Փաստ ինֆո

Կարո՞ղ է արդյոք իր մասնագիտական գործունեությունն իրականացնող իրավապաշտպանը ոստիկանական անօրինականությունների զոհ դառնալ՝ հարցի պատասխանն ակներեւ էր հունիսի 14-ին, երբ բռնի ուժ գործադրվեց հայտնի իրավապաշտպան, Արցախի նախկին ՄԻՊ Ռուբեն Մելիքյանի նկատմամբ։

«Եկեք հասկանանք, որ և՛ այդ գործողություններն իրականացնողները, և՛ Ռուբեն Մելիքյանը, երկուստեք, շատ լավ հասկանում էին, որ դա ոչ միայն իրավաչափ գործողություն չի, այլև հակաօրինական է։ Բայց դա տեղի է ունեցել, և հիմա հարց է ծագում՝ ինչո՞ւ։ Որովհետև դա վախի մթնոլորտ ստեղծելու գործուն և արդյունավետ տարբերակ է՝ ցույց տալու համար, որ նույնիսկ իրավապաշտպանության ոլորտի փայլուն դեմքերից մեկը կարող է բերման ենթարկվել ոստիկանության բաժանմունք։

Չմոռանանք, որ Արցախի ՄԻՊ աշխատելու տարիներին Ռուբեն Մելիքյանը ոչ միայն չքնաղ աշխատանք կատարեց, այլև եղավ առաջինը, ով Արցախի անունից ելույթ ունեցավ եվրոպական խորհրդարանում։ Սա շատ լավ հասկանալով, իշխանություններն ուզում են ցույց տալ, որ կարող են հակաիրավական գործողություններ կատարել անգամ այնպիսի փայլուն իրավաբանի նկատմամաբ, ով հիանալի տիրապետում է այն իրավիճակին, որում հայտնվել է, ու կարող է փայլուն կերպով պաշտպանել իր իրավունքները։ Այստեղ ես ակամա հիշում եմ ՀՀՇ-ի ժամանակների՝ «մեր դեմ խաղ չկա» կարգախոսը։ Ցավով պետք է նկատենք, որ արատավոր պատմությունն՝ իր խայտառակ էջերով նորից կրկնվում է»,- «Փաստինֆո»-ի հետ զրույցում ասաց ՀՀ առաջին օմբուդսմեն Լարիսա Ալավերդյանը։

Ի պատասխան «Փաստինֆո»-ի այն դիտարկմանը, որ երեկ տեղի ունեցած հայտնի իրադարձությունների ընթացքում ոստիկանական բիրտ ուժի բացահայտ կիրառում դրսևորվեց նաև ԱԺ պատգամավորների նկատմամբ, իրավապաշտպան Լարիսա Ալավերդյանը պատասխանեց. «Սա խոսում է այն մասին, որ իշխանության եկած քայլող այս խմբի համար միայն մեկ օրենք գոյություն ունի՝ ուժի կիրառման օրենքը, այլ կերպ ասած՝ «Сила есть – ума не надо»։

Այն, ինչին ականատես եղանք երեկ, ռեպրեսիվ, քաղաքական հետապնդումներ իրականացնող և ամբողջովին հակաիրավական ու անօրինական գործողությունների մի քամբողջ համակարգ էր։ Ես շատ կցանկանայի, որ այս ամենը չսահմանափակվեր միայն իմ կամ այլոց մեկնաբանություններով։ Այդ բոլոր գործողությունները, պետական օրենսդրության սահմաններում իրավաբանական հետևանքներ պետք է ունենան, նույնիսկ եթե անգամ նրանք հրահանգ էին կատարում, այդ գործողություններն անձնական պատասխանատվություն են նախատեսում»։

Ո՞ւր է տանում, ի վերջո, իշխանությունների որդեգրած այս քաղաքականությունը հարցին Լարիսա Ալավերդյանը պատասխանում է. «Գիտե՞ք, ես լավ չեմ պատկերացնում իշխանության եկած այս քայլողների մտքինը, բայց, կարծում եմ սա, նախևառաջ երկրի և պետության համար շատ մեծ վտանգներ պարունակող իրավիճակ է։ Հատկապես ազգային անվտանգության տեսակետից սա սպառնալիք է՝ մարդու իրավունքների, ինչպես նաև իրավական անվտանգությունը։
Նվարդ ՄԱՆՎԵԼՅԱՆ

Աղբյուր` Փաստինֆո