Փաստ ինֆո

Գավառում տեղի ունեցած միջադեպի գործով քաղաքական հստակ կամք կա, որ անձինք այս փուլում գտնվեն ազատազրկման մեջ։ Այս մասին «Փաստինֆո»-ի հետ զրույցում ասաց փաստաբան Ալեքսանդր Կոչուբաևը։ Վերջինս գործով անցնող 30 մեղադրյալներից 3-ի փաստաբանն է։

Նրա տեղեկացմամբ՝ իր պաշտպանյալների նկատմամբ կալանավորումը որպես խափանման միջոց ընտրելու դատարանի որոշման դեմ վերաքննիչ բողոքներ էր ներկայացրել, որոնք մերժվել են։ Նրա ունեցած տվյալներով՝ մերժվել են նաև մյուս մեղադրյալներին կալանավորելու որոշումների դեմ վերաքննիչ բողոքները։

«Գլխավոր խնդիրն այն է, որ այստեղ շոշափվում է իրավապահ համակարգի «ինքնասիրության» հարցը»,- ասաց Կոչուբաևը՝ ընդգծելով, որ իր պաշտպանյալներից երկուսը զանգվածային անկարգությունների պահին եղել են Երևանում, իսկ մյուս պաշտպանյալը, թեև եղել Գավառի հիվանդանոցում, ոչինչ չի կոտրել։

Նրա խոսքով ՝ գործի քննությունը շարունակվում է մնալ «աչքաչափային», անձինք ազատությունից զրկվել են հաստիքային ոստիկան-վկաների «մոտավորապեսային» ցուցմունքով։

Անդրադառնալով իր պաշտպանյալների անվտանգության հարցին՝ Կոչուբաևն ասաց, որ նրանց կալանավայրում գտնվելն արդյունավետ միջոց էր նախնական փուլում՝ 10-20 օր։

«Այս առումով կալանքը քննող դատավորներից Մնացական Մարտիրոսյանն էլ ըստ էության արձանագրեց, որ կալանավորման որոշումը տալիս է հենց այդ անձանց անվտանգության նկատառումներով։ Թեև օրենսդրությունն անվտանգության նկատառումներով կալանավորման որևէ ընթացակարգ չի նախատեսում, սակայն ես էլ չշտապեցի բողոքարկել կալանավորման որոշումները 10 օր, մինչև կրքերը հանդարտվեն։ Այդ պահից սկսած արդեն իսկ կարծում եմ, որ անձանց ազատազրկված լինելը ոչ իրավաչափ են»,- ասաց Կոչուբաևը։

Նա տեղեկացրեց, որ ներկայացվել են մի շարք միջնորդություններ՝ Հայթյան եղբայրներին բուժօգնություն ցուցաբերած բժիշկներին, ականատես վկաներին հարցաքննելու համար։

Ըստ փաստաբանի՝ նրանց հարցաքննությունն ուղիղ մատնացույց կանի, որ իր պաշտպանյալները չեն մասնակցել անկարգություններին։

«Նախաքննական մարմինը դրանց չի անդրադառնում և այս գործը շարունակում է մնալ պետության ինքնասիրության տիրույթում, քանի որ պետությունը վիրավորված է մնացել այն հանգամանքից, որ այսպես արհամարհելով ոստիկաններին, իրավապահ համակարգին, Գավառի բնակիչները մուտք են գործել հիվանդանոցի տարածք և կատարել քրեական գործում նշված արարքները»,- ասաց Կոչուբաևը։

Դիտարկմանը, որ Գավառի հիվանդանոց ներխուժումը եղել է ոստիկանների ներկայությամբ, ընդ որում՝ տարածքում է եղել նաև նախկին ոստիկանապետը, արդյո՞ք դրանից կարելի է ենթադրել, որ ոստիկանությունն այլևս հեղինակություն չէ, Կոչուբաևն արձագանքեց, որ ոստիկանությունը հեղինակություն չէ արդեն երկու տարի, որովհետև ոստիկանությունը վերածվել է փափուկ ուժի կիրառման և ծայրահեղ մոտեցումներ է ցուցաբերում նույնատիպ իրավիճակներում։

Հիշեցնենք, ապրիլի 28-ին Գավառում տեղի է ունեցել փոխհրաձգություն, որի ժամանակ սպանվել է երկու երիտասարդ՝ Նորատուսի բնակիչ Վ. Ավետիսյանը և Գավառի բնակիչ՝ ՔԿ Զինվորական քննչական գլխավոր վարչության քննիչ Զ. Պարոնիկյանը, 6 հոգի տեղափոխվել բժշկական կենտրոն: Սակայն դեպքն այդքանով չի ավարտվել և դարձել է վենդետայի պատճառ: Դանակով ու մահակներով զինված անձինք մտել են Գավառի հիվանդանոց, որտեղ այդ պահին հսկողություն էին իրականացնում ոստիկանության ծառայողները, այն ամբողջությամբ տակնուվրա արել, փորձել սպանել միջադեպի մասնակիցներից 3-ին՝ նրանց մեղադրելով իրենց հարազատների սպանության մեջ։

ՔԿ հրապարակած տեղեկատվության համաձայն՝ այս պահի դրությամբ քրեական գործով որպես մեղադրյալ ներգրավված է 30 անձ, որոնցից 25-ը՝ ՀՀ քրեական օրենսգրքի 225-րդ հոդվածի 2-րդ եւ 4-րդ մասերով՝ «Գավառի բժշկական կենտրոն»-ում զանգվածային անկարգություններին մասնակցելու, մեկը՝ ՀՀ քրեական օրենսգրքի 225-րդ հոդվածի 2-րդ մասով եւ 34-104-րդ հոդվածի 1-ին մասով՝ նույն կենտրոնում զանգվածային անկարգություններին մասնակցելու եւ սպանության փորձի համար, իսկ երեքը՝ 34-104-րդ հոդվածի 2-րդ մասի 1-ին, 6-րդ եւ 7-րդ կետերով եւ 235-րդ հոդվածի 1-ին մասով՝ Գավառի «Ազատության» փողոցում խմբի կողմից, երկու եւ ավելի անձանց, շատերի կյանքի համար վտանգավոր եղանակով սպանության փորձի, ապօրինի կերպով հրազեն ձեռք բերելու, պահելու եւ կրելու , իսկ մեկը՝ ՀՀ քրեական օրենսգրքի 104-րդ հոդվածի 2-րդ մասի 1-ին, 6-րդ կետերով եւ 235-րդ հոդվածի 1-ին մասով՝ երկու եւ ավելի անձանց, շատերի կյանքի համար վտանգավոր եղանակով սպանության եւ ապօրինի կերպով հրազեն ձեռք բերելու, պահելու եւ կրելու համար:

Վերոնշյալ 30 մեղադրյալներից 19-ը կալանավորվել է, իսկ 3-ի նկատմամբ հայտարարվել հետախուզում: 8 մեղադրյալի նկատմամբ կալանավորումը որպես խափանման միջոց ընտրելու վերաբերյալ ներկայացված միջնորդությունները մերժվել են:

Հեղինակ՝ Իզաբել Սահակյան

Աղբյուր` Փաստինֆո