Փաստ ինֆո

Ինձ օրինական հիմքով ձերբակալելն ուղղակի հնարավոր չէ, որովհետև ես ոչ մի ապօրինություն չեմ արել: Այս մասին «Երկրի հարցը» հաղորդման եթերում ասել է «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը՝ անդրադառնալով իրեն ձերբակալելու մասին շրջանառվող լուրերին:

«Ինձ կարող են կամ ապօրինի առևանգել և զրկել ազատությունից, որը շատ կարճ է տևելու, կամ պետք է համակերպվեն այն քննադատությունների հետ, որը ես հնչեցնում եմ այս իշխանությունների վերաբերյալ»,- ասաց Վանեցյանը:

Նա տեղեկացրեց, որ երեկվանից իր նկատմամբ ակտիվորեն իրականացվում են օպերատիվ-հետախուզական միջոցառումներ, ինչը ենթադրում է գաղտնալսումներ, արտաքին դիտում:

«Մի մարդու, ով օպերլիազորի պաշտոնից հասել է մինչև ծառայության տնօրեն, շատ դժվար է ինչ որ բան անել, որի հերթականությունը ես չգիտեմ: Մեր կուսակցության գրասենյակի դիմաց դրել են տեսախցիկ, որ տեսնեն՝ ովքեր են գալիս մեր կուսակցություն, գնում»,- ասաց Վանեցյանը՝ նշելով, որ անգամ իր երեխաների հեռախոսներն են գաղտնալսվում:

Նրա խոսքով պետությունը վերածվել է դեղին մամուլ թողարկող թերթի:

«Իրավապահ համակարգի կողմից ստացվող տեղեկությունները պարբերաբար հայտնվում են մեր մամուլի էջերում և ասում են՝ համացանցում կամ մամուլում հայտնվեց նման տեղեկություններ:Ես Ձեզ հավաստիացնում եմ՝ նման տեղեկությունները հենց այնպես չեն հայտնվում»,- նշեց Վանեցյանը:

Աղբյուր` Փաստինֆո