Փաստ ինֆո

Մենք հայտնվել ենք մի իրավիճակում, երբ Հայաստանում զուգահեռ աշխարհներ են առաջացել և այդ զուգահեռ իրականություններում, պարզվում է ՀՀ Սահմանադրությունը մի դեպքում թույլատրում է 30-40 հոգանոց հավաքի իրականացում, մյուս դեպքում՝ երկու հոգուն, ընդ որում՝ ՀՀ և ԼՂՀ նախկին օմբուդսմեններին՝ իրավապաշտպաններ Լարիսա Ալավերդյանին և Ռուբեն Մելիքյանին արգելում են ոչ թե հավաք, այլ՝ իրենց բողոքը՝ արտահայտել, միայնակ ակցիան իրականացնել, որի միտք բանին հետևյալն է՝ վերադարձնել քաղաքացուն խաղաղ հավաքների ազատությունը: Մի բան, որը քաղաքացու սահմանադրական իրավունքն է: Որպես արդյունք՝ Ռուբեն Մելիքյանին բերման են ենթարկում Արաբկիրի ոստիկանություն: Հարց է առաջանում՝ ինչի՞ համար: Հավաք որպես այդպիսին չի եղել, քանի որ 2 հոգի ԱԺ մատույցներում, Բաղրամյան փողոցում իրենց մեկուսի բողոքն են հայտնել դեռևս…

Բայց եկեք տեսեք, որ երեկ երբ տարբեր քաղաքացիական նախաձեռնություններ, ՖԲ խմբեր, ՝ Երևանի ժառանգության պաշտպանության կոմիտեի կոչով իրենց իսկ խոսքով՝ 30-40 հոգանոց հավաք էին անցկացնում՝ ընդդեմ Ֆիրդուսի թաղամասի կառուցապատման, ոչ մի արգելք նրանց հանդեպ չհարուցվեց:

Թեպետ նույն արտակարգ դրությունն էր:

Ըստ ՖԲ ակտիվիստ Սեդա Գրիգորյանի՝ երեկ` ժամը 10:22-ին «բնակիչներից ահազանգ ստանալով հաշված րոպեներում 30-40 քաղաքացի հավաքվեց տարածքում, այդ թվում՝ ավագանու անդամներ ու ԱԺ պատգամավոր, հասկանալի է, որ շարժումը թափ է առնում ու անհրաժեշտության դեպքում շատ ավելի մարդ կգնա…»

Ուշագրավ է, որ երեկվա գիշերային ակցիայի արդյունքում շարժման մասնակիցները՝ «Երևանի ժառանգության պահպանության կոմիտե» և այլք, հասել են նրան, որ վաղը Երևանի քաղաքապետարանում Ֆիրդուսի թաղամասին նվիրված Երևանի ավագանու արտահերթ նիստ է տեղի ունենալու՝ համապատասխան գերատեսչությունների և շահագրգիռ անձանց մասնակցությամբ:

Բնականաբար, ողջունելի է, որ հասարակության ձայնը լսելի դարձավ, պատկան կառույցներն արձագանքեցին: Բայց այստեղ կա ակնհայտ մի բայց՝ այս դեպքում իշխանություններն արձագանքեցին քաղհասարակությանը, իսկ ահա, այսօր՝ «Իրավական ուղի» ՀԿ համահիմնադիր Ռուբեն Մելիքյանը և ևս 3 հոգի բերման ենթարկվեցին ոստիկանություն, թեեւ չէին խախտել պարետատան սահմանած ռեժիմը: Ըստ էության, ոստիկանության գործողությունները բացարձակ ապօրինի էին, Ռուբեն Մելիքյանի և Լարիսա Ալավերդյանի գործողությունները չէին հակասում Սահմանադրությունը:

Ոստիկանության գործողությունները հստակ փաստեցին մեկ բան՝ իշխանությունը երկակի ստանդարտներով է առաջնորդվում բոլոր դեպքերում, այդ թվում նաև՝ այս դեպքում:

Ռուբեն Մելիքյանի և Լարիսա Ալավերդյանի բողոքի ակցիան տեղի էր ունենում այն ժամանակ, երբ ԱԺ-ն պատրաստվում էր քվեարկել 3-րդ անգամ արտակարգ դրությունը երկարացնելու նախագիծը:

Այսինքն, իշխանությունը կորոնավիրուսային համաճարակի գործոնն օգտագործելով ՀՀ քաղաքացիներին զրկում է իրենց քաղաքացիական դիրքորոշումը հայտնել մեր օրերում՝ ոչ միայն ներքաղաքական, այլև արտաքին բնագծում կատարվող ապօրինությունների դեմ:

Հենց երեկ եվրոպական որոշ կառույցներ հանդես էին եկել Արցախի վերաբերյալ մտահոգիչ հայտարարությամբ։ Սակայն այսօր ՀՀ քաղաքացիները չեն կարող գնալ ԵՄ ներկայացուցչության շենքի դիմաց ու ակցիա իրականացնել, քանի որ արտակարգ դրությունը երկարացվել է՝ իր հետևանքներով հանդերձ:

Ակնհայտ է, որ իշխանությունը համաճարակը որպես զենք, որպես վահան է օգտագործում իրեն անցանկալի դեպքերում, սակայն, թույլ է տալիս այն թեկուզ՝ բազմամարդ հավաքների իրականացումը, որոնք իրականացնողները յուրայիններն են:

Հեղինակ՝ Ա.Ե.

Աղբյուր` Փաստինֆո