Փաստ ինֆո

Հայաստանի Հանրապետությունում հայտարարված արտակարգ դրությունը կերկարաձգվի մինչև հուլիսի 13-ը՝ ժամը 17։00-ն։ Այս մասին համապապատասխան որոշմանը գործադիրը հավանություն տվեց կառավարության արտահերթ նիստի ժամանակ։

Հարցը ներկայացրեց ՀՀ արդարադատության նախարար Ռուստամ Բադասյանը. «Ակնհայտ է, որ այն պատճառները, որով արտակարգ դրությունը հայտարարվել էր, շարունակվում են գոյություն ունենալ և դրանց արձագանքելու պատշաճ և արդյունավետ մեխանիզմն ապահովելու համար անհրաժեշտ է կրկին երկարաձգել արտակարգ դրության ժամկետը»,-ասաց նախարարը։

Ռուստամ Բադասյանը հավելեց, որ նախագծով որոշակի փոփոխություններ են կատարվել, որոնցից մեկով առաջարկվում է արտակարգ դրության ընթացքում սահմանափակել հարկադիր կատարումն ապահովող ծառայության լիազորությունները, որ վերջինս հնարավորություն ունենա արգելանք չդնել կամ բռնագանձումչտարածել այն դրամական միջոցների վրա, որոնք տրամադրվել են ֆիզիկական կամ իրավաբանական անձանց կողմից այլ ֆիզիկական անձանց՝ կորոնավիրուսի հետևանքով սոցիալական խնդիրների առաջացումը կանխարգելելու կամ կորոնավիրուսի հետևանքները չեզոքացնելու համար. «Ունենք նման դեպքեր, երբ իրավաբանական անձինք սոցիալական աջակցություն են տալիս որոշակի խմբերի և քանի որ հարկադիր կատարումն ապահովող ծառայությունն արդեն արգելանքներ էր դրել կատարողական վարույթի շրջանակներում, նշված սոցիալական աջակցությունն իր նպատակին չի ծառայում, դրա համար այս փոփոխությունն ենք առաջարկել։ Հանվել է համաճարակաբանական լարված իրավիճակ ունեցող երկրների ցանկ սահմանելու իմպերատիվ պահանջը՝ դա թողնելով ըստ իրավիճակի առողջապահության նախարարի կողմից սահմանելուն։ Ի տարբերություն առկա կարգավորման, երբ պարետի որոշմամբ պետք է սահմանվեն այն տարածքները, որտեղ արգելվում է հանրային միջոցառումների կազմակերպումը, անցկացումը և դրանց մասնակցությունը, կառավարության որոշման մակարդակով առաջարկվում է հստակեցնել, որ արգելքը ներկայումս տարածվում է ՀՀ ողջ տարածքում, իսկ պարետն այս արգելքից կարող է բացառություններ նախատեսել»,-ասաց Ռուստամ Բադասյանը։

Աղբյուր` Փաստինֆո