Փաստ ինֆո

Քիչ առաջ քաղաքացիներից ահազանգեր ստացա, որ «Շտապօգնությունը» հրաժարվում է քաղաքացիներին հիվանդանոց տեղափոխել։ ԱԺ հատուկ նիստի ժամանակ այս մասին ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը։

«Առաջարկում են, որ իրենք հիվանդանոցի հետ պայմանավորվեն և եթե X հիվանդանոցը Ձեզ կընդունի, մեզ ասեք և նոր կգանք, հիվանդին կտանենք։ Սա տարբերակ չէ, ճանապարհ չէ։ Մենք տեսանք Գեորգի անունով քաղաքացու ահազանգը, որ աղաղակում էր սոցիալական ցանցում, ասում, որ փրկենք իրեն։ Լավ էր, որ արձագանքեցիք և նրան տեղափոխեցին մարզային հիվանդանոցներից մեկը։ Հիմա ի՞նչ, ամեն մեկն իր տանը նստած պետք է գոռա, ասի՝ եկեք, մեռնում եմ, խեղդվում եմ, շտապօգնությունը չի տեղափոխում, որպեսզի մենք կարողանանք այս խնդիրները լուծենք»,-ասաց Նաիրա Զոհրաբյանը։

Պատգամավորն անդրադարձավ նաև դիմակների գների խնդրին։ Նա նկատեց, որ ասում ենք՝ համաճարակը կտևի 1, 2 ընդհուպ 5 տարի, այդ դեպքում մեկ քաղաքացին, եթե չի օգտագործելու կեղտոտ, ճմրթված, հակահիգիենիկ դիմակ, որ ոստիկանից վախենալով՝ գրպանից պետք է հանի դնի, այլ օրվա մեջ մի քանի անգամ փոխի, ապա մեկ քաղաքացու հաշվով ամսեկան գալիս է 15-17 հազար դրամ. «Գոնե մեր այն հայրենակիցները, որոնք ներառված են աղքատության սոցիալական սանդղակում 24-25 տոկոս, գոնե այդ քաղաքացիներին ապահովեք դիմակներով»,-ասաց պատգամավորը։

Աղբյուր` Փաստինֆո