Փաստ ինֆո

ԱԱԾ շենքի մոտ շարունակվում է Գագիկ Ծառուկյանի աջակիցների բողոքի ակցիան։

Նշենք, որ ԲՀԿ առաջնորդ Գագիկ Ծառուկյանը դեռ ԱԱԾ-ում է, որտեղ հարցաքննվում է վկայի կարգավիճակով։ Խմբակցության պատվամավորներն ու աջակիցները շարունակում են մնալ շենքի մոտ, թեեւ ոստիկանությունը արդեն շուրջ 100 հոգու բերման է ենթարկել՝ արտակարգ դրության պայմաններում հավաքի մասնակցելու համար։

Ոստիկանությունը հայտարարել էր, որ եթե ողջամիտ ժամկետում հավաքը չդադարեցվի, մասնակիցները պատասխանատվության կենթարկվեն՝ պահանվելով պահել սոցիալական հեռավորություն։ Նշենք, որ ոստիկանության աշխատակիցները եւս սոցիալական հեռավորություն չեն պահում, շատերը ձեռնոցներ չեն կրում։

Բերման ենթարկվածների մեջ կան նաեւ կանայք։

Հիշեցնենք, որ Ծառուկյանի նկատմամբ հնարավոր հետապնդումների մասին հայտարարվեց այն բանից հետո, երբ նա հունիսի 5-in քննադատեց իշխանությունների հակամաճարակային գործողությունները` նշելով, որ այն տապալել են: Գ.Ծառուկյանը նշել էր, որ ձախողումներ են գրանցվել բոլոր ոլորտներում` բարձրացնելով իշխանությունների 100 տոկոսի փոփոխության հարց:

Մասնավորապես՝ հունիսի 5-ին Նիկոլ Փաշինյանի խոսնակ Մանե Գևորգյանը ֆեյսբուքյան իր էջում նախազգուշացրել էր քրեական գործերի մասին՝ նշելով, թե Գագիկ Ծառուկյանը պարզապես մտահոգված է մի շարք քրեական գործերի ընթացքով, որոնք վերաբերում են փողերի լվացմանը, ընտրակաշառք բաժանելուն, հարկերից խուսափելուն, կոռուպցիային:

Իսկ Փաշինյանի տիկնոջ՝ Աննա Հակոբյանի եղբայրը, «Իմ քայլը» խմբակցության պատգամավոր Հրաչյա Հակոբյանի ֆեյսբուքում հանդես էր եկել մեկ այլ գրառմամբ՝ «Խմբակային բռնաբարության համար դատապարտված ընտրակեղծարարը Հյուսիս-հարավից ինչքա՞ն լափած կլինի: Այո կամ ոչ»։ Այս հայտարարություններին հաջորդեցին Գագիկ Ծառուկյանի վերաբերյալ խմբակային բռնաբարության գործի փաստաթղթերի տարածումը սոցիալական ցանցերով։
Այսօր վաղ առավոտից ԱԱԾ-ն խուզարկություն է սկսել Գագիկ Ծառուկյանի տանը, բերման են ենթարկվել կուսակցության Գեղարքունիքի պատասխանատուները:

Աղբյուր` Փաստինֆո