Փաստ ինֆո

Վերաքննիչ քրեական դատարանը՝ դատավոր Արսեն Նիկողոսյանի նախագահությամբ որոշեց շարունակել Ռոբերտ Քոչարյանի խափանման միջոցի գործով դատական նիստը՝ արձանագրելով, որ խափանման միջոցի հարցը ենթակա է անհապաղ քննարկման։ 

«Փաստինֆո»-ի հաղորդմամբ՝ նիստը հետաձգելու համար դատարանին գրությամբ դիմել էր հանդես էր տուժողների իրավահաջորդների ներկայացուցիչ Տիգրան Եգորյանը։ Գործով նախագահող դատավորը հայտնեց, որ գրությունն ,ստացել են նիստի մեկնարկից առաջ։ Ի հիմնավորում նիստի հետաձգման՝ փաստաբանը նշել էր, որ նիստի մասին ծանուցվել է հեռախոսազանգի միջոցով, որ իրենց չի տրամադրվել բողոքի նմուշը։

Դիմելով կողմերին՝ դատավորը հետաքրքրվեց, թե ինչ դիրքորոշում ունեն կողմերը։ Պաշտպան Հայկ Ալումյանը նշեց, որ անձի ազատության վերաբերյալ հարցի քննությունը գտնվում է հետևյալ հարթությունում՝ դատարանը քննարկում է մի կողմից հանրային շահը, որ անձը որոշակի ժամանակ գտնվի անազատության մեջ, մյուս կողմից՝ ազատության մեջ գտնվելու իրավունքը և դատարանը քննարկում է մեկ հարց՝ արդյո՞ք տվյալ դեպքում գերակայում է հանրային շահը, թե հակառակը։ Ալումյանը նշեց, որ տվյալ դեպքում տուժող կողմն իրավաչափ շահ չունի։

Մեղադրող Գևորգ Բաղդասարյանն էլ նշեց, որ քննարկվելու է վարույթի պատշաճ ապահովման հարց, ուստի՝տուժող կողմը պետք է իրացնի իր իրավունքը։
Դատարանը, լսելով կողմերի դիրքորոշումը, արձանագրեց, որ խափանման միջոցի վերաբերյալ նիստերի մասին կողմերը ծանուցվել են հեռախոսով՝ դրանց քննարկումն անհապաղ կազմակերպելու համար ու որոշեց նիստը շարունակել՝ որոշակի ծավալ քննարկելով։

Հիշեցնենք, որ պաշտպանական կողմը ներկայացրել էր Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։ Ռոբերտ Քոչարյանի համար անձնական երաշխավորություն են ներկայացրել Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։ Մայիսի 13-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, մերժեց միջնորդությունները,որի դեմ պաշտպանական կողը վերաքննիչ բողոք է ներկայացրել։ Մայիսի 22-ին բողոքը մակագրվել էր Վերաքննիչ քրեական դատարանի դատավոր Արմեն Դանիելյանին, ով դատավորների շրջանում ունի ամենացածր՝ -20 վարկանիշը։ Նշենք, որ Արմեն Դանիելյանը այն դատավորն է, որը բեկանել էր Երևանի ընդհանուր իրավասության առաջին ատյանի դատավոր Դավիթ Գրիգորյանի՝ Ռոբերտ Քոչարյանին 2019թ. մայիսի 18-ին ազատ արձակելու և մայիսի 20-ին Ռոբերտ Քոչարյանի և մյուսների գործով գործի վարույթը կասեցնելու և ՍԴ ուղարկելու մասին որոշումները։ Բացի այդ՝ նա նաև բեկանել է Ռոբերտ Քոչարյանի պաշտպանական թիմին «Մարտի 1»-ի մայր գործով գործի նյութերը տրամադրելու մասին Երևանի ընդհանուր իրավասության դատարանի որոշումը։ Արմեն Դանիելյանին բողոքի մակագրումից հետո Ռոբերտ Քոչարյանի պաշտպանները ետ են վերցրել վերաքննիչ բողոքները՝ գտնելով, որ Արմեն Դանիելյանը չի կարող Ռոբերտ Քոչարյանի գործով դատարան լինել։ Հունիսի 1-ին պաշտպան Հովհաննես Խուդոյանը նոր բողոքներ է ներկայացրել վերաքննիչ դատարան։ Հունիսի 8-ին բողոքները մակագրվել են Վերաքննիչ քրեական դատարանի դատավոր Արսեն Նիկողոսյանին։

Հեղինակ՝ Իզաբել Սահակյան

Աղբյուր` Փաստինֆո