Փաստ ինֆո

Կարող ենք փաստել, որ ժամանակագրորեն այն, ինչ կատարվեց, քաղաքական ազդեցության և միջամտության հետևանք է իրավական գործընթացին։ «Փաստինֆո»-ի հետ զրույցում այս մասին ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը՝ անդրադառնալով երեկ ԲՀԿ առաջնորդ Գագիկ Ծառուկյանի նկատմամբ իրականացված գործընթացներին։

Պատգամավորը գտնում է, որ այս գործընթացները սկսվեցին այն ժամանակ, երբ «Բարգավաճ Հայաստան» խմբակցությունը սկսեց սրել իր հռետորաբանությունը. «Մենք հեռու ենք այն մտքից, որ երկու օրվա մեջ ինչ-որ փաստեր ծագեցին, որ «Բարգավաճ Հայաստան» խմբակցության ղեկավարին կարելի է կանչել իրավական պատասխանատվության։ Եթե կատարվել են հանցագործություններ, մեղավորները պետք է պատժվեն, բայց միևնույն ժամանակ նաև այս իրավական գործընթացների վրա տեսնում ենք իշխանության քաղաքական միջամտությունը, ինչը մեզ համար անթույլատրելի է»,-ասաց Անի Սամսոնյանը՝ նշելով, որ իշխանությունն այսօր գործում է քաղաքական նպատակահարմարությամբ։

Անի Սամսոնյանը կարծում է՝ եթե իշխանության նպատակն իրավունքի և օրենքի գերակայությունն է, ապա այս իրադարձությունները կարող էին տեղի ունենալ շատ ավելի շուտ. «Եթե նպատակը դա չէ, ապա մենք փաստում ենք, որ իշխանությունն այսօր գործում է նախկինների պես։ Կան կոմպրոմատներ, որոշակի փաստեր, բայց դրանք ի հայտ են գալիս և իրավական գործընթացներ են դառնում այն ժամանակ, երբ այդ մարդիկ որպես ընդդիմախոս սկսում են հակառակվել իշխանությանը։ Սա խոսում է իշխանության անազնիվության մասին»,-ասաց Անի Սամսոնյանը։

Վերջինս նկատեց՝ երբեմն տպավորություն է, որ այն պայքարը, որն իշխանությունը որոշել է իրականացնել կոռուպցիայի, հանցագործությունների դեմ տեղի է ունենում ընտրողաբար և հատվածական, այսինքն այն պահին, երբ իրենց անհրաժեշտ է։

Հեղինակ՝ Հասմիկ Կոշկարյան

Աղբյուր` Փաստինֆո