Փաստ ինֆո

Եթե 2200 մահճակալի մեջից 10 մահճակալի մասին եք խոսում, կարծում եմ՝ պատասխանն ակնհայտ է և ոչ մի անձնական ամբիցիա չկա և չի կարող լինել։ Ազգային ժողովում լրագրողների հետ զրույցի ժամանակ այս մասին ասաց ՀՀ առողջապահության նախարար Արսեն Թորոսյանը՝ անդրադառնալով իր հասցեին հնչող այն մեղադրանքին, որ անձնական ամբիցիաների պատճառով չի օգտագործում այն ռեսուրսը, որն այս ամիսների ընթացքում պատրաստ էին տրամադրել թիվ 1 համալսարանական կլինիկան և «Նաիրի» ԲԿ-ն։

Նախարարն ասաց, որ ամբողջ առողջապահական համակարգն ի սկզբանե ներգրավված է եղել այս գործընթացում՝ հատուկ սկզբունքներին համապատասխանելով. «Այդ սկզբունքները միշտ լինելու են և այո, լինելու են բժշկական կենտրոններ, որ պետք է հեռու մնան կորոնավիրուսից կենտրոնական որոշումների շնորհիվ։ Առողջապահությունը միայն կորոնավիրուսով չէ, որ զբաղվում է, այլ զբաղվում է բազմաթիվ այլ մեր բոլորի հիվանդություններով»,-ասաց Արսեն Թորոսյանը։

Դիտարկմանը՝ արդյոք 10 մահճակա՞լ է այդ հիվանդանոցների հնարավորությունը, նախարարն ասաց. «Դա 1 համալսարանական կլինիկան է, իսկ «Նաիրի»-ի մասով որոշում է կայացվել, որ չի մասնակցելու կորոնավիրուսային հիվանդության բուժմանը և դա ճիշտ որոշում է ու այդ որոշումն ուժի մեջ է»,-ասաց նախարարը։

Հարցին՝ փողոցում դիմակով քայլելը թթվածնային քաղց չի առաջացնում մարդու մոտ, Արսեն Թորոսյանը նկատեց՝ դա հերթական միֆն է։ Նրա խոսքով կարող են լինել կոնկրետ մարդիկ, որոնք հակացուցում ունեն, բայց սովորական քաղաքացիների մոտ դա թթվածնային քաղց չի բերում, քանի որ նախարարի վստահեցմամբ թթվածինն անցնում է թոքեր։

Աղբյուր` Փաստինֆո