Փաստ ինֆո

Գագիկ Ծառուկյանին անձեռնմխելիությունից զրկելու վերաբերյալ  միջնորդություն ներկայացնելու մասին դեռևս վաղաժամ է խոսել: Այս մասին «Փաստինֆո»-ի հարցմանն ի պատասխան ասաց ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը:

«Ընթանում  է քննություն, դրա արդյունքում ձեռք բերվող ապացույցների բավարարության հանգամանքով պայմանավորված կորոշվեն հետագա դատավարական գործողությունները»,- ասաց Աբրահամյանը:

Անդրադառնալով Ծառուկյանին անձեռնմխելիությունից զրկելու մասին քաղաքական որոշման վերաբերյալ հայտարարություններին՝ Աբրահամյանն ասաց. «Պատգամավորի նկատմամբ քրեական հետապնդում հարուցելու և ազատությունից զրկելու համաձայնություն ստանալու համար Ազգային Ժողովին ՀՀ գլխավոր դատախազի կողմից դիմելը քաղաքական գործընթաց չէ: Այն բացառապես իրավական է և պայմանավորված է բացառապես ձեռք բերված փաստական տվյալների, ապացույցների բավարարությամբ»:

Ավելի վաղ տեղեկացրել ենք, որ Բարգավաճ Հայաստան կուսակցության ղեկավար Գագիկ Ծառուկյանի տանը վաղ առավոտյան խուզարկություն էր իրականացվել: Այնուհետև՝ Գագիկ Ծառուկյանը ներկայացել է ԱԱԾ՝ հարցաքննության: ԱԱԾ-ն հանդես է եկել հայտարարությամբ՝ կապված Գագիկ Ծառուկյանին առնչվող քրեական գործերի մասին:

ԲՀԿ-ական պատգամավորները հավանական են համարել, որ առաջիկայում ԱԺ մեծամասնությունը Գագիկ Ծառուկյանին կզրկի պատգամավորական անձեռնմխելիությունից։

Հիշեցնենք, որ Ծառուկյանի նկատմամբ հնարավոր հետապնդումների մասին հայտարարվեց այն բանից հետո, երբ նա հունիսի 5-in քննադատեց իշխանությունների հակամաճարակային գործողությունները` նշելով, որ այն տապալել են: Գ.Ծառուկյանը նշել էր, որ ձախողումներ են գրանցվել բոլոր ոլորտներում` բարձրացնելով իշխանությունների 100 տոկոսի փոփոխության հարց:

Մասնավորապես՝ հունիսի 5-ին Նիկոլ Փաշինյանի խոսնակ Մանե Գևորգյանը ֆեյսբուքյան իր էջում նախազգուշացրել էր քրեական գործերի մասին՝ նշելով, թե Գագիկ Ծառուկյանը պարզապես մտահոգված է մի շարք քրեական գործերի ընթացքով, որոնք վերաբերում են փողերի լվացմանը, ընտրակաշառք բաժանելուն, հարկերից խուսափելուն, կոռուպցիային: Իսկ Փաշինյանի տիկնոջ՝ Աննա Հակոբյանի եղբայրը, «Իմ քայլը» խմբակցության պատգամավոր Հրաչյա Հակոբյանի ֆեյսբուքում հանդես էր եկել մեկ այլ գրառմամբ՝ «Խմբակային բռնաբարության համար դատապարտված ընտրակեղծարարը Հյուսիս-հարավից ինչքա՞ն լափած կլինի: Այո կամ ոչ»։ Այս հայտարարություններին հաջորդեցին Գագիկ Ծառուկյանի վերաբերյալ խմբակային բռնաբարության գործի փաստաթղթերի տարածումը սոցիալական ցանցերով։

Այսօր վաղ առավոտից ԱԱԾ-ի իրականացրած գործողությունները ԲՀԿ-ական պատգամավորները որակել են որպես քաղաքական հետապնդում։

Աղբյուր` Փաստինֆո