Փաստ ինֆո

ՀՀ նախկին փոխվարչապետ Արմեն Գևորգյանի հայրը՝ Անդրանիկ Գևորգյանը, իրեն առաջադրված մեղադրանքը չի ընդունում։ Այս մասին «Փաստինֆո»-ի հետ զրույցում ասաց Գևորգյանի պաշտպան Էրիկ Ալեքսանյանը՝ ընդգծելով, որ Անդրանիկ Գևորգյանին առաջադրված մեղադրանքն ակնհայտն անհիմն և ապօրինի է։ 

«Անդրանիկ Գևորգյանը որևէ հանցագործություն չի կատարել, այդ թվում նաև իրեն մեղսագրվող հանցագործության տեսակը»,- նշեց Ալեքսանյանը։
Բացի այդ՝ Ալեքսանյանը տարակուսելի համարեց Անդրանիկ Գևորգյանին այս պահին մեղադրանք առաջադրելու հանգամանքը՝ հաշվի առնելով, որ մեղադրանքում ներառված փաստական հանգամանքները ՀՔԾ-ին հայտնի են եղել այն ժամանակ, երբ Արմեն Գևորգյանի գործով նախաքննություն էր կատարվում։

«Եթե օժանդակության հատկանիշներ լինեին, ապա Անդրանիկ Գևորգյանին մեղադրանք կառաջադրեին։ Հետևաբար՝ տարակուսանք առաջացնող հարցերից մեկը հենց դա է, թե ինչու է հիմա մեղադրանք առաջադրվել»,- ասաց Ալեքսանյանը՝ նշելով․ «Ժամանակահատվածը որևէ կապ չունի, միևնույն է, առաջադրված մեղադրանքն ապօրինի ենք գնահատում»։

Պաշտպանն ընդգծեց, որ եթե փաստական տվյալները հայտնի են եղել ավելի վաղ ժամանակահատվածում, ապա ինչում է այս պահին այսքան ժամանակ անց մեղադրանք առաջադրելու տրամաբանությունը։

Հարցին, թե ինչո՞վ է դա պայմանավորված, Ալեքսանյանը պատասխանեց, որ ներկա պահին դատողություններ կատարելուց զերծ կմնա։
Արդյո՞ք դա կարող է կապ ունենալ Արմեն Գևորգյանի հայտարարարությունների, հրապարակումների հետ՝ հարցին ի պատասխան Ալեքսանյանը պատասխանեց, որ կապվում է այդ թվում նաև դրա հետ, որի վերաբերյալ առաջիկայում լրացուցիչ հանդես կգան հայտարարությամբ։

Հիշեցնենք, որ հունիսի 11-ին ՀՔԾ-ն հայտարարություն տարածեց, որ Անդրանիկ Գևորգյանին մեղադրանք է առաջադրվել ՀՀ քրեական օրենսգրքի 190-րդ հոդվածի 3-րդ մասի 1-ին կետով՝ առանձնապես խոշոր չափերով փողերի լվացման հատկանիշներով։ Նրա նկատմամբ որպես խափանման միջոց է ընտրվել ստորագրությունը՝ չհեռանալու մասին։ Ըստ ՀՔԾ հաղորդագրության՝ նա թաքցրել և խեղաթյուրել է որդու` ՀՀ նախագահի աշխատակազմի ղեկավարի պաշտոնը զբաղեցրած Արմեն Գևորգյանի կողմից ստացած կաշառքի գումարի իրական բնույթն ու ծագումը և օրինականացրել առանձնապես խոշոր չափերի՝ 309.000.000 ՀՀ դրամին համարժեք 1.000.000 ԱՄՆ դոլարը:

«2008 թվականի գարնանն Արմեն Գևորգյանը, իր մտերիմ անձի օժանդակությամբ ստանալով վերը նշված առանձնապես խոշոր չափերի կաշառքը, դրա իրական բնույթն ու ծագումը թաքցնելու և խեղաթյուրելու համար ապահովել է նշված կաշառքի գումարի փոխանցումները տարբեր իրավաբանական անձանց անուններով, ինչպես նաև իրեն փաստացի պատկանող, արտերկրում գործունեություն ծավալող կազմակերպության բանկային հաշվին: Այնուհետև նշված կազմակերպության գործադիր տնօրեն Անդրանիկ Գևորգյանը, օժանդակելով որդու կողմից հանցավոր ճանապարհով ստացված գույքն օրինականացնելուն, տնօրինել է հիշյալ գումարը և այն ներդրել ընկերության կողմից իրականացված ձեռնարկատիրական գործունեության մեջ՝ այդ կերպ խեղաթյուրելով և թաքցնելով հանցավոր ճանապարհով ձեռք բերված կաշառքի իրական բնույթն ու ծագումը»,- նշված է ՀՔԾ հաղորդագրությունում։

Հեղինակ՝ Իզաբել Սահակյան

Աղբյուր` Փաստինֆո