Փաստ ինֆո

«Ես հավատում եմ, որ Նիկոլ Փաշինյանին հայտնել են, թե ինքն ու իր ընտանիքի անդամները վարակակիր են», - «Փաստինֆո» լրատվական գործակալության հետ զրույցի ընթացքում ասել է բժիշկ, «Առողջ հանրություն» ՀԿ նախագահ Մարինա Խաչատրյանը՝ անդրադառնալով վարչապետ Նիկոլ Փաշինյանի հայտարարությանը, որ ինքն ու իր ընտանիքի անդամները աննախադեպ կարճ ժամանակահատվածում հաղթահարել են կորոնավիրուսային վարակն ու առողջացել։ 

Մարինա Խաչատրյանը սակայն չի կիսում այն տեսակետը, թե նրանք իսկապես վարակված են եղել. «Նախօրեին Առողջապահության նախարարի մամուլի խոսնակը հայտարարեց, որ հիվանդությունների վերահսկողության կանխարգելման կենտրոնի լաբորատորիան կիրակի օրը չի գործելու, այսինքն՝ դադարեցրել է աշխատանքն ախտահանման աշխատանքներ կատարելու նպատակով։ Որպես մասնագետ նշեմ, որ ախտահանման աշխատանքներն այնտեղ պետք է կատարվեին ամեն օր՝ յուրաքանչյուր օրվա ընթացքում և վերջում հատուկ հեղուկներով պետք է մանրակրկիտ ձևով ախտահանվեր լաբորատորիայի ողջ տարածը, որից հետո պետք է միացվեին ախտահանիչ դեր ունեցող հատուկ լամպեր։ Փաստորեն, կարող ենք ասել, որ այդ ախտահանման գործողությունները կամ ժամանակին չեն կատարվում կամ պատշաճ ձևով չեն իրականացվում, կամ բոլորովին չեն արվում։ Իմ գնահատմամբ սա բերել է նրան, որ մենք ունեցել ենք մեծ թվով կեղծ դրական թեստերի արդյունքներ, այսինքն՝ պացիենտը չունենալով վարակ, դրական պատասխան է ստացել և այդ մարդկանց թվում ընդգրկվել է նաև Նիկոլ Փաշինյանն՝ իր ընտանիքով։ Ես հավատում եմ, որ իրեն ասել են, թե ինքը թեստի դրական արդյունք է ունեցել, որովհետև հիշում եմ, երբ նա լայվի ժամանակ հայտնում էր այդ մասին, նրա դեմքին ընդգծված տագնապ կար ։ Այսինքն, մարդը հասկանում էր, որ ամեն ինչ արված է եղել, որպեսզի ինքը չվարակվի և հանկարծ նրան ասում են, որ ինքն ու իր ընտանիքն, այնուամենայնիվ, վարակված են։ Ես ունեմ նաև այլ քաղաքացու արդյունքը, որը դրական է եկել, իսկ երկու- երեք օր հետո՝ այլ լաբորատորիայում կրկնակի թեստի արդյունքները բացասական են եղել։ Չի կարող պատահի, որ հիվանդությունը, որի գաղտնի շրջանը տևում է 14, իսկ կլինիկական փուլը՝ 7-21 օր և, որն իրենց կողմից նկարագրվում է որպես ծայրահեղ վտանգավոր և դժոխային վարակ, լավանա մի քանի օրում։ Այդպիսի բան հնարավոր չէ։ Ուրեմն, այստեղ ուզում եմ շեշտել՝ սա կոնկրետ լաբորատորիայի անփութության կամ հանցավոր անգործության արդյունք է։

Հիշենք նաև հիվանդությունների վերահսկողության և կանխարգելման կենտրոնի ղեկավարի տեղակալ Նունե Բակունցի՝ «Առաջին»-ի եթերում հարցազրույցի ժամանակ պատահաբար կատարած խոստովանությունն այն մասին, որ ՀՀ-ում կորոնավիրուսի թվերը նկարվում են։ Եկեք չմոռանանք, որ այս ինֆորմացիոն տեռորը իրականացվում է նաև հղի կանանց նկատմամբ։ Հետևաբար, բոլոր հղի կանանց և նրանց ընտանիքի անդամներին խորհուրդ եմ տալիս առաջին թեստից հետո այլ լաբորատորիայում նույնպես թեստ հանձնել», - «Փաստինֆո»-ի հետ զրույցում մանրամասնում է Մարինա Խաչատրյանը։

Անդրադառնալով վարչապետի և իր ընտանիքի անդամների՝ տեղական և ռուսաստանյան մամուլում հակասական գնահատականների տեղիք տված առողջացման լուրին, Մարինա Խաչատրյանը նկատում է՝ այստեղ փոքրիկ նրբություն կա. «Հայտնի է, որ տարբեր տարիքային խմբերի մոտ այս հիվանդությունը տարբեր ձևով է ընթանում։ Այո, հայտնի է, որ փոքրիկներն ավելի հեշտ են տանում այս վարակը, քան մեծահասակները, բայց գրեթե անհնարին էր, պարզապես հնարավոր չէր, որ ընտանիքի բոլոր անդամները միևնույն ժամանակ միասին հիվանդանային և հաշված օրերի ընթացքում նույն կազմով միաժամանակ էլ առողջանային։ Գոնե մեկի կամ երկուսի մոտ պետք է կասկածելի դրական կամ դրական թեստի արդյունք գար։ Հետևաբար, ես գալիս եմ այն եզրահանգման, որ սխալը լաբորատորիայում է եղել, սրանից էլ հետևություն ենք անում, որ մեր բազմաթիվ հայրենակիցների դրական թեստերի արդյունքները պարզապես կեղծ են եղել»։

Հեղինակ՝  Նվարդ ՄԱՆՎԵԼՅԱՆ

Աղբյուր` Փաստինֆո