Փաստ ինֆո

«Ի շնորհիվ գրագետ իրավապաշտպանների և պատկան մարմինների իրավագիտակցության, չեմ հիշում, թե վերջին անգամ երբ էին ապօրինի հավաքի մասնակից լինելու մեղադրանքով մարդկային հոծ զանգվածներ ձերբակալվել, այն, ինչին մենք ականատես եղանք երեկ», - «Փաստինֆո»-ի հետ զրույցում ասել է Հայաստանի առաջին ՄԻՊ Լարիսա Ալավերդյանը՝ արձանագրելով, որ «ապօրինի հավաք» հասկացողությունն ի սկզբանե հակաիրավական ձևակերպում է, այսինքն՝ այդպիսի հասկացություն մարդու իրավունքների մեջ ուղղակի չկա։ 

«Այն, ինչ դրված է այդ հասկացողության տակ, իրականում վերաբերում է այնպիսի խախտումներին, որոնք սահմանադրական կարգի կամ ազգային անվտանգության տեսակետից սպառնալիք են ներկայացնում։ Այնինչ, ո՛չ մեկը, ո՛չ մյուսը տվյալ դեպքում բացարձակ չէր համապատասխանում երեկ տեղի ունեցած դեպքերին։ Հետևաբար, խնդիրն այստեղ ոչ թե իրավական կամ իրավաբանական է, այլ ավելի շատ քաղաքական», - ասաց իրավապաշտպանը,- «իհարկե, ես այդ դաշտում ամենագիտակը չեմ, բայց, դատելով դեպքերի հաջորդականություններից, այս ամենն ի պատասխան Գագիկ Ծառուկյանի հայտարարության էր, այսինքն՝ նրա կողմից որդեգրած ընդդիմադիր կեցվածքի։ Այդ իսկ պատճառով, մենք կարող ենք հստակ արձանագրել, որ սա հին մեթոդ է՝ դարակներում դոսիեների տեսքով մեղադրանքներ հավաքելն ու ամենահարմար պահին դրանք հրապարակելը»։

«Փաստինֆոյի» այն դիտարկմանը, թե նույն՝ ապօրինի հավաքներ կազմակերպելու մեղադրանքով ժամանակին Նիկոլ Փաշինյանին և հեղափոխություն իրականացնող նրա համակիրներին էին բերման ենթարկում, որը, սակայն, խիստ քննադատության էր արժանանում հենց այսօրվա վարչապետի կողմից, Լարիսա Ալավերդյանը պատասխանում է. «Երբ վերևում ասացի, որ վաղուց նման դեպք չէի հիշում, հենց դա նկատի ունեի։ Ստացվում է, որ վերջին երկու տարվա ընթացքում, նախկին արմատական ընդդիմությունը՝ Նիկոլ Փաշինյանի գլխավորությամբ, որդեգրել է իր կողմից մերժված իշխանությունների վարքագծի ամենադատապարտելի դրսևորումները։ Պատահական չէր, որ այն ժամանակ իրավապաշտպանության ոլորտից շատ շատերն օգնում և օժանդակում էին նրան, և հենց այստեղ է, որ ուզում եմ Նիկոլ Փաշինյանին հիշեցնել հետևյալը՝ այն, ինչ տեղի է ունեցել՝ լինի իշխանափոխություն կամ ինձ համար ոչ ընդունելի անվանումով՝ հեղափոխություն, ի վերջո ժողովրդի շնորհիվ է իրողություն դարձել, այն ժողովրդի, որին երեկ Նիկոլ Փաշինյանի իշխանությունը մասսայաբար բերման էր ենթարկում և բիրտ ուժի կիրառմամբ ոստիկանական բաժանմունքներ տեղափոխում։ Ստացվում է, որ Նիկոլ Փաշինյանն ինչ ցանկանա, կարող է անել այն ժողովրդի նկատմամբ, ով ընտրել և իշխանություն է վստահել նրան, այնինչ, սա պարզապես անթույլատրելի և դատապարտելի վարքագիծ է»։

Հեղինակ՝ Նվարդ Մանվելյան 

Աղբյուր` Փաստինֆո