Փաստ ինֆո

Կառավարությունում մի քանի պաշտոնանկություններ են եղել, որոնք կապված են եղել հակահամաճարակային կանոնների հետ կապված առաջադրված խնդիրների և հանձնարարականների չկատարման հետ։ Այս մասին ԱԺ-ում ասաց ՀՀ վարչապետ Նիկոլ Փաշինյանը։

Վարչապետը նկատեց՝ այնպես չէ, որ ասում են քաղաքացիները պետք է փոխեն իրենց անհատական վարքագիծը, իսկ պաշտոնյաները ոչ. «Ասում ենք բոլորն առանց բացառության։ Ինքս էլ փորձում եմ դա ի ցույց դնել սեփական օրինակով»,-ասաց վարչապետը։

ԱԺ «Լուսավոր Հայաստան» խմբակցության պատգամավոր Աննա Կոստանյանն անդրադարձավ մի տեսանյութի, որը տարածվել է այսօր։ Պատգամավորը նշեց, որ դեպքը տեղի է ունեցել Սպիտակ քաղաքում, երբ իրավապահ մարմնի ներկայացուցիչը քաղաքացիական հագուստով անձի հետ բերման են ենթարկում քաղաքացուն այն պարագայում, որ քաղաքացին դիմակ է կրում։ Հարցին՝ որքանով է օրինաչափ իրավապահ մարմնի ներկայացուցչի և քաղաքացիական հագուստով անձի գործողությունները։ Վարչապետը, արձագանքելով պատգամավորի հարցին, ասաց. «Տիկին Կոստանյան ինչքանով լուրջ կլինի, որ հիմա ինձ ասեք ինտերնետում մի հատ տեսանյութ կա սենցա, սենցա, սենցա, ես էլ ասեմ, որ դա գնահատում եմ էսպես, էսպես, էսպես։ Ես մի բան գիտեմ, որ մարդուն բերման ենթարկում են իրավական հիմքերի առկայության դեպքում և եթե բերման են ենթարկել, ուրեմն կանխավարկածն այն է, որ ունեցել են բավարար հիմքեր։

Ես ասում եմ, որ ոստիկանությունն այսօր ՀՀ-ում չպետք է վախենա գործել։ Ոստիկանությունը պետք է իր իրավասությունների սահմաններում գործի, գործի դուխով, վստահ, բայց նաև օրինական։ Տպավորություն է, որ ոստիկանությունը պետք է պատերի տակով թաքուն ման գա։ Ոչ, կանոնները, օրենքները խախտողները և հանցագործները պետք է պատերի տակով ման գան և ոստիկանությունը պետք է լինի դուխով։ Ոստիկանությունը ոնց որ էս երկրի թիվ մեկ թշնամին է, ո՛չ, բեսպրեդելն է էս երկրի թիվ մեկ թշնամին և այդ բեսպրեդելի մթնոլորտ տարածողները պետք է մտնեն իրենց ծակերը։ Իսկ այդ դեպքում տեսանյութն ինձ ուղարկեք և ոստիկանը, որն ապօրինություն թույլ կտա, այդ ոստիկանի հետ միջոցներ կձեռնարկենք։

Ոստիկանությունը պետք է գործի ուժեղ, դուխով, օրինական և պետք է կոշտ լինի։ Ինչ է նշանակում ոստիկանը մոտենա ասի դիմակ պետք է կրել, սկսեն հետը լեզվակռիվ տալ, հոխորտալ։ Պիտի բերման ենթարկեն ու որտեղ պետք է ուժ կկիրառվի։ Ոստիկանությունն ու ԱԱԾ-ն ոմանց նկատմամբ այնքան ուժ պետք է կիրառեն, որ ծպտունները դուրս չգա»,-ասաց Նիկոլ Փաշինյանը։

Աղբյուր` Փաստինֆո