Փաստ ինֆո

«ԱԺ ոչ մի պատգամավորի մոտ դեռևս կորոնավիրուս չի հայտնաբերվել»,- այսօր ԱԺ արտահերթ նիստում հայտարարել է վարչապետ Նիկոլ Փաշինյան՝ գիտակցաբար կամ ոչ այնքան՝ դառնալով ԱԺ բարձր ամբիոնից սուտ ինֆորմացիա տարածող թիվ մեկ աղբյուր։

«Փաստինֆո»-ի հավաստի տեղեկություններով՝ Ազգային Ժողովի պատգամավորներից առնվազն մեկի մոտ կորոնավիրուսը հաստատվել է եւ նա գտնվում է ինքնամեկուսացման մեջ։ Թեեւ պատգամավորը հանրային անձ է, սակայն ձեռնպահ ենք մնում նույնականացնող տվյալները հրապարակելուց՝ առանց նշելու նաեւ, թե որ խմբակցությունն է նա ներկայացնում, քանի որ կարեւորը դա չէ, այլ այն, որ ԱԺ բարձր ամբիոնից երկրի վարչապետը տարածում է կեղծ տեղեկատվություն։

Նշենք, որ պատգամավորն ինքը հաստատել է իր վարակակիր լինելը. «Հավանաբար վարակը ստացել եմ ընտանիքի անդամներից որևէ մեկից։ Ինձ մոտ բոլոր սիմպտոմներն առկա են՝ բարձր ջերմություն, ցավ, թուլություն և այլն։ Գտնվում եմ տանը՝ ինքնամեկուսացման պայմաններում»։ Պատգամավորը եւս մարդ է եւ արտառոց ոչինչ չկա հիվանդանալու մեջ՝ միայն թե չենք հասկանում, թե որն է կեղծ տեղեկություններ տարածելու վարչապետի շարժառիթը, թե պարզապես ԱԺ ղեկավարությունը եւս վարչապետին, ինչպես մամուլին, չի ներկայացնում բուն իրավիճակը

Նշենք, որ պատգամավորների շրջանում վարակի հայտնաբերման վերաբերյալ ԱԺ աշխատակազմից պարզաբանում ստանալու ակնկալիքով «Փաստինֆո» լրատվական գործակալությունը կապ էր հաստատել նաև ԱԺ աշխատակազմի ղեկավար Տիգրան Գալստյանի հետ։ Մեզ հետ զրույցում, սակայն, Աժ աշխատակազմի ղեկավարը պնդեց, թե պատգամավորների շրջանում կոնտակտավոր կամ վիրուսակիր անձինք չկան։ «Վերջին մեկ ամսվա տվյալներով ԱԺ-ում վիրուսակիր մեկ անձ եղել է աշխատակազմի ստորաբաժանումներից, ով այս պահին մեկուսացված է, ևս մեկ անձ էլ եղել է ԱԺ աշխատակազմից՝ պատգամավորի օգնական։ Կոնտակտավոր բոլոր անձանց տեստավորել ենք, որևէ մեկի մոտ վիրուս չի հայտնաբերվել, իսկ պատգամավորների շրջանում կոնտակտավոր կամ վիրուսակի անձ՝ վերջին մեկ ամսվա տվյալներով չկան»։

Մինչդեռ պնդում ենք՝ վարակի դեպք կա, այս պահին չենք կարող ասել արդյո՞ք սա ԱԺ-ում գրանցված վարակակիր կամ կոնտակտավոր պատգամավորի միակ դեպքն է, թե ոչ։ Ու միայն այն, որ ակնհայտ տեղեկությունը վարչապետի ու ԱԺ ղեկավարության մակարդակով թաքցվում է խիստ տարակուսանք է հարուցում ու հիմք մտածելու, որ նման բազմաթիվ դեպքերում է կառավարությունը ստել կամ առնվազն ոչ ճիշտ տեղեկատվություն տրամադրել, կամ էլ պարզապես նրան չեն ներկայացնում պատշաճ տեղեկատվություն ու փաստացի Վարչապետը չի տիրապետում իրավիճակին։

Հետգրության փոխարեն հույս ենք հայտնում, որ ԱԺ աշխատակազմում պատշաճ կերպով պահպանվում են հակահամաճարակային պայքարի դեմ պարետատան սահմանված բոլոր կանոններն ու այլ կոնտակտավոր կամ վարակված պատգամավորներ այնտեղ այս պահին չկան։

Աղբյուր` Փաստինֆո