Փաստ ինֆո

«Սա և՛ երկրի, և՛ իրավապահ համակարգի ծառայողների համար կործանարար նշանակություն ունի, որովհետև իրավապահ համակարգում որոշակիությունն ու կայունությունը ոչ թե անհրաժեշտ, այլ խիստ պարտադիր պայման է, այսինքն՝ իրավապահ համակարգի օրինական գործունեության երաշխիքը, - «Փաստինֆո»-ի հետ զրույցում ասել է նախկին գլխավոր դատախազ Գևորգ Կոստանյանը՝ անդրադառնալով վերջին օրերին ուժայինների փոփոխության թեմային։ Նա արձանագրեց, որ իրավապահ մարմնի աշխատակիցը պետք է վստահ լինի, որ ինքը, իրականացնելով օրենքով սահմանված իր ծառայողական պարտականությունները, շարունակելու է իր ծառայությունը:

Իսկ երբ հապշտապ փոփոխություններ են տեղի ունենում, սա խոսում է երկու բանի մասին, առաջին հերթին՝ պաշտոնին նշանակող սուբյեկտի, տվյալ դեպքում վարչապետի գործունեության և գործողությունների անկանխատեսելիության մասին, ինչը երկրի կառավարման տեսակետից ուղղակի կործանանար նշանակություն ունի և երկրորդ հերթին՝ սա խոսքում է իրավապահ համակարգի քաղաքականացված լինելու աստիճանի մասին: Ստացվում է, որ տարիների ընթացքում արվել է ամեն ինչ, որպեսզի ԱԱԾ-ն ու Ոստիկանությունն առնվազն չքաղաքականացվեն, բայց այս հապճեպ և անհիմն փոփոխությունները մեխանիկորեն հանգեցնում են նրան, որ մենք գործ ունենք այդ երկու համակարգերի քաղաքական քաղաքականացվածության մասին: Արդյունքում, երկրում տեղի է ունեցել հետևյալ իրողությունը՝ մենք ունեք իշխանության կուսակցականացում և իրավապահ համակարգի քաղաքականացում»:

Թե որակական առումով ի՞նչ հետք կարող են թողել իրավական համակարգի հետագա գործունեության վրա այսօրինակ զարգացումները ՝ մասնավորապես երիտասարդ ղեկավարի գլխավորությամբ՝ ԱԱԾ համակարգի պարագայում, Գևորգ Կոստանյանը նշեց, որ չի նախընտրում անձնավորված խոսել, բայց ստեղծված իրականությունն ամենաքիչը զարմացրել է իրեն. «Բոլոր ռազմականացված կառույցներում (և ոչ միայն Հայաստանում) չափազանց կարևոր նախապայման է հաջորդականության պահպանումը: Այսինքն, խիստ օրինաչափ է, երբ ինչ- որ մեկն այդ համակարգում աստիճանակարգված պաշտոնավարումների արդյունքում հասնում է տվյալ համակարգի ղեկավարի պաշտոնին, որպեսզի համակարգը նրան ընդունի և, որպեսզի ինքը ծանոթ լինի համակարգի գործունեության առանձնահատկություններին: Սա՝ բարոյական և կազմակերպչական առումով: Բովանդակային առումով, անկեղծ եմ ասում, ես չեմ պատկերացնում, թե կոնկրետ այսօրվա ԱԱԾ ղեկավարն ի՞նչ ձևով կկարողանա իրականացնել իր լիազորություններն՝ առնվազն հետախուզության և հակահետախուզության գործառույթների տեսակետից։ Իրականում, Ազգային Անվտանգության Ծառայության հիմնական գործառույթը ոչ թե կոռուպցիայի դեմ պայքարն է, կամ ՀԴՄ- ներ չտալու դեպքերի բացահայտումը, այլ հիմնականում հետախուզության և հակահետախուզության գործառույթի իրականացումը, այդ թվում նաև՝ կիբերհանցագործությունների կանխումը: Ասածիս լավագույն օրինակն ընդամենը օրեր առաջ տեղի ունեցած խիստ անթույլատրելի բացթողումն էր, երբ ադրբեջանական հաքերները կարողացան կոտրել և տիրանալ ՀՀ քաղաքացիների անձնական գաղտնիք հանդիսացող տեղեկություններին։ Փաստացի, Ադրբեջանի հաքերները կարողացել են տիրանալ ՀՀ-ի կողմից պաշտպանվող խիստ գաղտնի տեղեկատվությանը: Ավելորդ է ասել, որ սա նույնպես կործանարար է՝ ինչպես Ազգային Անվտանգության Ծառայության հեղինակության, այնպես նաև ՀՀ անվտանգության տեսակետից։ Ի վերջո, այս ամենը կարող է իրապես կործանանար հետևանքներ ունենալ պետության համար և այս մասին մտահոգվելու խիստ անհրաժեշտություն կա»։

Հեղինակ՝ Նվարդ Մանվելյան

Աղբյուր` Փաստինֆո