Փաստ ինֆո

Իրականում Սերժ Սարգսյանն է եղել ոչ բռնի, դրա համար ենք ունեցել հեղափոխություն, որի ընթացքում ոչ մեկի գլխից մազ չի պակասել: Մինչդեռ հակապետական բազմաթիվ քայլեր են արվել՝ ռադիոտան վրա հարձակումից սկսած, որը պետական, ռազմավարական կարևորագույն նշանակության օբյեկտ է, և Փաշինյանի միայն այս ակցիան բավարար էր, որ արտակարգ դրություն մտցվեր, քանզի սահմանադրական կարգն էր ոտնահարվել: Էլ չենք խոսում զինված ուժերը քաղաքականությանը խառնելու և երթի դուրս բերելու մասին:

Բայց Սերժ Սարգսյանը, 2018-ին չգնաց առճակատման՝ հրաժարական տվեց՝ կարճ ու կոնկրետ մի նախադասությամբ՝ Նիկոլը ճիշտ էր, ես սխալ: Նախադասություն, որի բացատրության վրա առայսօր ճիգ են գործադրում քաղաքական ուժերը և որի հեղինակային պարզաբանմանը քիչ ժամանակ է մնացել:

Իսկ մինչ այդ, այն քաղաքական ուժերից մեկը՝ ԲՀԿ-ն, որի աջակցությամբ վարչապետի պաշտոն ստացավ Փաշինյանը, այսօր նույն Փաշինյանի բռնի մեթոդների կիրառմամբ քաղաքական հաշվեհարդարի է ենթարկվում:

Պատճառը հստակ է և քաղաքական՝ կուսակցության ղեկավար՝ Գագիկ Ծառուկյանը վերջերս քաղաքական հայտարարությամբ հանդես եկավ կուսակցության խորհրդի նիստում, շեշտելով, որ քաղաքական մեծամասնությունը երկու տարվա ընթացքում բոլոր ոլորտներում կտրուկ անկում է արձանագրել: Այդ թվում նաև՝ համավարակի հաղթահարման , քանզի աշխարհը հաղթահարել է այն, իսկ մեզ մոռ դեռ պիկը նոր է սկսվում: Նրա առաջարկը՝ եթե չեն կարողանում երկիրը կառավարել, պիտի ողջ թիմով հրաժարական տան, երկրի ղեկը հանձնելով կարող ուժերին, քպականները սվիններով ընդունեցին:

Նրա այս հայտարարությանը հետևեց վարչապետ Փաշինյանի կոնկրետ գործողությունները: Նախ՝ ուժային կառույցների ղեկավարները միանգամից փոխվեցին: Ի մասնավորի ԱԱԾ-ում և ոստիկանությունում ղեկավարների նոր նշանակումներ եղան: Հենց այդ մարդիկ են այսօրվա ակցիաների հիմնական պատասխանատուները:

Նիկոլ Փաշինյանի՝ թավշյա, ոչ բռնի հեղափոխության միֆն այսօր վերջնականապես հօդս ցնդեց՝ այն բանից հետո, երբ ԲՀԿ-ական, ընդ որում՝ հիմնականում կին պատգամավորների նստացույցը ցրելու համար ՀՀ «նորացված, բարեփոխված» ոստիկանությունը բռնի ուժի կիրառմամբ, հարձակվեց պատգամավորներ Նաիրա Զոհրաբյանի, Իվետա Տոնոյանի, Շաքե Իսայանի, Կարինե Պողոսյանի վրա՝ արտակարգ կոպտորեն ցրելով նստացույցը:

Ասել է, թե՝ մենք այսօր գործ չունե՞նք 2018 թվականի՝ ՀՀ քաղաքացու կողքին կանգնող ոստիկանների հետ, որոնց մասին հանրությունն ասում էր՝ «ոստիկանը մերն է»:

Փաստորեն, այսօրվա ոստիկանը ոչ թե ՀՀ քաղաքացիներին պաշտպանող, այլ՝ կորոնավիրուսային դիմակի տակ պատսպարված և բացառապես Նիկոլ Փաշինյանի հրամանը կատարող ուժ է:

Հեղինակ՝ Ա.Ե.

Աղբյուր` Փաստինֆո