Փաստ ինֆո

Ադրբեջանցիները հանրայնացրել են կորոնավիրուսով հիվանդների/կոնտակտավորների տվյալները` մոտ 3500 մարդու տվյալ։ Այս մասին ուշ երեկոյան տեղեկացանք մեդիափորձագետ Սամվել Մարտիրոսյանի ֆեյսբուքյան էջից։

«Փաստինֆո»-ի հետ զրույցում մեդիափորձագետն ասաց, որ չի կարող ասել՝ ամբողջ տվյալների բազան է կոտրվել, թե ոչ, սակայն այն, ինչ հանրայնացվել է, հաստատ ամբողջ բազան չէ. «Հայտնի է, որ ադրբեջանական հաքերային թիմը, որը տարիներ շարունակ նման բաներով է զբաղված, իրենք են հրապարակել։ Գիտենք այդքանը և իրենց ասելով ինչ-որ մեյլ են կոտրել, մեջից տարել»,-ասաց Սամվել Մարտիրոսյանը։

Մեդիափորձագետի խոսքով այն բազան, որտեղից արտահոսքը եղել է տեղորոշման ցանցի հետ որևէ կապ չունի։ Նա ենթադրում է՝ ցանցը, որտեղից արտահոսքը եղել է, ԱԱԾ-ի հսկողության տակ չէ։ Հիշեցնենք, որ կորոնավիրուսի տարածման կանխարգելման նպատակով տեղորոշման օրինագիծն ընդունվեց, սակայն կառավարությունն այդպես էլ չասաց, թե ովքեր են զբաղվում այդ տվյալների մշակմամբ. «Առաջինը պետք է հանրայնացվի, թե ով է արել, երկրորդը պետք է նաև հանրայնացվի, թե ով է տեխնիկական աուդիտ արել, այսինքն ով է ստուգել անվտանգությունը»,-ասաց Սամվել Մարտիրոսյանը։

Վերջինս նկատեց՝ խնդիրը նրանում է, որ մեզ մոտ չկան տվյալների պաշտպանության հստակ կանոններ. «Չեմ զարմանա, որ սա պարզապես ինչ-որ մի բժիշկ մյուսին մի բան ուղարկի, ուղղակի մեյլը կոտրեն։ Իհարկե՝ ենթադրություն է, բայց կարող է այսպես էլ լինել։ Հնարավոր է՝ սա ինչ-որ հիվանդանոցից, ինչ-որ տեղից լոկալ տվյալների արտահոսք է»,-ասաց մեդիափորձագետը։

Հարցին՝ որոնք պետք է լինեն այս դեպքում կառավարության քայլերը, Սամվել Մարտիրոսյանն ասաց, որ այդ քայլերը հիմա չպետք է արվեն, դրանք նախքան այս պետք է արդեն արված լինեին. «Սա շատ մեծ խնդիր է տվյալների մշակման, կանոնների հայեցակարգի ստեղծման հետ կապված, ինչպես նաև արտահոսքն ավելի լրջացնելու պատիժները։ Նման բաներին պետք է ավելի լուրջ մոտենալ։ Տվյալների արտահոսքի միշտ է պետք սպասել, միշտ լինելու է, որովհետև եթե չկա հստակ մոտեցում տվյալների վերամշակման, ով կարող է տվյալ ունենալ, ով ոչ, ինչպես կարող է վերահսկվել»,-ասաց Սամվել Մարտիրոսյանը։

«Փաստինֆո»-ն կապ հաստատեց նաև ՀՀ առողջապահության նախարարի մամուլի խոսնակ Ալինա Նիկողոսյանի հետ, ով ասաց, որ դեռ պարզ չէ դրանք հիվանդների տվյալներ են, թե կոնտակտների։ Նրա խոսքով իրավապահ մարմինները զբաղվում են այս հարցով։

Հիշեցնենք, որ որոշ ժամանակ առաջ ֆեյսբուքում հրապարակվել էր նաեւ մահացածների ցուցակը։

Հեղինակ՝ Հասմիկ Կոշկարյան

Աղբյուր` Փաստինֆո