Փաստ ինֆո

Երթևեկության բարելավման ծրագրի մասով նշված է ուղևորների արժանապատիվ տրանսպորտի մատուցում, որի կատարողականը զրո է, այնինչ գումարների կեսը համարյա ծախսել եք։ Այս մասին ԱԺ տարածքային կառավարման և տեղական ինքնակառավարման, գյուղատնտեսության և բնապահպանության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստի ժամանակ ասաց նիստը վարող Մանե Թանդիլյանը՝ դիմելով Երևանի փոխքաղաքապետ Հայկ Սարգսյանին։

«Փաստացի ծախսված գումարի կեսն էլ ծախսել եք, բայց այդ հատվածով կատարողականը զրո է կազմում և բացատրել եք ահա ինչպես. պայմանավորված է տրանսպորտային նոր համակարգի ներդրումով, որը չի ավարտվել։ Այսինքն` չենք արել, որովհետև չենք արել»,-ասաց Մանե Թանդիլյանը։
Փոխքաղաքապետ Հայկ Սարգսյանն ասաց, որ տրանսպորտի բարեփոխումների ծրագիրը, որը դեռևս 2018 թվականի դեկտեմբերից ակտիվ քննարկման փուլում է քաղաքապետարանում, ընդհանուր բյուջեն 100 մլն եվրոյից անցնում է. «Մինչ մենք ծրագրի հնարավոր, առկա և մեր կողմից կասկածվող բացթողումները կուսումնասիրեինք և որոշակի փոփոխություններ կիրականացնեինք, զուգահեռ իրականացվում էր նաև նշված 100 մլն բյուջետային միջոցների կամ լրացուցիչ, ներդրումային ֆոնդերի ներգրավման հարցը։ Բնականաբար 60-70 մլն սեփականմուտքեր ունեցող քաղաքի բյուջեով հնարավոր չէր իրականացնել 100 և ավել մլն եվրոյանոց ծրագիր, ուստի այստեղ աշխատանքն իրականացվում է քաղաքապետարանի և կառավարության համատեղ ջանքերով։ Այս պահին որպես ծրագրի սկզբնական փուլի իրագործում ունենք 100 միավոր 12 մետրանոց ավտոբուսների գնման մրցույթ, որի արդյունքներով կունենանք առաջին խմբաքանակը մատակարարված Երևան որպես տրանսպորտային ցանցի ավտոբուսային շարժակազմի համալրման առաջին փուլ»,-ասաց փոխքաղաքապետը։

Մանե Թանդիլյանը, արձագանքելով փոխքաղաքապետին, հարցրեց որևէ աշխատանք արվե՞լ է, բացի մրցույթից։ Հայկ Սարգսյանն ասաց, որ այս պահին ծրագիրը ներդրումային կոմպոնենտ չի պարունակում, որպեսզի որևէ ներդրողի համար լինի հետաքրքիր. «Ամբողջ աշխարհում տրանսպորտային ցանցը վնասաբեր է։ Այս փուլում դեռևս չունենք պատրաստի իրավիճակ, երբ կա որոշում արվում է վարկային միջոցներով, ներդրումային միջոցներով, թե կառավարության ուղիղ սուբսիդավորման»,-ասաց փոխքաղաքապետը։

Աղբյուր` Փաստինֆո