Փաստ ինֆո

Երևանի ընդհանուր իրավասության դատարանի դատավոր Աննա Դանիբեկյանի քթի վիրահատության գործով «Այլընտրանք» ՀԿ համահիմնադիր Նարեկ Մանթաշյանն ունի կասկածյալի կարգավիճակ։ Այս մասին «Փաստինֆո»-ն տեղեկացավ փաստաբան Ալեքսանդր Կոչուբաևից։

«Նախաքննական մարմինը գտնում է, որ Աննա Դանիբեկյանի քթի պլաստիկ վիրահատության փաստի հրապարակումը համարվում է մասնավոր կյանքի անձեռնմխելիության իրավունքի խախտում»,- ասաց Կոչուբաևը։ Մինչդեռ, ինչպես նկատեց փաստաբանը, Եվրոպական դատարանն արձանագրում է, որ պաշտոնատար անձի պետական կյանքին, հանրային կյանքին վերաբերող տեղեկությունները ծածկված են գերակա հանրային շահով, հանրության տեղեկացված լինելու իրավունքով և այս առումով դրա հարապարակումը չի կարող համարվել մասնավոր կյանքի անձեռնմխելիության խախտում։

«Մենք որևէ տեղեկատվություն չենք հրապարակել, թե Աննա Դանիբեկյանն ում հետ է հանդիպում, ինչով է զբաղվում աշխատանքից հետո, ինչ նախասիրություններ ունի, մենք վկայակոչել ենք հստակ իր հանրային գործունեությանը վերաբերող փաստական տվյալ, այն է՝ մեզ ծանոթ դատավարության ամենաթեժ պահին ամենակարևոր միջնորդության քննարկման ժամանակ նա որոշում է,որ պետք է գնա վիրահատի իր քիթը և սա հանրության տեղեկացված լինելու իրավունքով ավելի բարձր արժեք է այս պարագայում: Գտնում ենք, որ այստեղ Նարեկ Մանթաշյանի նկատմամբ քրեական հետապնդումը քաղաքական հետապնդման էլեմենտներ է իր մեջ պարունակում»,- ասաց Կոչուբաևը։

Փաստաբանը տեղեկացրեց, որ օրենքի առջև հավասարության շրջանակներում հանցագործության մասին հաղորդում է ներկայացվել։ Մասնավորապես` հայտնի չէ, թե ով է վարչապետի էջը ղեկավարում, բայց այդ էջում հրապարակվում են անձանց մասնավոր կյանքին վերաբերող տեղեկություններ, նկարներում երևում է, որ անձինք գրկախառնված են, անձինք համբուրվում են: «Հավաքված այս ամբողջ տեղեկատվությունը չի կարող հանրության տեղեկացված լինելու իրավունքով ծածկվել և սրանք հենց դասական մասնավոր կյանքի անձեռնմխելիության իրավունքի խախտման կոնկրետ դեպքեր են», - նշեց փաստաբանը։

«Պետք է նայենք ՝արդյո՞ք դատախազությունը պատրաստ է հավասարեցման նշան դնել այս երկու դեպքերի միջև, թե օրինակ Աննա Դանիբեկյանի քիթն ավելի բարձր արժեք է, քան քաղաքացիների ազատ կյանքը, հանդիպումները միմյանց հետ» ,-ընդգծեց Կոչուբաևը։

Ավելի վաղ հայտնել ենք, որ դատավորի՝ քթի վիրահատության մասին հրապարակումների առնչությամբ նախապատրաստված նյութերով ոստիկանությունում հարուցվել է քրեական գործ՝ ՀՀ քրեական օրենսգրքի 144-րդ հոդվածի և 145-րդ հոդվածի հատկանիշներով՝ մարդու անձնական կամ ընտանեկան գաղտնիք համարվող տեղեկություններն առանց նրա համաձայնության օգտագործելու , բժշկական գաղտնիք հանդիսացող տվյալներ հրապարակելու համար։ Հիշեցնենք, որ ՀՀ երկրորդ նախագահի և մյուսների գործով մարտի 17-ին նշանակված դատական նիստը չէր կայացել, թեեւ մինչ այդ դատավոր Աննա Դանիբեկյանի աշխատակազմից տեղեկացրել էին, որ այն կայանալու է ու պաշտպանական կողմը մարտի 16-ին ներկայացրել էր ՀՀ երկրորդ նախագահի խափանման միջոցը փոխելու մասին միջնորդությունը։ Դատական նիստի հետաձգումը պատճառաբանվել էր դատավորի վատառողջ լինելու հանգամանքով, սակայն հետագայում պարզվեց, որ նա ներկայացրել է անաշխատունակության թերթիկ ՝ դեռեւս մարտի 13-ի ամսաթվով ։

Ավելի ուշ՝ ապրիլի 9-ին մամուլում տեղեկություն հայտնվեց, որ Աննա Դանիբեկյանը պետպատվերի շրջանակներում վիրահատել է քիթը։Հրապարակումներից 5 օր անց՝ ապրիլի 14-ին, ԲԴԽ-ն հայտարարություն տարածեց, թե դատավոր Աննա Դանիբեկյանի քթի վիրահատության վերաբերյալ մամուլի հրապարակումների առնչությամբ հրավիրել է գլխավոր դատախազության ուշադրությունը՝ օրենքով սահմանված կարգով դրանց քրեաիրավական գնահատական տալու համար: Մասնավորապես՝ ԲԴԽ-ն գտել է, թե հրապարակել են օրենքով պաշտպանված տեղեկություններ /բժշկական գաղտնիք պարունակող, անձնական կյանքին վերաբերող/։ Ապրիլի 16-ին դատախազությունից հայտնեցին, որ մամուլի հրապարակումներն ուղարկվել են ոստիկանություն՝ նյութեր նախապատրաստելու հանձնարարությամբ։ Նույն օրը հայտնի դարձավ, որ դատավորը վերադարձել է աշխատանքի և կրկին մեկնել հերթական արձակուրդը՝ դատական նիստի օր նշանակելով մայիսի 8-ին։

Հեղինակ՝ Իզաբել Սահակյան

Աղբյուր` Փաստինֆո