Փաստ ինֆո

Քննարկել ենք ԱԺ քառօրյայի օրակարգը, իհարկե նաև անդրադարձ է եղել դատախազի միջնորդությանը, որի հետ կապված խմբակցությունը կայացրել է որոշում։

Այս մասին «Իմ քայլի» նիստից հետո լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը՝ նշելով, որ իրենց դիրքրոշումը կհայտնեն վաղը՝ դատախազի ելույթից հետո փակ, գաղտնի քվեարկությամբ։

Լիլիթ Մակունցն ընդգծեց, որ դատախազությունն իրավական հիմքով է ներկայացրել միջնորդությունը, և հարցը պետք է դիտարկել հենց այդ տիրույթում ու որևէ կերպ քաղաքական երանգ չպետք է տալ. «Մենք այն մարմինը չենք, որ քննում են գործեր։ Իրավապահ մարմինները պետք է այդ գործերը քննեն և բոլոր փաստարկները, հիմքերը համադրելու արդյունքում տան վճիռ»,-ասաց Լիլիթ Մակունցը։

Դիտարկմանը՝ երբ երկու տարի առաջ հուշագիր էին ստորագրում, չգիտեին, որ Գագիկ Ծառուկյանն ընտրակեղծարար է, լիցենզիա չունեցող խաղատներ ունի, Լիլիթ Մակունցն ասաց. «Ենթադրում եմ նկատի ունեք վարչապետի և Գագիկ Ծառուկյանի հանդիպման մասին։ Դա եղել է արտահերթ խորհրդարանական ընտրություններ անցկացնելու համաձայնության մասին, որտեղ Գագիկ Ծառուկյանը հայտնել է իր պատրաստակամությունը՝ սատարելու հեղափոխությունը մինչև վերջ հասցնելու»,-ասաց Լիլիթ Մակունցը։

Աղբյուր` Փաստինֆո