Փաստ ինֆո

«Բարգավաճ Հայաստան» կուսակցության ղեկավար Գագիկ Ծառուկյանը շուրջ 8 ժամ ԱԱԾ-ի քննչական դեպարտամենտում գտնվելու ընթացքում իրեն առնչվող երեք քրեական գործերով առհասարակ չի հարցաքննվել։ Այս մասին «Փաստինֆո»-ի հետ զրույցում ասաց փաստաբան Էմին Խաչատրյանը։

Նրա փոխանցմամբ՝ Գագիկ Ծառուկյանը հարցաքննվել է ՊԵԿ նախկին նախագահ Գագիկ Խաչատրյանի ու նրա որդիներին վերաբերող քրեական գործով։ Փաստաբանը տեղեկացրեց, որ Գագիկ Ծառուկյանը նախկինում որևէ ծանուցում չի ստացել և իր ունեցած տեղեկություններով՝ Գագիկ Խաչատրյանին առնչվող քրեական գործով եւս նախկինում չի հարցաքննվել։

Փաստաբանը նշեց, որ վարույթն իրականացնող մարմինը որոշակի հարցադրումներ ուներ և գտնում է, որ Գագիկ Ծառուկյանն այդ հարցադրումներին սպառիչ և բովանդակալից պատասխան է տվել։

Ինչ վերաբերում է Գագիկ Ծառուկյանի վերաբերյալ ընտրակաշառքի գործին, որի մասին այսօր տեսանյութ էր հրապարակել ԱԱԾ-ն, ապա փաստաբանը նշեց, որ նա այդ գործով չի հարցաքննվել՝ պնդելով, որ Գագիկ Ծառուկյանը որևէ առնչություն չունի։

«Ինչ-որ փաստաթուղթ են հրապարակում, պատճեն է, թե ոչ։ Պետք է պարզել, թե այդ ինչ փաստաթուղթ է, որտեղից, արդյո՞ք այդ փաստաթղթում նշված անուն- ազգանուններն իրական են, թե ոչ։ Թեև համոզված ենք, որ նման բան հնարավոր չէ, բայց պետք է նաև պարզել, թե արդյո՞ք որևէ մեկը ցուցմունք է տվել, որ նա որևէ առնչություն է ունեցել գործի հետ»,- ասաց փաստաբանը։

Բացի այդ՝ փաստաբանն ընդգծեց, որ քրեական գործը հարուցվել է մոտ չորս ամիս առաջ և որևէ հանգամանք, որը կարող է ապացուցել նրա առնչությունը սույն գործին, չկա։

Նա նշեց, որ Գագիկ Ծառուկյանի տանն իրականացվող խուզարկությունը կատարվել է ընտրակաշառքի վերաբերյալ քրեական գործի շրջանակներում։ Դիտարկմանը, որ Գագիկ Ծառուկյանին առնչվող երեք տարբեր քրեական գործերի վերաբերյալ ԱԱԾ-ն հաղորդագրություններ է տարածել, սակայն վերջինս հարցաքննվել է բոլորովին այլ քրեական գործով, փաստաբանն արձագանքեց․ «Ի սկզբանե, երբ ասացին, որ այդ գործով պետք է հարցաքննվի, ինձ համար փոքր-ինչ զարմանալի էր, որովհետև խուզարկությունից հետո առաջարկեցին կամ հրավիրեցին, ասացին, որ անհրաժեշտություն կա գնալու ԱԱԾ քննչական դեպարտամենտ և որոշակի հարցերի պատասխանելու։

