Փաստ ինֆո

Ոստիկանությունն անորոշ հայտարարություն արեց առանց անուն նշելու։ Հավաքը եղել է ինքնաբուխ։ «Փաստինֆո»-ի հետ զրույցում այս մասին ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառնալով երեկ՝ հունիսի 14-ին, ԱԱԾ շենքի մոտ կազմակերպված հավաքի առթիվ հարուցված քրեական գործին։

Նշենք, ԱԱԾ շենքի մոտ կազմակերպված մի խումբ անձանց կողմից օրենքով սահմանված կարգի խախտմամբ դիտավորությամբ հավաք կազմակերպելու և անցկացնելու դեպքի առթիվ ՀՀ քրեական օրենսգրքի 225.1-րդ հոդվածի 1-ին մասի հատկանիշներով քրեական գործ է հարուցվել։

«Որևէ մեկը հավաք չի կազմակերպել, հետևաբար ոստիկանության հայտարարությունը հավաք կազմակերպողներին, ուղղակի անհիմն է։ Ոչ մեկ չի կազմակերպել որևէ հավաք։ Թող որևէ մեկն ապացուցի, որ անձամբ որևէ պատգամավոր մեկին տարել է հավաքի։ Ժողովուրդը, լրատվամիջոցներից իմանալով այդ մասին, իր կամքով, ինքնաբուխ հավաքվել է, որևէ մեկը հավաք չի կազմակերպել»,-ասաց Գևորգ Պետրոսյանը։

Դիտարկմանը, որ ԱԺ փոխխոսնակ Ալեն Սիմոնյանը նշում է սոցցանցերում հայտնված տեղեկատվության, այդ թվում սքրինշոթերի մասին, որոնցից պարզ է դառնում, որ Գագիկ Ծառուկյանին պատկանող ընկերությունների աշխատակիցներին կոչ են անում հավաքվել այնտեղ, ներկա գտնվեն, պատգամավորն ասաց, որ սա բացարձակապես իրականությանը չի համապատասխանում. «Ալեն Սիմոնյանն իր բանուգործը թողած փոխանակ մի հատ օրենքի նախագիծ հեղինակի, ընկած է բանսարկություններ անելու հետևից։ Ոնց կարող է նման բան լինել, եթե ԱԱԾ-ն վաղ առավոտից խուզարկություն էր իրականացնում Գագիկ Ծառուկյանի առանձնատանը։ Էդ մարդը ոչ տնից դուրս է եկել, ոչ հեռախոսային կապից է օգտվել։ Ո՞նց կարող է նման բան լինել։ Ալեն Սիմոնյանը թող հիշի՝ ինչ է աշխատում և ում շնորհիվ է հայտնվել այդտեղ։ Որևէ մեկը որևէ մեկին չի զանգել, ասել։ Նրանց ուզածն այն է, որ ԲՀԿ-ին չեզոքացնեն քաղաքական դաշտից, բայց եթե անգամ ԲՀԿ-ն քաղաքական դաշտից չեզոքանա, նրանք ընդհանրապես Հայաստանից են չեզոքանալու, որովհետև հայ ժողովուրդը նման կերպարներ չի հանդուրժում»,-ասաց պատգամավորը։

Անդրադառնալով քաղաքական իշխող ուժի՝ երեկ պատգամավորների նկատմամբ ոստիկանների գործողությունների վերաբերյալ գնահատականներին, Գևորգ Պետրոսյանն արձագանքեց. «Ինչպես են օրինական համարում, որ ոստիկանն օրինակ հարվածել, վնասել է մեր պատգամավորներից Կարինե Պողոսյանի թևը։ Ո՞նց են օրինաչափ համարում, մի քիչ ամոթ է պետք ունենալ»։

Ինչ վերաբերում է «Իմ քայլը» խմբակցությունների այն պնդմանը, որ այս քրեական գործերը կային նախքան Գագիկ Ծառուկյանի հայտարարությունը, Գևորգ Պետրոսյանը նկատեց՝ եթե Գագիկ Ծառուկյանը նման հայտարարությամբ հանդես չգար, որևէ քրեական գործի մասին այսպիսի աղմկոտ իրադարձություններ չէին ծավալվի. «Սրանով վարկաբեկում են մեր իրավապահ համակարգը։ Այսինքն եթե նման քրեական գործեր կային, ինչի՞ն էին սպասում իրավապահ մարմինները։ Սպասում էին, որ Ծառուկյանը քաղաքական հայտարարություն անի, որ նոր հիշեն իրենց վարույթում ինչ գործեր կայի՞ն։ Իրավապահ մարմինները պարտավոր էին իրենց վարույթում եղած գործերին արագ ընթացք ու լուծում տան»,-ասաց պատգամավորը։

Հարցին՝ եթե Գագիկ Ծառուկյանին անձեռնմխելիությունից զրկելու հարցը քննարկվի և ԲՀԿ առաջնորդը զրկվի անձեռնմխելիությունից, ապա ինչ գործողություններ կանի խմբակցությունը, Գևորգ Պետրոսյանն ասաց. «Դա այնսպիսի հարց է, որ իմ անձնական որոշելիք չէ, եթե նման բան կլինի խմբակցությունը կքննարկի և համապատասխան քայլեր կիրականացնի»։

Հեղինակ՝ Հասմիկ Կոշկարյան

Աղբյուր` Փաստինֆո