Փաստ ինֆո

«Հայկական ատոմային էլեկտրակայան»-ի երկրորդ էներգաբլոկի շահագործման աշխատանքներն ամբողջությամբ ավարտելու համար նպատակահարմար ենք համարում սեփական միջոցների հաշվին վարկավորում կատարել։ Այս մասին այսօր կառավարության նիստի ժամանակ ասաց ՀՀ տարածքային կառավարման և ենթակառուցվածքների նախարար Սուրեն Պապիկյանը՝ ներկայացնելով պետբյուջեից բյուջետային վարկ տրամադրելու հարցը։

««Հայկական ատոմային էլեկտրակայան»-ի երկրորդ էներգաբլոկի շահագործման ժամկետների երկարաձգում ծրագրի շրջանակներում ՀՀ և ՌԴ կառավարությունների միջև 2014թ.-ին համագործակցության մասին և 2015 թ.-ին վարկի տրամադրման մասին համաձայնագիր է ստորագրվել։ Խոսքը 300 մլն դոլարի մասին է, որից 270 մլն դոլարը վարկ և 30 դոլար դրամաշնորհի մասին է։ 2018թ.-ի դեկտեմբերից վարկի երկարաձգման համար բանակցություններ են սկսվել և այս ընթացքում ժամկետի երկարացման խնդիր ունենք։ Մինչև 2019 թվականը տեղի ունեցած իրադարձություններով պայմանավորված հնարավոր չի եղել ամբողջությամբ ծախսել առկա վարկային գումարը։ Այս պահին մնացորդը 107 մլն դոլար է, սակայն աշխատանքներն ամբողջությամբ ավարտելու համար նպատակահարմար ենք համարում ՀՀ սեփական միջոցների հաշվին վարկավորում կատարել և ծրագիրն ավարտին հասցնելու համար առաջարկվում է պատվիրատուին 2020-ից 2022թթ. ընթացքում ՀՀ պետբյուջեից տրամադրել 63.2 մլրդ դրամի գումարի չափով բյուջետային վարկ, որից 2020 թ.-ին 18.7 մլրդ ՀՀ դրամ, 2021թ.-ին՝ 31.5 մլրդ դրամ և 2022թ.-ին՝ 13 մլրդ դրամ»,-ասաց Սուրեն Պապիկյանը։

ՀՀ վարչապետ Նիկոլ Փաշինյանն էլ նկատեց, որ մինչ այժմ գոյություն ունեցած վարկն իր չափերով և պայմաններով այնքան էլ հարմար չէ ատոմակայանի հետագա գործունեությունը կազմակերպելու համար. «Հրաժարվում ենք այդ վարկի մի մասից ու դրա փոխարեն ներգրավում ենք ներքին աղբյուրներից միջոցներ, որն աներկբա շատ ավելի լավ պայմաններով է ներգրավվելու և ըստ էության ավելի է մեծացնելու կառավարության լծակներն այդ վարկի օգտագործման արդյունավետության մակարդակը բարձրացնելով։ Նախկին պայմաններում մենք որոշակի սահմանափակումներ ունեինք այդ թվում գնումներ իրականացնելու մասով, թե ումից է պետք գնումներ իրականացնել, ինչպես է պետք գնումներ իրականացնել։ Այս պարագայում կարողանում ենք գնումների գործընթացն ամբողջությամբ դնել շուկայական տրամաբանության մեջ և շուկայից ձեռք բերել ապրանքներ մրցակցային սկզբունքով, ինչը ենթադրվում է, որ այս պարագայում ապրանքների գները կլինեն էականորեն ավելի ցածր։ Հույս ունենք՝ որակի առումով էլ չեն զիջի այն ապրանքներին, որ ձեռք էինք բերում նախկին պայմաններով»,-ասաց վարչապետը։

Աղբյուր` Փաստինֆո