Փաստ ինֆո

ԱԺ պատգամավոր Նաիրա Զոհրաբյանի աշխատասենյակում կատարված խուզարկությունը ոչ իրավաչափ է։ Այս մասին «Փաստինֆո»-ի հետ զրույցում ասաց նրա փաստաբան Դավիթ Ավագյանը։

«Նշված քննչական գործողությունն ակնհայտորեն իրավաչափ չէր, քանի որ խուզարկություն քննչական գործողությունն ինքնին ենթադրում է բովանդակային առումով քրեական հետապնդում՝ տվյալ անձի նկատմամբ, իսկ տիկին Զոհրաբյանն օժտված է պատգամավորի անձեռնմխելիությամբ և նրա անձեռնմխելիությունը հաղթահարված չէր կոնկրետ քննչական գործողությունը կատարելու պահին»,- ասաց փաստաբանը։

Հարցին, թե արդյո՞ք խուզարկության ժամանակ իրեր առգրավել են, փաստաբանը պատասխանեց, որ քննիչներին հետաքրքրող իրեր չեն հայտնաբերել, ըստ այդմ՝ առգրավում չի կատարվել։

Ինչ վերաբերում է խուզարկության թույլտվության վերաբերյալ որոշման դեմ բողոք ներկայացնելուն, Ավագյանը նշեց, որ իր վստահորդի հետ քննարկելուց հետո կորոշեն հետագա քայլերը։

«Դատարանի որոշում եղել է, որը ենթակա է վերաքննության կարգով բողոքարկման, ինչը տիկին Զոհրաբյանի հետ կճշտենք»,- ասաց նա։

Ավելի վաղ տեղեկացրել ենք, որ այսօր առավոտյան ՀՀ ԱԺ «ԲՀԿ» խմբակցության պատգամավոր Նաիրա Զոհրաբյանի աշխատասենյակում խուզարկություն է իրականացվել։ Այդ մասին վաղ առավոտյան տեղեկացրել է Նաիրա Զոհրաբյանը՝ նշելով, որ քննիչը սպառնացել է կոտրել դուռը, եթե ինքն անհապաղ չներկայանա։ Խուզարկության մասին տեղեկատվությունից հետո ԱԱԾ-ն հաղորդագրություն տարածեց՝ հայտարարելով, որ տվյալներ են ձեռք բերվել ընտրակաշառքներին Նաիրա Զոհրաբյանի հնարավոր մեղսակցության վերաբերյալ։ «Ավելին, ձեռնարկված օպերատիվ-հետախուզական միջոցառումներով պարզվել է նաև, որ Նաիրա Զոհրաբյանը նույն համախոհների հետ ունեցած խոսակցությունների ընթացքում բազմիցս ընդունել է այն փաստը, որ «Բարգավաճ Հայաստան» կուսակցությունը նախկին տարիներին անցկացված ընտրություններում անհրաժեշտ քանակի ձայներ կարողացել է ապահովել բացառապես ՀՀ քաղաքացիներին ընտրակաշառք բաժանելու արդյունքում՝ բառացիորեն հայտնելով հետևյալը․ «…պարզվեց՝ ԲՀԿ-ն առանց ընտրակաշառքի Հայաստանում ձեն չունի…պիտի ճշմարտության երեսին նայե՞նք, թե՝ չէ, էտա…, իրականությունը էտա…»:

Խոսակցություններից պարզ է դառնում նաև, որ Զոհրաբյանն ու իր համախոհները ընդունում են, որ հեղափոխությունից հետո ընտրակաշառք բաժանելու միջոցով հաջողության հասնելու մեխանիզմները կիրառելի չլինելու հետևանքով՝ իրենց կուսակցությունն այլևս հնարավորություն չի ունեցել անհրաժեշտ քանակի քվեներ ապահովել»,- նշված է հաղորդագրությունում։

Հեղինակ՝ Իզաբել Սահակյան

Աղբյուր` Փաստինֆո