինֆո