Փաստ ինֆո

Իշխանությունը ցույց է տալիս, որ պատրաստ է ցանկացած ապօրինության և անբարոյականության՝ իր իշխանությունը պահելու համար։ Այս մասին «Փաստինֆո»-ի հետ զրույցում ասաց «Իրավական ուղի» ՀԿ համահիմնադիր Ռուբեն Մելիքյանը՝ անդրադառնալով «Բարգավաճ Հայաստան» կուսակցության ղեկավար Գագիկ Ծառուկյանի նկատմամբ իրականացվող հակաքարոզչությանը։

Հիշեցնենք, որ հունիսի 5-ին Գագիկ Ծառուկյանը հայտարարել էր, որ կառավարությունը 100 տոկոսով պետք է փոխվի, ինչին հաջորդել էր իշխանության կտրուկ արձագանքը։ Մասնավորապես՝ հունիսի 5-ին Նիկոլ Փաշինյանի խոսնակ Մանե Գևորգյանը ֆեյսբուքյան իր էջում նախազգուշացրել էր քրեական գործերի մասին՝ նշելով, թե Գագիկ Ծառուկյանը պարզապես մտահոգված է մի շարք քրեական գործերի ընթացքով, որոնք վերաբերում են փողերի լվացմանը, ընտրակաշառք բաժանելուն, հարկերից խուսափելուն, կոռուպցիային: Իսկ Փաշինյանի տիկնոջ՝ Աննա հակոբյանի եղբայրը, «Իմ քայլը» խմբակցության պատգամավոր Հրաչյա Հակոբյանի ֆեյսբուքում հանդես էր եկել մեկ այլ գրառմամբ՝ «Խմբակային բռնաբարության համար դատապարտված ընտրակեղծարարը Հյուսիս-հարավից ինչքա՞ն լափած կլինի: Այո կամ ոչ»։ Այս հայտարարություններին հաջորդեցին Գագիկ Ծառուկյանի վերաբերյալ խմբակային բռնաբարության գործի փաստաթղթերի տարածումը սոցիալական ցանցերով։
Ռուբեն Մելիքյանը «Փաստինֆո»-ի հետ զրույցում ասաց, որ իշխանությունը նման քայլերով շռայլորեն իրավունք է վերապահում ՀՀ հաջորդ իշխանություններին՝ իրենց հետ վարվել առնվազն այնպես, ինչպես իրենք են վարվում այսօր՝ լինելով իշխանություն։

Մելիքյանն ընդգծեց, որ հետագայում Գագիկ Ծառուկյանը Վճռաբեկ դատարանում արդարացվել է այդ արարքի համար (արդարացման որոշումը կայացրել է ՀՔԾ պետ Սասուն Խաչատրյանի հայրը՝ Մհեր Խաչատրյանը- խմբ) և նշեց, որ սա որպես մանկապատանեկան ռեպրեսիայի նախապատրաստություն կարելի է համարել, ինչը բացի ապօրինի և հակաբարոյական լինելուց նաև խայտառակ պարզունակ է։ Զուգահեռ անցկացնելով ՀՀ տարածքային կառավարման և ենթակառուցվածքների նախարար Սուրեն Պապիկյանի՝ դատվածություն ունենալու մասին տեղեկատվության տարածմանը հաջորդած քրեաիրավական գործընթացներին և իշխանության արձագանքին՝ Մելիքյանն արձանագրեց, որ սա հերթական երկակի ստանդարտի դրսևորումն է։

«Հիշում եք, թե այն ժամանակ ինչ իրավական և մեդիա արձագանք եղավ ։ Ընդ որում՝ այս երկու դեպքերն էապես են իրարից տարբերվում »,- ասաց Մելիքյանը։

Նա ընդգծեց, որ մի դեպքում գործ ունենք դռնփակ դատական նիստում հրապարակված դատավճռի հետ, իսկ Սուրեն Պապիկյանի դեպքում՝ դռնբաց։ Բացի այդ՝ Մելիքյանն ընդգծեց, որ Գագիկ Ծառուկյանի գործով դատավճիռը բեկանված էր, իսկ Սուրեն Պապիկյանի գործով բեկանված չի եղել։
Ռուբեն Մելիքյանն ուշադրություն հրավիրեց նաև ժամականագրության վրա։

«Հստակ ժամանակագրական առումով երևում է, որ սա հետևում է «Բարգավաճ Հայաստան» կուսակցության քաղաքական հայտարարություններին, այսինքն՝ պարզից էլ պարզ է, որ իշխանություններն ապօրինաբար օգտագործում են իրենց մոտ եղած տեղեկատվությունը՝ իրենց ընդդիմախոսների նկատմամբ։ Ըստ էության՝ փորձում են կամ ակնկալում են, որ այլոք, ովքեր հետագայում պետք է իրենց ընդդիմախոսեն, կվախենան և այդ քայլին չեն դիմի, բայց այնքան մանկական պարզություն կա այս ամենի մեջ և չեմ կարծում, որ որևէ մեկի վրա այս գործիքն ազդի»,- ասաց Մելիքյանը։

Հիշեցնենք, որ Սուրեն Պապիկյանի դատվածություն ունենալու մասին հայտնի դարձավ 2020թ փետրվարի 14-ին, երբ «Հրապարակ»-ը տեղեկություն էր հրապարակել այն մասին, որ տարածքային կառավարման և ենթակառուցվածքների նախարար Սուրեն Պապիկյանը նախկինում դատվածություն է ունեցել եւ դա թաքցրել է իր կենսագրությունից։ Ըստ հրապարակման՝ Պապիկյանը զինծառայության ժամանակ դանակով հարվածել է հրամանատարին և դատապարտվել է ազատազրկման եւ ազատ արձակվել 2007 թվականին համաներումով: Սուրեն Պապիկյանը հրապարակումից հետո ֆեյսբուքյան ուղիղ եթերում փաստացի ընդունել էր դատվածության փաստը , միեւնույն ժամանակ նա ոստիկանությանն ու ԱԱԾ-ին հորդորել էր պարզել, թե ում ձեռքով ու ինչպես է իր անձնական կյանքին վերաբերող գաղտնի ինֆորմացիան դարձել իր անունը կեղտոտելու առիթ: Նա հայտարարել էր, որ դա նպատակ ունի «այո»-ի շտաբի աշխատանքները մրոտել։ Ապա ՀՔԾ-ում քրեական գործ հարուցվեց անձնական կյանքի գաղտնիք համարվող տեղեկությունն ապօրինի հավաքելու, տարածելու և պաշտոնեական դիրքը չարաշահելու դեպքի առիթով / ՀՀ քրեական օրենսգրքի 144-րդ և 308-րդ հոդվածի 1-ին մասով/։

Հարուցված քրեական գործի շրջանակներում մեղադրանք է առաջադրվել ՀՀ ԱԱԾ համապատասխան ստորաբաժանման պետին՝ ՀՀ քրեական օրենսգրքի 308-րդ հոդվածի 1-ին մասով նախատեսված հանցավոր արարք կատարելու` պաշտոնեական լիազորությունները չարաշահելու համար:

Հեղինակ՝ Իզաբել Սահակյան

Աղբյուր` Փաստինֆո