Փաստ ինֆո

Արարատի մարզի համայնքապետերի գերակշիռ մեծամասնությունը նախկին իշխանությունների հետ համագործակցած համայնքի ղեկավարներ են, բայց, ընդհանուր առմամբ աշխատանքային պրոցեսը գործընկերային է։ ԱԺ-ում լրագրողների հետ ճեպազրույցի ժամանակ այս մասին ասաց Արարատի մարզպետ Գարիկ Սարգսյանը՝ պատասխանելով հարցին մարզում կա նախկին իշխանության հետ համագործակցած համայնքապետեր, որոնք «անհանգստացնում» են։ 

«Եթե համայնքի ղեկավարը մտահոգված է համայնքի շահերով, մասնակցում է պետական աջակցության ծրագրերին, մասնավորապես սուբվենցիոն ծրագրերին։ Ֆոնդային մասում եղած գումարն ամբողջությամբ ներդնում է համայնքի շենացման համար, մենք այդ համայնքապետերի հետ պատրաստակամ ենք ամենօրյա ռեժիմում աշխատելու։ Կան տեղեր, մասնավորապես Նորաշեն համայնքը, այդտեղ խնդիրն ամենևին այլ էր։ Մեզ վերապահված լիազորությունների շրջանակներում գործել ենք իրավական առումով ճիշտ, ներկայացրել ենք լիազոր մարմնին և ուսումնասիրությունից հետո իրավական գնահատական է տրվել համայնքի ղեկավարի գործողություններին, որի արդյունքում համայնքի ղեկավարի լիազորությունները վաղաժամ դադարեցվել են»,-ասաց Գարիկ Սարգսյանը։

Հարցին՝ ընտրակեղծիքներով ընտրված համայնքապետեր մարզում կա՞ն, մարզպետը նկատեց՝ չի կարող ասել, որովհետև նման փաստեր չունեն և որևէ մեկին նման բանում մեղադրելու իրավունք էլ չունեն. «Ամեն դեպքում ամեն ինչ կատարվել է ժողովրդի աչքի առաջ։ Համայնքի բնակիչները լավ գիտեն՝ որ համայնքի ղեկավարն ինչպես է ընտրվել։ Մեծ թվով համայնքապետեր կան, ովքեր ուղղակի այլընտրանքային թեկնածու չեն թողել, որ համայնքի բնակիչն ընտրի իրենց համար երկրորդ, այլընտրանքային թեկնածու։ Սա է եղել նախկին իշխանությունների հիմնական գործելաոճը։ Ոչ թե թույլ են տվել մասնակցել 2, 3 և ավել թեկնածուների, այլ ուղղակի թույլ չեն տվել որևէ մեկին մասնակցել։ Եղել է միակը և անկրկնելին և նա էլ ընտրվել է համայնքի ընտրողների կողմից»,-ասաց Գարիկ Սարգսյանը։

Դիտարկմանը՝ ներկայիս իշխանությունը ընդդիմադիր ուժ լինելու ժամանակ է խոսել ընտրակեղծիքների մասին, մարզպետն ասաց, որ վերջին երկու տարիների ընթացքում ընտրությունների հետ կապված առերևույթ ընտրախախտումներին վերաբերող աղաղակող գործեր մարզում չեն քննվել. «Թե ինքս ինչ գիտեմ և ինչի եմ ականատես եղել, դա իմ իմանալունն է»,-ասաց Գարիկ Սարգսյանը։

Աղբյուր` Փաստինֆո