Փաստ ինֆո

Օրերս «Լիդիան Արմենիան» ընկերությունը հաղորդագրություն տարածեց այն մասին, որ ծրագրում է վերսկսել աշխատանքները Ամուլսարում՝ ավարտին հասցնելով հանքի շինարարությունը: Ընդ որում՝ ընկերությունն ընդգծել էր, որ չնայած ընկերության գործունեության և Ամուլսարի ծրագրի ապագայի վերաբերյալ շրջանառվող իրականությանը չհամապատասխանող տեղեկություններին՝ Ամուլսարի ծրագիրը շարունակում է մնալ «Լիդիան Արմենիայի» 100% սեփականությունը, ընկերությունը շարունակում է տիրապետել հանքի շահագործման բոլոր իրավունքներին։

Տեղեկացնենք նաև, որ դեռևս 2019թ․ դեկտեմբերից «Լիդիան Ինթերնեյշնլ» ընկերությունը սնանկությունից պաշտպանվելու գործընթաց էր սկսել Կանադայի առևտրային դատարանում։ Արդեն 2020թ. մայիսի 4-ին դատարանը հանել է սնանկությունից պաշտպանող արգելանքն ու թույլ տվել, որ ընկերության պարտատերերից շվեդական ՍԷԿ-ը՝ պետական արտահանումների վարկավորման գործակալությունը կամ դրա ֆինանսական գործակալ ING բանկն, ինչպես նաև բրիտանական «Կատերպիլարի Ֆինանսական ծառայություններ» ընկերությունն օգտվեն «Լիդիանի» հետ կնքված իրենց համաձայնագրով լիազորված իրավունքից և ստիպեն ընկերությանը պարտավորությունների կատարում՝ ինչը նշանակում է տրված գույքի կամ դրան համարժեք ակտիվների վերադարձ, իսկ այդպիսի գործընթաց հնարավոր է լինում միայն սնանակն ճանաչված ընկերության պարագայում։

Արձագանքելով այս հայտարարությանը բնապահպան Նազելի Վարդանանը «Փաստինֆո»-ի հետ զրույցում արձանագրել է. «Կարծում եմ, որ հակառակը պետք է տեղի ունենա, չնայած, որ այդ ընկերությունը իրականությանը չհամապատասխանող ինչ – որ տեղեկություններ է շրջանառում վերջերս։ Բացի այդ, մինչ նրանք հայտարարում են, որ ԱԺ-ում քննարկվել է հանքարդյունաբերության վերաբերյալ հարցը, քննչականի կայքում հրապարակվում է մայիսին կանադական դատարանի կողմից կայացրած որոշումը, որն արդեն պաշտպանությունից դուրս է մղում «Լիդիան Արմենիան» ընկերությանը, այսինքն, պարտատերերը կարող են սկսել պահանջել իրենց գումարները։ Ստացվում է, որ նրանք լրացացուցիչ ժամանակ այլևս չունեն։ Փոխարենն այս խնդրով զբաղվելու, «Լիդիան Արմենիան» ընկերությունը զբաղված է հանքի շահագործումը վերսկսելու վերաբերյալ ինչ – որ հայտարություներ տարածելով։ Իսկ թե ինչո՞ւ են նրանք որոշել վարվել այսպես, ես չեմ կարող և իրավասու չեմ մեկնաբանել։ Իրենց պետք է հարցնել, թե ինչո՞ւ են այդպիսի իրավիճակում նրանց այդօրինակ հայտարություններ անում»։

Հեղինակ՝ Նվարդ Մանվելյան

Աղբյուր` Փաստինֆո