Փաստ ինֆո

Կառավարության այսօրվա նիստում սահմանվեցին պետական սեփականություն հանդիսացող հատուկ մշակված համակարգում (բջջային հավելված) գրանցված նույն անձի կողմից նույն տրանսպորտային միջոցի վերաբերյալ էլեկտրոնային հաղորդում ուղարկելու ամսական և տարեկան առավելագույն քանակը, ինչպես նաև բջջային հավելվածի միջոցով արձանագրվող իրավախախտման տեսակները: Ըստ սահմանված կարգի`պետական սեփականություն հանդիսացող հատուկ մշակված համակարգում գրանցված նույն անձի կողմից նույն տրանսպորտային միջոցի վերաբերյալ ամսական կարող է ներկայացվել առավելագույնը 3, իսկ տարեկան առավելագույնը 30 էլեկտրոնային հաղորդում: Բջջային հավելվածի միջոցով հնարավոր կլինի արձանագրել առավել հաճախակի հանդիպող եւ շարքային քաղաքացու համար տեսանելի 12 տեսակի իրավախախտում: Դրանցից են հանդիպակաց երթեւեկության գոտի դուրս գալը, կանգառի կայանման կանոնները խախտելը, լուսացույցի ազդանշանին չենթարկվելը, ավտոմեքենայից աղբ նետելը եւ այլն։ ՀՀ վարչապետ Նիկոլ Փաշինյանի առաջարկությամբ ցանկում կավելացվեն նաև ավտոմեքենայում 2-ից ավելի մարդ լինելու դեպքում՝ դիմակ չկրելու դեպքը:

Հարցը կառավարության նիստում ներկայացրել է ՀՀ ոստիկանապետ Վահե Ղազարյանը՝ նշելով, որ այս որոշման նպատակը ճանապարհային կանոնների խախտումները նաեւ բջջային հավելվածի միջոցով քաղաքացիների կողմից արձանագրելու հնարավորություն տալն է: Բջջային հավելվածը հասանելի կլինի միայն ՀՀ-ում մշտապես բնակվող անձանց համար:

«Հավելվածի միջոցով ստացված նյութի հիման վրա վարչական վարույթն իրականացվելու է, եթե այն հնարավորություն կտա ներկայացնելու իրավախախտման ամրագրված ֆիզիկական անձին իրավախախտման գործիք հանդիսացող տրանսպորտային միջոցի համարանիշը, իրավախախտումն ամրագրելու վայրն ու ժամանակը, բացի այդ տեսանյութը պետք է ուղարկված լինի առցանց ռեժիմով այդ նպատակով ստեղծված էլեկտրոնային հարթակին:
Ըստ Ոստիկանապետի՝ որոշման նախագծի ընդունումը հնարավորություն կտա բարձրացնել ճանապարհային երթևեկության անվտանգության մակարդակը, վարորդները կխուսափեն իրավախախտումներ կատարելուց ոչ միայն այն վայրերում, որոնք վերահսկվում են ստատիկ տեղադրված տեխնիկական միջոցներով, այլ նաև չվերահսկվող ճանապարհներին՝ ելնելով իր արարքը բջջային հավելվածով արձանագրվելու կանխավարկածից:
Առաջարկվող նախագծի վերաբերյալ կարծիք հայտնեց փոխվարչապետ Տիգրան Ավինյանը, նկատելով, որ այդտեղ մարդու անձնական կյանքի իրավունքի հետ կապված խնդիրներ կան, սակայն Արդարադատության նախարարը խոստացավ եւս մեկ անգամ ուսումնասիրել խնդիրը։

Աղբյուր` Փաստինֆո