Փաստ ինֆո

ԵԿՄ նախկին նախագահ, ԱԺ նախկին պատգամավոր Մանվել Գրիգորյանի ինքնազգացողությունը վատացել է: Այս մասին «Փաստինֆո»-ի հետ զրույցում ասաց Մանվել Գրիգորյանի պաշտպանական խմբի անդամ Լևոն Բաղդասարյանը:

Նրա փոխանցմամբ՝ Գրիգորյանին այժմ կաթիլային է միացված, զարկերակը կտրուկ նվազել է, աշխատել է երկու խումբ:

«Նախկինում պարբերաբար բարձրաձայնում էինք՝ հիմք ընդունելով բժշկական էպիկրիզը, բժշկի մասնագիտական կարծիքը, որ Հայաստանում այլևս հնարավոր չէ վերականգնել առողջությունը, ՀՀ առողջապահության նախարարի անգործության շնորհիվ ունենք այս պատկերը, վաղն էլ կարող է լինել մահ և նման անտարբերություն»,- ասաց Բաղդասարյանը:

Ճշգրտող հարցին, թե ստեղծված իրավիճակում պատասխանատուն պետությո՞ւնն է, Բաղդասարյանը պատասխանեց, որ, եթե ՀՀ առողջապահության նախարարությունը, մասնավորապես՝ նախարարը առողջապահական գործառույթ չի իրականացնում, գրություն է ներկայացվում, ինչին ի պատասխան ստացվում են միջանկյալ պատասխաններ՝ ոչ մերժում է, ոչ բավարարում, ներկայացվում է էպիկրիզ, որտեղ երևում է հիվանդությունների վատթարացումը, երևում է, որ առողջապահական գործողություններն արվում են ուղղակի կոնսերվացնելու, բազմիցս բարձրաձայնվում է, որ Հայաստանում բացառվում է նման հիվանդություններով բուժում իրականացնելը և նման պայմաններում թույլ չեն տալիս, որ անձը շարունակի բուժումն արտերկրում, կարելի է հետևություն անել, որ տոտալ գործառույթ է իրականացվում, որ անձը մահանա կամ պարզապես հանցավոր անգործություն է:

Հարցին, թե արդյո՞ք պատրաստվում է այդ մասով հանցագործության մասին հաղորդում ներկայացնել, Բաղդասարյանը պատասխանեց. «Ես պարզապես փաստում եմ, որ այսօր Գրիգորյանի առողջության վատթարացման հետ կապված ուղղակի մեղավորություն ունի ՀՀ առողջապահության նախարարը: Երբ մարդ հիպոկրատի երդում է տվել և նրան ներկայացնում են էպիկրիզը, որտեղ երևում է, որ տևական ժամանակ բուժում է ստանում հիվանդանոցում, բայց հիվանդություններն ավելանում են, վատթարանում են, բժիշկները գրում են, որ այլև Հայաստանում հնարավոր չէ բուժել, անհապաղ անհրաժեշտ է, որ նա տեղափոխվի արտերկիր, որ այնտեղի սարքավորումով, որը Հայաստանում չկա, հետազոտվի, այնտեղի դեղամիջոցով, որ Հայաստանում չկա, բուժում իրականացվի և, եթե գործառույթ չի իրականացնում ՀՀ առողջապահության նախարարը, հետևությունը մեկն է՝ վատթարացման և հետագայում նաև ավելի վատթար վիճակի հասնելու դեպքում պատասխանատուն պետական լիազոր մարմինն է՝ ի դեմս առողջապահության նախարարի: Առավել ևս՝ մենք բազմիցս բարձրաձայնել ենք, պաշտոնական գրություն ենք ներկայացրել առողջապահության նախարարին, որ իր պարտավորությունները կատարի »:

Հիշեցնենք՝ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ:

Հեղինակ՝ Իզաբել Սահակյան

Աղբյուր` Փաստինֆո