Փաստ ինֆո

Թեհրանում ՀՀ դեսպանության մոտ տեղի ունեցած բողոքի ակցիան հստակ մեսիջ է Հայաստանի իշխանություններին, որ պետք է հավելյալ աշխատանքներ տանել Իրանի Իսլամական Հանրապետության արտաքին գերատեսչության հետ։ «Փաստինֆո»-ի հետ զրույցում այս մասին ասաց իրանագետ Գոհար Իսկանդարյանը։

Հիշեցնենք, որ երեկ Թեհրանում ՀՀ դեսպանության մոտ բողոքի ակցիա է տեղի ունեցել։ Ակցիայի մասնակիցները կոչ են արել Հայաստանին վերանայել իր դիրքորոշումը, որպեսզի Իսրայելում ՀՀ դեսպանատուն չբացվի։

Գոհար Իսկանդարյանն առավել քան վստահ է, որ ՀՀ արտաքին գերատեսչությունն այս ընթացքում ունեցել է քննարկումներ, աշխատանքներ է իրականացրել ԻԻՀ արտաքին գործերի նախարարության հետ, բայց եթե եղել է նման բողոքի ակցիա, նշանակում է, որ աշխատանքները բավարար չեն եղել և պետք է շարունակվեն։

Հարցին՝ Հայաստանն ընտրության առջև կանգնած է, իրանագետը բացասական պատասխան տվեց. «ՀՀ-ն, լինելով ինքնիշխան պետություն, իր արտաքին քաղաքականությունը չի իրականացնում մեկ այլ պետության հաշվին։ Օրինակ մենք ԱՄՆ-ի հետ նույնպես ունենք հոյակապ հարաբերություններ։ ԱՄՆ-ն Իրանի թշնամին է, բայց երբևիցե ԱՄՆ-ի հետ մեր հարաբերությունները կառուցելիս դա չենք արել ի հաշիվ Իրանի։ Ինչու՞ պետք է այս պահին Իսրայելի հետ հարաբերություններ ունենալն արվի Իրանի հաշվին, բացարձակապես ոչ։ Դրանք երկու տարբեր արտաքին քաղաքական ուղղություններ են, որոնք պետք է իրականացվեն, իսկ հայ-իրանական հարաբերություններն այնքան խորն են զարգացած ու համապարփակ, որ չեմ կարծում՝ Իսրայելի հետ նոր-նոր սկսվող հարաբերությունները կարող են ստվերել հայ-իրանական հարաբերությունները»,-ասաց Գոհար Իսկանդարյանը։

Վերջինս լիահույս է, որ չենք հասնի այն օրը, երբ ընտրության առաջ կկանգնենք։ Իրանագետը կարծում է՝ կկարողանանք իրավիճակն այնպես կարգավորել, որ Իրանի համար ամեն ինչ հասկանալի և ընկալելի լինի, որ այստեղ ընտրության հարց չէ. «Պետք է հավելյալ աշխատանքներ տանել, այդ թվում բացատրական աշխատանքներ։ Դա կլինի թե՛ արտաքին գործերի նախարարության, թե՛ դեսպանատան, թե՛ փորձագետների, մասնագետների միջոցով։ Դա պետք է ամբողջական լինի և Իրանի իշխանություններին հստակ մեսիջներ ուղղվեն, որ Իսրայելի հետ հարաբերությունները որևէ կերպ չեն ստվերում հայ-իրանական հարաբերությունները։ Նրանց համար էլ է անհասկանալի, թե այդ դեպքում ինչու 1991թ.-ից ի վեր չենք բացել և թավշյա հեղափոխությունից հետո նման որոշում ենք կայացրել։ Իրենք էլ ունեն մտքեր, որոնք իրենց անհանգստացնում են։ Այսինքն` այստեղ հստակ բացատրություններ և երաշխիքներ տալու խնդիր կա»,-ասաց Գոհար Իսկանդարյանը։

Հարցին՝ հնարավո՞ր են առաջիկայում էլ նման բողոքի ակցիաներ, իրանագետը նկատեց՝ եթե աշխատանքներ չտարվեն, ապա բողոքի ակցիաներ, իհարկե, կլինեն և այս անգամ ավելի մեծաքանակ, քան երեկ տեղի ունեցած ակցիան էր։

Հեղինակ՝ Հասմիկ Կոշկարյան

Աղբյուր` Փաստինֆո