Փաստ ինֆո

ՍԴ աշխատակազմի ղեկավարը հորդորեց հանրային գործիչներին՝ Բարձր դատարանի մասին արտահայտվելիս լինել հնարավորինս զուսպ, առավել ևս՝ թե՛ պատգամավորները, թ՛ե ԱԺ-ն ՍԴ դիմող սուբյեկտ են, ուստի պետք է կոռեկտ գտնվեն Բարձր դատարանի և դատավորների վերաբերյալ տեսակետ հայտնելիս։ Այս մասին լրագրողների հետ զրույցում ասաց ՍԴ աշխատակազմի ղեկավար Էդգար Ղազարյանը։ 

Նրա փոխանցմամբ՝ ՍԴ-ն իր կազմավորման օրվանից աշխատում է բնականոն ռեժիմով, օրենքով սահմանված ժամկետներում տարբեր սուբյեկտներից, այդ թվում՝ ԱԺ-ից, քաղաքացիներից, ֆիզիկական-իրավաբանական անձանցից, ՀՀ նախագահից, կառավարությունից, ՄԻՊ-ից ստանում է դիմումներ և այդ դիմումները քննության են առնվում սահմանված ժամկետներում, կայացնում որոշումներ։

«Դատարանը բնականոն իր գործունեությունը ծավալում է և ոչ մեկի հույսից կախված չէ»,- ասաց Ղազարյանը՝ հավելելով, որ ՍԴ-ն իրականացնում է իր առաքելությունը, այն է՝ սահմանադրական արդարադատություն։

Ինչ վերաբերում է ՍԴ նախագահ Հրայր Թովմասյանի աշխատավարձը կորոնավիրուսի դեմ պայքարին տրամադրելուն, Ղազարյանը նշեց, որ Հրայր Թովմասյանի աշխատավարձը փոխանցվել է ՀՀ առողջապահության նախարարության բացված հատուկ հաշվեհամարին։ Բացի այդ՝ Ղազարյանի փոխանցմամբ, որ այս երկու ամսվա ընթացքում ՍԴ-ում պարգևավճարներ առհասարակ չեն վճարվել։ Լրագրողի հարցին,թե ինչու՞ չեն լրացվում հաստիքները, Ղազարյանը պատասխանեց, որ աշխատակազմի կառուցվածքը երկար ժամանակ է, ինչ փոփոխությունների չի ենթարկվել, սակայն շուտով կլինի նոր կառուցվածք, հետևաբար՝ ձեռնպահ են մնում այս պահին հաստիքները լրացնելուց։ Ղազարյանը նշեց, որ ՍԴ աշխատակազմն իրականացնում է նաև քաղաքացիական ծառայություն և դրանով պայմանավորված ևս կլինի նոր հաստիքացուցակ։

Աղբյուր` Փաստինֆո