Փաստ ինֆո

Կրել դիմակ, պահպանել սոցիալական հեռավորություն, ախտահանել ձեռքերը՝ արդյո՞ք այս՝ մանտրայի հանգույն կրկնվող բառակապակցությունները արդյունավետ են այսօր մեզանում, երբ մասնագետների դիտարկմամբ՝ դեռ պիկին չենք հասել՝ կորոնավիրուսի դեմ պայքարի համատեքստում: Արդյո՞ք այս կանոնները խստորեն պահպանելու պարագայում մեր համաքաղաքացիները զերծ են վարակվելուց: Այս կերպ, ըստ էության մենք վիրուսի դեմ պայքարում ենք՝ փորձելով այն վանել մեզանից: Արդյո՞ք սա բավարար պայման է, մանավանդ, երբ դիմակների երկարատև կրումը մարդու մոտ առաջ է բերում թթվածնային քաղց, թոքերի սնկային հիվանդություններ՝ թուլացնելով մարդու իմունիտետը…

Ընդ որում, ուշագրավ մի փաստ՝ ԱՀԿ-ն սկզբնապես , այսպես ասած՝ փորձարկումների շրջանում գնում էր վիրուսի խեղճացման, վիրուսի վրա ազդելու և այն վանելու ճանապարհով՝ օգտագործելով համապատասխան դեղորայք, սակայն հետագայում փոխեց իր մեթոդաբանությունը՝ աշխատելով մարդկանց իմունիտետի բարձրացմանը նպաստող դեղորաքի կիրառմամբ պայքարել համավարակի դեմ, որը մեծ էֆեկտիվություն ունի այսօր:

Կարծում եմ՝ նաև այս դիտանկյունից պիտի դիտարկել այն փաստը, որ աշխարհի բազմաթիվ երկրներ հաղթահարեցին համավարակը:

Մենք որպես ազգ, հասարակություն ինչպիսի՞ իմունային համակարգ ունենք: Բնականաբար, այն անհատական գործոն է, յուրաքանչյուր անձ ինքն է իր իմունիտետը բարձր պահելու պատասխանատուն:

Բայց խոստովանենք, որ այս առումով իր կարևոր դերն ունեն նաև սոցիալ-հոգեբանական գործոնները, բնականաբար, երկրում ձևավորված մթնոլորտը, ծայրահեղ առճակատումների ոչ թե գնալու, այլ՝ դրանք հաղթահարելու ցանկությունն ու ունակությունը, համաշխարհային ճգնաժամի և անորուշությունների պարագայում անգամ տվյալ երկրում յուրաքանչյուր մարդու, անհատի կյանքի և կենսագործունեության անվտանգությունը:

Մարդը պիտի տեսնի և զգա իր պետության հոգատարությունը: Բնականաբար, ասֆալտին փռելու, պատերին ծեփելու և մարդկանց սորտավորելու գործընթացները դրական ֆոն չեն կարող ստեղծել համաճարակային իրավիճակում: Եվ ոչ էլ՝ համավարակի պայմաններում Ազգային Ժողովում հրատապության կարգով անցկացվող ոչ հրատապ նախագծերը, համաճարակային իրավիճակում անգամ մարդկանց հնարավորինս շատ տույժ ու տուգանքի ենթարկելու մոտիվացիան: Համավարակը այլ պետություններում եղավ ու դարձավ վարկային ու հարկային պարտավորությունները ներելու շրջան, իսկ մեզ մոտ ինչ-որ անհասկանալի բաժանումների ենթարկվեցին մարդիկ, արդյունքում՝ ավելի շատ բանկերի առջև կուտակումներ տեսանք՝ իրենց հնարավոր հետևանքներով:

Այսքան ժամանակ ես չլսեցի, որ մեր իշխանության համապատասխան օղակը մարդկանց հորդորեր հոգ տանել սեփական իմունային համակարգի մասին: Բնականաբար, այս դեպքում պիտի կարևորվեր օգտակար ու բնական սննդամթերքը, միրգն ու բանջարեղենը, վիտամինները, իսկ համաճարակի պայմաններում պետությունը, որն այս նպատակով աջակցություն է ստանում ԱՀԿ-ից, պիտի աջակցեր մարդկանց՝ իմունիտետը բարձրացնելու առումով, ինչի վրա առանձնապես ուշադրություն չի դարձվել:

Կորոնավիրուսի դեմ պայքարում մեզանում ամենաարդիականը շարունակում է մնալ դիմակ կրելու հորդորը, վերջին շրջանում էլ՝ ասֆալտին փռելու ճանապարհով է այն իրականացվում, ոստիկանական բռնի մեթոդներով:

Ի դեպ անհատական գործոններից զատ գոյություն ունի պետության անվտանգության գործոնը, ազգային հարցերը, որոնք շատերի համար կարևոր գործոն են՝ ստրեսից զերծ ապրելու համար, բայց երբ վարչապետի մակարդակով առնվազն մեր թշնամին ինտելիգենտ ու կառուցողական է համարվում, այլևս ստրեսը տևական է դառնում: Էս պարագայում՝ էլ իմունիտե՞տ կբարձրանա:

Հեղինակ՝ Մարինե Մինասյան

Աղբյուր` Փաստինֆո