Փաստ ինֆո

«Մենք ունենք քրեական հետապնդում իրականացնելու միջնորդություն և այդ միջնորդության ներկայացում՝ երկրորդ քաղաքական ուժի ղեկավարի կողմից հայտնի հայտարարություններն անելուց հետո: Չեմ կարծում, որևէ մեկին կարելի է մեղադրել, երբ որ նրանք բարձրաձայնում են, կամ, երբ պնդում են՝ սա հնարավոր է, ունի քաղաքական հիմքեր»- «Փաստինֆո»-ի հետ զրույցում ասել է իրավաբանական գիտությունների թեկնածու, փաստաբան Արտյոմ Գեղամյանը՝ բնական համարելով քաղաքացիների մոտ թյուրընկալումը։

Արտակարգ դրության սահմանումից հետո կարծես չէր սպասվում, որ հասարակության մի մասը՝ անտեսելով սոցիալական հեռավորություն պահելու հորդորները, հավաքներ կիրականացնի՝ առողջապահական վտանգի ֆոնին: Չնայած այն հանգամանքին, որ մայր օրենքն արգելում է արտակարգ դրության ժամանակ հավաքների իրականացումը, հունիսի 14-ին ընդդիմադիր քաղաքական ուժերից մեկի առաջնորդ Գագիկ Ծառուկյանի տան հետախուզությունը պատճառ դարձավ նրա համախոհների ինքնաբուխ հավաքի՝ նրա հանդեպ քաղաքական հետապնդման պատճառաբանմամբ:

«Արտակարգ դրության ընթացքում ունեցանք մի իրավիճակ՝ հայտնի խուզարկությունից հետո, երբ տեղի ունեցավ ինքնաբուխ հավաք այլ մոտիվացիայով՝ քաղաքական մոտիվացիայով»,- նշեց արդարադատության նախկին փոխնախարարը: Նա կարեւորեց պետական ինստիտուտների նկատմամբ հարգանքի ձեւավորումը՝ նշելով, որ դա ուժեղ պետության կարևորագույն հատկանիշներից մեկն է։ Մեր հասարակության մոտ առկա չէ պետական իշխանությունների նկատմամբ վստահության բավարար մակարդակ, ինչը ըստ նրա գալիս է նաև պետական իշխանության գործունեությունից: Ըստ փաստաբանի, եթե հասարակությունը բավարար վստահություն ունենար պետական կառավարման նկատմամբ, բնականաբար, առերևույթ վստահությամբ կվերաբերվեր գլխավոր դատախազության բերած փաստարկներին: «Ամեն դեպքում ես հակված եմ համբերատար լինել և ավելի շատ վստահել պետական ինստիտուտներին: Պետք է հնարավորություն տալ պետական իշխանության մարմիններին իրականացնել իրենց սահմանադրական և օրենսդրական գործառույթները»,- նշեց նա:

Փաստաբանը նշում է, որ ՀՀ գլխավոր դատախազի ԱԺ ներկայացրած միջնորդության ներկայացումը ԲՀԿ առաջնորդի գործով իրավական գործընթացի առաջին քայլն է միայն: Անձի մեղավորությունը որոշվում է միայն դատարանի կողմից՝ ուժի մեջ մտած օրինական դատավճռով: Որպեսզի որոշվի մեղավորության կամ անմեղության վարկածը, ըստ Արտյոմ Գեղամյանի, պետք է հետաքննական մարմիններին հնարավորություն տալ իրականացնել իրենց գործողությունները: «Հիմա գլխավոր դատախազի միջնորդությունը այդ պրոցեսի սկիզբը կամ այս պրոցեսը սկսելու հնարավորության հայցումն է ԱԺ-ից: Այն պետք է թույլ տա, որպեսզի պատգամավորի նկատմամբ սկսվի քրեական հետապնդում: Մենք գտնվում ենք այդ երկարատև պրոցեսի ամենասկզբնական փուլում:»

Փաստաբանը նաև նշեց, որ պետք է բացառել որևէ միջամտություն քրեական վարույթ իրականացնող մարմինների գործողությունների նկատմամբ:

«Խոսքը վերաբերում է թե ԲՀ կուսակցության ներկայացուցիչներին և թե իշխող քաղաքական ուժի ներկայացուցիչներին: Եվ հենց այդ միջամտության բացակայությունն է, որը կարող է հանգեցնել այդ ինստիտուտների նկատմամբ հասարակության վստահության աստիճանական աճին:»

Նշենք, որ ԱԺ իշխող խմբակցությունն այսօր տվել է իր համաձայնությունը խորհրդարանական երկրորդ ուժի՝ ընդդիմադիր ԲՀԿ-ի առաջնորդ Գագիկ Ծառուկյանի նկատմամբ քրեական հետապնդում հարուցելու ու ազատությունից զրկելու գլխավոր դատախազի միջնորդություններին

Հեղինակ՝ Սուսինա Խաչատրյան

Աղբյուր` Փաստինֆո