Պարոն Ծառուկյանը որևէ հարցի պատասխանելուց չի խուսափում և չի էլ խուսափել և որպես ԱԺ պատգամավոր և ՀՀ քաղաքացի,անձը չմերժեց առաջարկը, գնացինք դեպարտամենտ և հարցաքննության մասնակցեցինք այդ գործով։ Որևէ խնդիր չեմ տեսնում և պատրաստակամ ենք նաև հրավերի դեպքում մնացած այլ՝ երեք գործերով մասնակցել հարցաքննության և փորձենք համապարփակ պատասխան հնչեցնել նաև այդ հարցերին։Այս պահին հրավեր չկա»։
Ինչ վերաբերում է Գագիկ Ծառուկյանի առանձնատան խուզարկության ժամանակ անձնական իրերը նկարահանելուն և տեսանյութը տարածելուն, փաստաբանը նշեց, որ Գագիկ Ծառուկյանը չի առարկել, որ խուզարկության ժամանակ լինի նաև տեսագրությունը։

«Թափանցիկության համար, ինչպես նաև մեր պնդումները հիմնավորելու համար, որ Գագիկ Ծառուկյանը որևէ խոչընդոտ որևէ քրեական գործի քննության համար չի առաջացնում։ Իհարկե, մեզ համար ինչ-որ տեղ անընդունելի է նման մանրամասնությամբ նկարահանումը, բայց, այնուամենայնիվ պարոն Ծառուկյանը չառարկեց և թույլատրեց, որ խուզարկության ժամանակ լինի նաև այդ տեսագրությունը։ Դա ևս մեկ անգամ հիմնավորում է, որ պարոն Ծառուկյանը որևէ կերպ որևէ քրեական գործի վրա չի ցանկանում ազդեցությունն ունենալ, թողնում է, որ բազմակողմանի, լրիվ և օբյեկտիվ քննություն իրականանա, եթե, իհարկե, կարող ենք այս պայմաններում ակնկալել բազմակողմանի և լրիվ քննություն »,- ասաց փաստաբանը՝ հավելելով, որ դիմումներ է ներկայացվել ԱԱԾ՝ քրեական գործ հարուցելու որոշումների պատճենները ստանալու համար, ինչպես նաև՝ դատարան է ներկայացվել դիմում՝ խուզարկության մասին որոշումը ստանալու համար և, եթե գտնեն, որ դա բողոքարկման ենթակա է, կբողոքարկեն։

Հիշեցնենք, որ Ծառուկյանի նկատմամբ հնարավոր հետապնդումների մասին հայտարարվեց այն բանից հետո, երբ նա հունիսի 5-ին քննադատեց իշխանությունների հակամաճարակային գործողությունները նշելով, որ այն տապալել են: Գ.Ծառուկյանը նշել էր, որ ձախողումներ են գրանցվել բոլոր ոլորտներում բարձրացնելով իշխանությունների 100 տոկոսի փոփոխության հարց:Հայտարարությունից հետո մամուլում շրջանառության մեջ դրվեց 1979թ Գագիկ Ծառուկյանին առնչվող խմբակային բռնաբարության գործի մասին նյութերը։ Հունիսի 14-ին Բարգավաճ Հայաստան կուսակցության ղեկավար Գագիկ Ծառուկյանի տանը վաղ առավոտյան խուզարկություն էր իրականացվել:

Այնուհետև՝ Գագիկ Ծառուկյանը ներկայացել է ԱԱԾ՝ հարցաքննության:Գագիկ Ծառուկյանին առնչվող քրեական գործերից մեկը վերաբերում է նրան պատկանող խաղատանը լիցենզավորմանը ,մասնավորապես՝ 2014 թվականից 2020 թվականներն ընկած ժամանակահատվածում իրականացրել են խաղատան և շահումով խաղերի կազմակերպման լիցենզավորման ենթակա գործունեություն, որի արդյունքում պետությանը պատճառվել է առանձնապես խոշոր չափերի՝ 29.750.000.000 ՀՀ դրամի վնաս: Երկրորդ քրեական գործը վերաբերում է 2017թ ապրիլի 2-ին կայացած ընտրությունների ընթացքում ընտրակաշառք բաժանելու դեպքերին, երրորդը՝ հողերի օտարմանը։

Հեղինակ՝ Իզաբել Սահակյան

Աղբյուր` Փաստինֆո