Փաստ ինֆո

Ուժային կառույցներում փոփոխությունները Նիկոլ Փաշինյանի ռեակցիան էր այսօրվա ներքաղաքական զարգացումներին։ «Փաստինֆո»-ի հետ զրույցում այս մասին ասաց քաղտեխնոլոգ Վիգեն Հակոբյանը։

Նրա կարծիքով պարզ է, որ դա նաև պանդեմիայի դեմ չհաջողված պայքարի ռեակցիան է, որտեղ ըստ Վիգեն Հակոբյանի՝ իրենց բացասական դերն ունեին նաև ուժային կառույցները. «Սովորաբար երբ կարանտին են հայտարարում, նորմալ երկրներում որոշակի պարտադրման մեխանիզմներ էլ են աշխատում, մեզ մոտ ակնհայտորեն թերացում կար։ Կարծում եմ՝ վարչապետին նյարդայնացնում էր նաև սոցիալ-տնտեսական վատացող իրավիճակը, որն ավելի լուրջ վատանալու հեռանկարներ ունի և վարչապետը գուցե մտավախություն ունի, որ դա կարող է բերել սոցիալական լրջագույն զանգվածային դժգոհությունների։ Գուցե վարչապետն ուզում է ուժային կառույցներն ամրապնդել իրեն նվիրված կադրերով»,-ասաց Վիգեն Հակոբյանը։

Թե որքանով արդյունավետ կլինի դա, ժամանակը ցույց կտա։ Քաղտեխնոլոգը կարծում է, որ որոշ հատուկ ծառայություններում միայն մարդ փոխելով ոչ մի բան չի փոխվում, որովհետև դրանք համակարգեր են, որոնք ունեն իրենց ավանդույթները, գործունեության մեխանիզմները, փոխադարձ կապերը.

«Թղթի վրա կարող ես հրաման տալ, բայց դրանից չի բխում, որ վերտիկալ իշխանությունն այնտեղ միանգամից մեկ մարդու ձեռքն է գալիս, որն օրինակ համակարգի մարդ չէ։ Հայաստանի փորձն էլ շատ դեպքերում ցույց է տվել, որ սովորաբար ոչ համակարգային մարդիկ շատ երկար չեն մնում, 1-2 տարի։ Այդ էքսպերիմենտը հայկական պատմության մեջ գրեթե միշտ չի աշխատել։ Հիմա կյանքը ցույց կտա»,-ասաց քաղտեխնոլոգը։

Միևնույն ժամանակ Վիգեն Հակոբյանը նկատեց՝ այժմ ամենաարդիականն Առողջապահության նախարարին փոխելն է։ Քաղտեխնոլոգի գնահատմամբ ակնհայտ է, որ նա այս գործընթացի գլխավոր տապալողն է. «Ինձ զարմացնում է Նիկոլ Փաշինյանի դիրքորոշումը կամ գնահատականները, թե ինչպես է առողջապահական համակարգն աշխատել այս ամիսների ընթացքում։ Չեմ հասկանում՝ ինչու է ամեն գնով պահում Արսեն Թորոսյանին։ Տեսնում ենք, որ հիվանդանոցները հերթով հայտարարում են, որ իրենք վաղուց էին պատրաստ, բայց ոչ ոք չի դիմել։ Չեմ կարծում, որ վարչապետն այդ աստիճան չի տիրապետում իրավիճակին։ Վարչապետին տեղեկացված մարդ եմ համարում և ուզում եմ հասկանալ՝ ինչ լծակներ ունի Արսեն Թորոսյանը, որը ստիպում է վարչապետին այս պայմաններում իրեն ձեռք չտալ»,-ասաց Վիգեն Հակոբյանը։

Հիշեցնենք, որ հունիսի 8-ին պաշտոնից ազատվել են ԱԱԾ տնօրեն Էդուարդ Մարտիրոսյանը, ՀՀ ոստիկանապետ Արման Սարգսյանը, ՀՀ ԶՈՒ ԳՇ պետ Արտակ Դավթյանը։ Վարչապետի առաջարկությամբ ԶՈՒ Գլխավոր շտաբի պետի պաշտոնում նշանակվել է Օնիկ Գասպարյանը, ԱԱԾ տնօրենի պաշտոնում՝ Արգիշտի Քյարամյանը, իսկ ոստիկանապետի պաշտոնում՝ Վահե Ղազարյանը։

Հեղինակ՝  Հասմիկ Կոշկարյան

Աղբյուր` Փաստինֆո