Փաստ ինֆո

Ես չէի սպասում, որ հեղափոխություն արած ուժը կդառնա հակահեղափոխական։ ԱԺ-ում իր ելույթի ժամանակ այս մասին ասաց «Բարգավաճ Հայաստան» խմբակցության քարտուղար Արման Աբովյանը։

«Այն կարգախոսները, այն լոզունգները, այն նպատակները, որն իրենք հնչեցրեցին և ձեր ուսերի վրա եկան իշխանության, այսօր չեն կատարվում։ Խնդիրը Ծառուկյանի մեջ չէ, որովհետև նա ասել է ճշմարտություն առանց սպառնալիքի, առանց ամպագոռգոռ հայտարարությունների։ Ընդամենը ճշմարտություն, որ ձախողել եք և դրա հիմնական պատճառն այն է, որ մտնելով տաքուկ կաբինետներ, ստանալով ձեր պադավատները, մոռացաք, թե ով է ձեզ բերել իշխանության և հիմա էլ եք մոռացել։ Ես բոլորիդ ճանաչում եմ։ Երկու տարվա ընթացքում տարբեր իրավիճակներ են եղել և կարող եմ կրկնել, որ ձեր մեջ կան մարդիկ, որ բոլորից լավ հասկանում են այսօրվա գործողությունների ապօրինությունը։ Հասկանում են, որ այսօր ձեր ձեռքերով իրականացվում է քաղաքական հակահեղափոխություն։ Շատ եք սիրում խոսել նախկիններից, որ վայ կարող է նախկինները գան, բայց նույնիսկ չեք պատկերացնում՝ որքան եք նման նախկիններին՝ ձեր հայացքներով, պահվածքով, ամեն ինչով»,-ասաց Արման Աբովյանը։

Նրա խոսքով ՀՀ գլխավոր դատախազը ԱԺ ամբիոնից 20 րոպե հեքիաթ է կարդում, որ ինչ-որ մեկն ինչ-որ տեղ ինչ-որ բան է ասում. «Ցույց է տալիս քսերոքսի թուղթ, ասում՝ այ սրա հիման վրա ՀՀ ամենախոշոր ընդդիմադիր ուժի ղեկավարին թույլ տվեք քրեական հետապնդում իրականացնենք։ Այս ամենին զուգահեռում է լկտի և խայտառակ տեղեկատվական գրոհ ձեր կողմից, ձեր կառավարության, նախարարների կողմից։ Երբ ՀՀ առողջապահության նախարարն իր գործը թողած հրապարակում է նախաքննության փաստաթուղթ և այստեղ գլխավոր դատախազը կանգնած ասում է՝ բա նորմալ ա, հիմա նորմալ ա որոշել ենք հրապարակենք։ Բա ինչ գործ ունի անբարո, լկտի պահվածքն էս մի շաբաթվա, ուղիղ ամսի 5-ից հետո»,-նշեց Արման Աբովյանը՝գործընկերներին խորհուրդ տալով դուրս գալ ֆեյսբուքից. «Ժողովուրդ դու՛րս եկեք։ Դուք խոսում եք վեհ գաղափարներից, դրա հետ մեկտեղ գետնին տալով թե՛ անմեղության կանխավարկածը, թե՛ մարդու արժանապատվությունը։ Հասկանու՞մ եք ինչի հետ եք խաղում։ Նախարարներից մեկը՝ բա էսքան գումարով էսքան դպրոց կկառուցեինք։ Փիառաստան եք սարքել Հայաստանը։ Արա հերիք ա, ի՞նչ եք ուզում։ Դուք ուզում եք կառուցել օրինականության երկիր, և բոլոր հանցագործները պետք է պատժվեն։ Պատժեք հանցագործներին, ոչ թե սարքեք մարդկանց գլխին։ Ինչի՞ց եք էդքան վախեցել։ Վախեցաք նրանից, ինչ տեսաք հայելու մե՞ջ, դրանի՞ց եք վախեցել։ Դուք դավաճանության ճանապարհին եք, և այդ դավաճանությունը սկսեց այն պահից հետո, երբ ոստիկանությունը կանանց գետնի վրա քրքարշ տանելով բռնության էր ենթարկում, իսկ ձեր ՀԿ-ները և դուք ուրախ-ուրախ ստատուսներ էիք գրում, որ չի եղել բռնություն, սաղ համաչափ է։ Մոռացել եք ձեզ ոնց էին քարշ տալիս, իսկ միգուցե որ ձեզ քարշ էին տալիս, դիմանալու նպատակը ձեր տաքուկ կաբինետներն էր»,-նշեց Արման Աբովյանը։

Մանրամասները ՝ տեսանյութում

Աղբյուր` Փաստինֆո